Mateu 5
5
Ureriya
Luka 6.20-23
1Yesu woonnyawe atthu enci ahowela mmwaakoni ni wunkoma. Eetthuci awe yahomwaattamerya, 2ni ahopacera weetthuciha eeraka:
3Ahoreriya ale oohuva munnepani,
kontha Umwene wo wirimu uri wawaya.
4Ahoreriya ale anonla
kontha Nluku nawaamaaliha.
5Ahoreriya ale owiiyeviha
kontha ilapo yo vathi inhala ukhala yawaya.
6Ahoreriya ale anvoliya itala ni ntthona no'sariya, kontha anaahala urupala.
7Ahoreriya ale anoonela ikiriri akhwaya,
kontha Nluku naahala woonela ikiriri.
8Ahoreriya ale ari oorera nrima,
kontha anaahala umoona Nluku.
9Ahoreriya ale mayowaataniha atthu,
kontha Nluku naahala weehana asaanawe.
10Ahoreriya ale anoomolanihaciya nlattu woovara intthunawe Nluku,
kontha umwene wo wirimu uri wawaya.
11Nhoreriya nyu mwaruwaninyaka, nlupatthiyaka ni mootheraciyaka nlattu wawaka. 12Ntteeliye ni ntthape kontha nhosunkeriya wirimu itthuvo yuulupale. Ciicammo pheenryaya wowoomolanihiya minapiyu caariwo nyu nhinaya.
Maakha ni waarya
Marku 9.50; Luka 14.34-35
13Nyu nri maakha o mwiilaponi, vano maakha yalulaka anhala uhokoleela tho cani uciva? Khaanciva tho, uri paahi uriha ni unyakelaciya na atthu. 14Nyu nri waarya wo mwiilaponi. Khinvithiya isittatti yootekiya waculu mwaako. 15Khimpariheliya isamaninya phweesiyaka nkhwikwicira. Nanso ineesiya nipuro nowoonnya, wiira yaamwaleele atthu othene ari mpaani. 16Ciicammo, isamaninya enyu inlamuliya upharela wariyari wa atthu, wiira cooninye coovara cinyu coorera, ni attottopeliye athumwaninyu ari wirimu.
Nlamulo na Musa
17Nhuupuwele wiira mi kaawile umaliha Nlamulo na Musa atthuna Minapiyu. Akaawile umaliha, nanso kaawile uttharihelela nlamulo. 18Khweli kinawuhimeryani wiira mpaka wanhalaya umala irimu ni ilapo, khaniwo mena nlepa nimoca ninhala umala muNlamuloni mwaka, mpaka cothene ciirannyeke. 19Vano ule nohala uhanyuriha nlamulo nimoca mwa ala, eeraka wiira nna niri nlamulo nankani eetthucihaka atthu, nohala ukhala ookhicera wumweneni wo wirimu. Nanso ule nohala uttharihelela ni wiitthuciha, nohala waalikeleliya ukhala muulupale wumweneni wo wirimu. 20Maana kinoohimeryani wiira, isariya cinyu nnyo caahivirikaneke ni isariya co mayowantikha ni mafarisi, khannokela wumweneni wo wirimu.
Ihaali yo wiivakaninya
21Nheewa itthu ihimyaceriyaya atthu o khalayi yiiriyaka: Nhiive. Nanso ntthu nohala wiiva, naahukhumwinya.#5.21 Ukhuma 20.13; Nlamulo 5.17 22Vano mi kinawuhimeryani wiira ntthu phi ntthu nohala unviruwela munnawe naahukhumwinya, ni ule nohala unruwana munnawe naahukhumwinya ni mphwinko wa akhulupale, ni ule nohala umwiirela munnawe, nsikini, naahukhumwinya umooroni.
23Vano nyu mwawaanaka itthuvo enyu ukhipulani, ni muupuwelaka wiira ihaawo itthu ikipankilyawe munnaka, 24nhiye itthuvo enyu iyo wakhipulani, murwee mweewanane ni munninyu, ni wahoolo mwaturuwa vale mwavahe itthuvo enyu iyo. 25Mwaakuve umwiiwanana mwiinaninyu nnari ni uyo mphironi, wiira huurweeheni wuuhukhumwinyani, ni mayahukhumu uyo huurweeheni ukalaposo. 26Weekhweli kinawuhimeryani wiira khannohala ukhuma wonwo nhinaya uliva itoosu yowiiheerya.
