Mateu 4

Uttehattehiya wa Yesu

Marku 1.12-13; Luka 4.1-13

1Wahoolo Yesu ahokusiya ni Nnepa Nttakattifu ni ahorwaniya utakhwani wiira attehattehiye ni Sotwani. 2Natthukilene mahuku arupayini (40) uhiyu n'uthana, yahonvola itala. 3Vano nttehattehi ule ahomwaattamerya Yesu ni ahomwiirela: We wakhala wiira uMwana a Nluku ulamulele ala maluku ala wiira athatuwe mikatthe. 4Vano Yesu ahomwaakhula eeraka: Ihantikhiya wiira: Kuhimwena ni nkatthe paahi ntthu phinkhalanawe ukumi, nanso wo nuulumo nothene ninkhuma wamalakuni a Nluku.#4.4 Nlamulo 8.3

5Wahoolo, Sotwani ahonrweha Yesu usittatti ittakattifu, ni ahommweliha nipuro nootepa urekama no'nupa ittakattifu ni ahomwiirela: 6Wakhala wiira we uMwana a Nluku, utuphe va urwaaka vathi, kontha ihantikhiya wiira:

Nluku naahala waaruma ancelo awe nlattu wawaa,

ni wuuvarelela mmatatani mwaya,

wiira hata nluku nimoca nihuukakathule nnyaani mwaa.#4.6 Macipo 91.11,12

7Vano Yesu ahomwaakhula eeraka: Ciicammo ihantikhiya wiira: Uhaattehattehe Apwiya Nluku aa.#4.7 Nlamulo 6.16

8Ikwaha ikinaku tho, Sotwani ahonkusa Yesu anrwaanaka umwaakoni woorekama cinene ni ahomoonihera umwene wothene wo nttuniyani ni nttittimiho naya 9ni ahomwiirela: Cothene nnya kinawuvaha, wakikhoromelaka ukilapelaka. 10Yesu ahomwiirela: Ukhume, we Sotwani, kontha ihantikhiya wiira: Mwaalapele Apwiya Nluku inyu, yaayo paahi phinphwanela urumeeliya.

11Ummaleloni Sotwani ahonhiya, ni yahowa ancelo ni yahonrumeela.

Yesu naapacera ulalya uKalileya

Marku 1.14-15; Luka 4.14-15

12Yesu weewilyawe wiira Yohani hotthukiya, ahoturuwela uKalileya. 13Akhumaka uNasaree ahorwaa ukhala uKafarnaumu, uri wakhiviru ni ntthiya, nttetthe wo Sepuloni ni Nafitali, 14wiira itthariheleliye yaahiminye ni nnapiyu Isaya yiiraka:

15Ilapo yo'Sepuloni ni Nafitali

iphiro yo'pahari upwaha Yortani, Kalileya a amalaponi,

16atthu yaakhala mpiphini

yahoona waarya venci;

ni ale ankhala ilapo yo mitthuuci co nookhwa

wahaasela.#4.16 Isaya 9.1,2

17Ukhuma vaavale mpaka wahoolo Yesu ahopacera ulalya eeraka: Nrukunuse mirima cinyu, kontha umwene wo wirimu uri wakhiviru.

Yesu naweehana eetthuci awe oopacera

Marku 1.16-20; Luka 5.1-11

18Yesu eettaka ni nceresere ntthiya no'Kalileya, ahomoona Simoni eehaninya Peturu, ni nhimawe Anteree, yaavonyeraca matthavi mpahari, kontha yaari mayototha ihopa. 19Yesu aheera: Nkitthare mi, ni mi kinkowupankani mayowaatotha atthu. 20Wowaakuvyaca wene yahohiyaca matthavi aya ni yahonttharaca Yesu.

21Wahoolo, ahomoona Yakopu, mwana a Sepeteu ni Yohani nhimawe. Ale yaari nkalawani wamoca ni Sepeteu athumwanaya, alokihacaka matthavi aya. Yesu aheehanaca, 22ni ale, wowaakuvyaca wene yahaahiyaca athumwanaya wamoca ni ikalawa, ni yahonttharaca.

Yesu naweetthuciha atthu ni waavoniha aretta

Luka 6.17-19

23Wahoolo Yesu ahorwaa mittetthe cothene co'Kalileya, eetthucihaka mmasinakokani mwaya, alalyaka nhupi woorera wo Umwene ni avonihaka iretta ni ikwerere cothene ca atthu. 24Vano ihapari ca Yesu cahomwareela uSiriya wothene, na atthu othene yaanawaawiiha aretta yaahuvihiya ni minepa coonanara ni cowoopiha, anacilicili, owuntakyaa, ni uyo aanawaavoniha. 25Miphwinko cinci ca atthu ookhuma uKalileya, uTekapoli, uYerusalemu, uYuteya ni o mittetthe cikhwawe co Yortani caanantthara.

Currently Selected:

Mateu 4: NNI

Highlight

Copy