Yona 1
1
Yona Antthawaka Nluku
1Nihuku nimoca nuulumo na Mwanene Nluku nahowa wa Yona mwana a Amitayi niiraka: 2Wunwe ni urwee isittatti yuulupale yo'Ninive waahimyacere moolumo aka, kontha coonanara caya cihowela mpaka waryaka. 3Nanso Yona ahotthawa wamiithoni wa Mwanene Nluku arwaaka uTarisi, ahokhuruwela uYopa, waaphwanyilyawe ikalawa yaarwaa uTarisi, aholivela ikwaha ni ahokela, wiira aatthukane nloko anahota yaarwaa uTarisi, aphavelaka untthawa Mwanene Nluku.
4Vano Mwanene Nluku ahoruma iphyoo yuulupale mpahari ni ahowa nkhaya mpaka ikalawa yaahanle vakani uphwyaa. 5Vaavale anahota yahoovaca venci, ni khula ntthu aananlepela nluku awe, ni yahorihela mpahari mirintti caarinaya nkalawani, wiira awukule ulemeliya nwo. Vaavale Yona ahokhuruwela nhina ikalawa weecatalenlyawe arupaka ikhove. 6Nhooleli o'kalawa ahomwaattamerya Yona ni ahonkoha eeraka: Unrupani? Wunwe ni unlepele nluku aa, noone toko nanoonela ikiriri wiira nihikhwe. 7Wahoolo yaheerelana: Nrwee nipanke mwaavi wiira nincuwele tipani niwiihenre nenna nihusi nna. Yahopanka mwaavi ni wahomorela waYona. 8Vaavale yahonkoha yiiraka: Unihimerye, nenna nihusi nna, mwanene tipani? Ummara ntekoni? Unkhuma vayi? Ilapo aa phivi ni uri ikhapilani? 9Yona ahaakhula eeraka: Mi ki nheperi, ni kinamoova Mwanene Nluku, Nluku o wirimu, pattusile ipahari ni itthaya. 10Vaavale atthu ale yahanca woova venci ni yahonkoha yiiraka: Isiyani yeela ipankile ela? Kontha atthu ale yahocuwela wiira aatthawa wamiithoni wa Mwanene Nluku, maana ahaahimyacera.
11Vano nkhaya aanatepaca mpaharini, phimaana yahonkoha yiiraka: Nuupankeke isiyani wiira ipahari imaale? 12Yona ahaakhula eeraka: Nkikuse ni nkivonyere mpahari, ni iyo inaahala umaala. Kinaacuwela wiira nkhaya ula wile mwa nlattu wawaka. 13Vaavale anahota yaanvira yeettihaka ni ikuru caya aphavelaka uphiya ukhopela. Nanso khayoonrye, kontha mpahari mmo nkhaya aanvira atepaka. 14Vano ale yahonlepela Mwanene Nluku, yiiraka: Contte Mwanene Nluku, uhinihiye nikhwaka nlattu wa coonanara ca Yona, uhinootherye hi va ukhwa wawe kontha we Mwanene Nluku uhopanka wotthuna waa. 15Vaavale yahonteesa Yona ni yahonvonyera mpahari, ni nkhaya ahomaala ucaca. 16Vano atthu ale yahomoovaca venci Mwanene Nluku, ni yahonvahaca itthuvo n'umoopela natiri.
Iswali ya Yona nari mmirimani mo'hopa
17Mwanene Nluku ahoruma ihopa yuulupale wiira immirye Yona. Ni Yona ahokhala mmirimani mo'hopa mahuku mararu uthana n'uhiyu.
Currently Selected:
Yona 1: NNI
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