Ihaali yooluva
27Vano nyu nheewa itthu ihiminye yiiraka: Nheette uluva.#5.27 Ukhuma 20.14; Nlamulo 5.18 28Nanso mi kinwiirelani coo: Nlopwana othene nohala waawehecesa athiyana wowaalakela, wanrimani wawe, heettana uluva. 29Wakhalaka wiira niitho naa nno ninawukosiha, utamihe ni urihele uttayi, phatari uhaleele mphantte mmoca wo'rutthu aa, wiira ihiriheliye irutthu aa yothene umooroni. 30Wakhala wiira ntata naa no nlopwana ninawukosiha, uthikile ni urihele uttayi, phatari uhaleele mphantte mmoca wo'rutthu aa, wiira ihiriheliye irutthu aa yothene umooroni.
Ihaali yoomwalana
Mateu 19.1-9; Marku 10.1-12; Luka 16.18
31Ciicammo ihohiminya wiira: Ule nohala waamwalanana amwaarawe, aavaheke iwarakha yoomwalana.#5.31 Nlamulo 24.1 32Nanso, mi kinwiirelani coo: Ntthu naamwalanana amwaarawe, mari uhikhanle paahi nlattu wooluva, phwaathelaka akina, neetta uluva.
Ihaali yoolupela
33Ciicammo nheewa ceereliyaya atthu okhalayi wiira: Nhilupele moothaka, nanso nttharihelele venci cilupenlenyu wa Apwiya. 34Nanso mi, kinwiirelani coo: Nhilupele ni hata nhiromole irimu, nlattu wookhala ihice ya Nluku, 35mena ilapo, nlattu wookhala phinnyakelelawe, mena uYerusalemu, nlattu wookhala isittatti ya Mwene muulupale. 36Ni uhilupele muru aa, maana we khunoorya uphuwiha hata ikharari yooripa atthuna ipwi. 37Nanso wuulumaca winyu nwo ukhaleke wowiira: Aye, aye. Mena, mena. Impwaha va, inkhuma wa Ntakhali.
Ihaali yoolivyaanihera
Luka 6.29-30
38Nheewa yiiriyaka: Niitho ni niitho, niino ni niino.#5.38 Ukhuma 21.24; Mayasataka 24.20; Nlamulo 19.21 39Nanso mi kinwiirelani coo: Nhinlivyaanihere yoonanara mwiinani enyu, nanso ule nohala uwaattani nrama no nlopwana, unthetyeeleke nikina nno. 40Ni nohala wuunyokhani ni phiwaakhakani malaya, munvaheke ni ikacako enyu. 41Ookhanyererihakani ntthu unveleela nkwaha wookhuvyaa, munveleeleke nkwaha woorekama. 42Munvahe noolepelani ni nhinrerye ittuli nophavela wuukophelani.
Mwaafente eenani inyu
Luka 6.27-28,32-36
43Nheewa yiiriyaka: Unfente nkhwaa ni unthanye mwiinani aa.#5.43 Mayasataka 19.18 44Nanso mi kinwiirelani coo: Mwaafente eenani inyu ni mwaavekelele ale anowoomolanihacani, 45wiira nkhale asaana eekhweli a athumwaninyu o wirimu, maana ayo naakumiha ncuwa nawe aakumiheraka oohimaana ni omaana, anaawaana ipula aavahaka atthu o'sariya ni oohi isariya. 46Maana mwaafentaka paahi anoofentani, nrina itthuvoni? Mpaka mayoliviha nsoko ampanka ciicammo! 47Mwasalamehaka paahi asunninyu, mpankileni yomaana? Mpaka amalaponi ampanka ciicammo! 48Phimaana, nkhale ooloka toko ciryaya ooloka athumwaninyu ari wirimu.
Currently Selected:
Mateu 5: NNI
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.