Mphattuwelo 50

1Yusufu ahaawuluwela athumwane, ahonlela ni waakapatta. 2Wahoolo ahaavaha nlamulo akulukhano yaavara nteko nenno nipuro nno wiira yattikitthele nrette wohunttiha irutthu ya athumwane, ni ale yahaattikitthela. 3Yahovira mahuku arupayini (40) oolikana, kontha yooyo phaari ukati waalamunliyaya uttikittheliya makhura nrutthu, ni annaciipitu yahoonla mahuku sapini.

4Waavinryaya mahuku o nookhwa ayo, Yusufu ahoolumaca ni mahumu a Farawoo eeraka: Wakhala wiira nyu nnaakifenta mwamuulumane Farawoo mwa ncina naka mi. 5Apaapa ahokilupeliha yiiraka: Kihanle vakani ukhwa. Mwakivithe mahiye yiitthenkacenryaka ilapo yo'Kanaa. Vano va, mwanvekele wiira akitthunihere urwaa waavitha apaapa akinkela kapicaka kinaawa naanano. 6Ahaakhula Farawoo eeraka: Urwee wavithe athumwana ayo toko aneene culupelihilyaya. 7Vaavale Yusufu ahorwaa waavitha athumwane. Ule ahaatthukana ikwaha malaka kano othene a Farawoo, alamuli yaavaranawe nteko wamoca na alamuli othene o wIciipitu. 8Vano waahiya alamuli ayo, yahorwaa ciicammo amuci o ntthoko na Yusufu asunnawe na atthu othene yaari mmatatani mwa Yakopi. Yaahinnye uKoseni nwo yaari paahi asaana, imope ni ikhontwaa. 9Ciicammo yahaaveleela atthu uwela ikhavalu naampakhira o'mope. Ikwaha iyo yaari ya atthu enci. 10Uphiya waya ipuwa ya Atate, wakhiviru ni mooloko Yortani yahocukula ni wunla venci. Mpaka Yusufu ahokhala mahuku saapa onlelaka athumwane. 11Atthu o'Kanaa yaakhalana yaayo mapuro ayo, woona waya wunliya venci wapuwani ya Atate, yaheeraca: Annaciipitu ampanka matthanka, phimaana nne nipuro nne naattamanne mooloko Yortani niihaninyaka Apeli-Misirayimi. 12Commo asaana a Yakopi yahopanka toko caahimeriyaya na athumwanaya. 13Yahaakusaca athumwanaya mpaka ilapo yo'Kanaa ni yahaavithaca nikhuku niri imatta yo Makipela wakhiviru n'uManree, imatta ile yathumiheriyawe Aparahamu ni Eforoni nhete wiira ikhale ikhapuri coohala uvithana alokwawe Aparahamu. 14Naavithilene athumwane ale Yusufu ahoturuwela wIciipitu na asunnawe na atthu othene yaanvelenle.

Nnema na Yusufu

15Asunnawe Yusufu woona waya wiira athumwanaya ahokhwa yaheeraca: Wakhala wiira Yusufu haana itwaana ni hi, ni aphavelaka onivihera ikuhukuhu mwa nlattu wa yoonanara yampankilehu, niireke cani? 16Phimaana yaholeeheraca nhupi woonhimerya Yusufu wiira: Athumwana ahinaya ukhwa yahoniruma 17wiira munhimyacere coo: Kinawuvekela waalevelele coonanara ni itampi cupankilyaya. Nna va ulevelele itampi ca akarumeya a Nluku a athumwana. Vano Yusufu waakhela wawe nhupi ule, ahoonla. 18Wahoolo yahowaaca asunnawe Yusufu ni yahonkhoromela wiitho wene ni yaheeraca: Hi nihowa va, wiira nikhale ipottha caa. 19Vano Yusufu aheerelaca coo: Nhoovace, mi kinlamuliya ukhala nipuro na Nluku? 20Nyu nhokipankaca mi itthu yoonanara, nanso Nluku hopanka yeeyo itthu iyo ukhala yoorera, wiira mi ilelo kisunke ukumi wa atthu enci. 21Phimaana nhoovace, mi kinaahala wuuvahani nyu iyolya wamoca na asaanenyu ayo. Commo pheenryawe Yusufu wowaamaaliha asunnawe ni ahoolumacera wo nifento.

Ukhwa wa Yusufu

22Vano Yusufu ahokhala wIciipitu myakha iminya nuuwa khumi (110), nari wamoca na amuci awe othene na athumwane, 23mpaka ahoona ucuulu woneeraru wa asaana a Farayimi. Ni ahaakhelela asaana a Makhiri, mwana a Manasesi ukhala awawe. 24Vano Yusufu hinaya ukhwa aheerela asunnawe ayo coo: Kihanle vakani ukhwa, nanso khweli Nluku naahala wuukaviherani nyu, mpaka naahala wuukumihani ila ilapo ela, oorweehakani ilapo yiilupelenlyawe Nluku unvaha Aparahamu, Isaki ni Yakopi. 25Vaavale Yusufu aheerelaca asaana a Sirayeli wiira nnolamuliya ulupela, eeraka coo: Nluku ookavihereni nyu, nhala nkumihaca makhuva aka ayo mu. 26Phimaana Yusufu aakhwile narina myakha iminya nuuwa khumi (110) ceyarelo. Nrutthu wa Yusufu wahottikittheliya makhura oohunttiha irutthu, n'uheliya ncaneesani ni yahosunkiya wIciipitu.

Currently Selected:

Mphattuwelo 50: NNI

Highlight

Copy