Lukas 6

Sé murit maupu' ing gandum asi endo Sabat

(Mat. 12:1-8; Mrk. 2:23-28)

1 # Ul. 23:25 Asi makasa, an tutuw in endo Sabat, si Yesus mawaya' lumangkoi im pangumaan ing gandum. Ang karoro'an imawaya' am bitu, sé murit-Na maupu' im batuna ing gandum wo kuliten éra ing kama em batuna im bua'na ing gandum itu wo kanen éra. 2Taan icua é piraan tou Farisi, “Kéitu kamu maéma' si ra'ica toro pengaémaan asi endo Sabat?”

3Wo isowat i Yesus ai séra, “Ra'ipé' réén binaca miow e niéma' i Daud an tutuw sia wo sé tou makiit sia maaremo? 4#1Sam. 21:1-6 Sia muntep an ténda paapo'an a si Amang Kasuruan#6:4 “Ténda paapo'an a si Amang Kasuruan” eng kaangéanna ‘Ténda i Amang Kasuruan’. wo mindo i roti si ayumper a si Amang Kasuruan wo kanenna wo yéké-ékéna a sé tou sé makii-kiit isia. Sa kumiit in atoran in agamata, e roti itu ra'ica toro kanen aluar sé imam.” 5Icua ka'i Yesus ai séra, “Si Toyaang i Tou awéan kawasa en tumu'tul im baya-waya icauntep in atoran in endo Sabat.”

Si Yesus sumama' si tou asi endo Sabat

(Mat. 12:9-14; Mrk. 3:1-6)

6Asi endo Sabat walina, si Yesus muntep am balé paapo'an é agama Yahudi wo sumusui. Am bitu awéan esa tou eng kamana esa imapalaio. 7Wo am bitu ka'i awéan sé makailek wutul in Torat wo sé piraan tou Farisi. Séra sé mawere-weren si Yesus sa Sia sumama' in tou an endo Sabat, wosama' séra ro'na méé ing kaséaan ai Sia. 8Taan kailekano i Yesus em pawero-weroten éra wo icua-Na a si tou eng kamana esa mapalaio itu, “Tumooro wo tumulungo mai an uner!” Wo si tou itu tumoor wo tumulung an uner éra. 9Kumawus in itu icua i Yesus ai séra, “Wuéien-Ku ai camu, sa kumiit in atoran agama, si wisa e ro'na émaan asi endo Sabat? Méma' in loor kuma'pa méma' in léwo'? Lumowir in tou kuma'pa maté tou?” 10Kumawus in itu téintengen i Yesus pakasa sé tou an li'cir-Na wo kumua a si tou sumakit itu, “Yuluro mai eng kamamu!” Wo yulurna tanu si aicua i Yesus. Asi témpo ituke' imasama'o eng kamana.

11An tutuw é guru agama Yahudi wo sé tou Farisi itu suméré sapa e niéma' i Yesus, séra mae'bow keli. Wo séra mepaar sapa en émaan éra sa a si Yesus.

Si Yesus sumisir sé sangapulu' rua tou e mamuali ruru'du'an-Na

(Mat. 10:1-4; Mrk. 3:13-19)

12Asi makasa, si Yesus mangé an esa tolaina en sumombayang. Am bitu Sia sangawengi menomba-nombayang a si Amang Kasuruan. 13An tutuw i mandoo, towan-Na sé tou makii-kiit Sia wo sisiren-Na sangapulu' rua tou ai séra. Séra sé patuulen-Na ruru'du'an. E ngaran éra: 14Simon si ningaranan-Na ka'i Petrus, si Andreas si metuari wo si Simon, Yakobus, Yohanes, Filipus, Bartolomeus, 15Matius, Tomas, Yakobus toyaang i Alfeus, Simon si patuulen ka'i tou Zelot, 16Yudas toyaang i Yakobus, wo si Yudas Iskariot si tou kumianat oka si Yesus.

Si Yesus masusui wo sumama' sé tou keli

(Mat. 4:23-25)

17Kumawus in itu, si Yesus wo sé sangapulu' rua murit-Na mewali-wali merosio' in tolaina wo séra mento' an esa ataran. Am bitu imali'uso sé tou keli makii-kiit Sia wo kelian ka'i sé tou walina imai an Yudea owo, ang kota Yerusalem owo wo asé rua kota an tembir in ta'sic makangaran Tirus wo in Sidon. 18Séra mai en luminga in sususuien i Yesus wo i mapasama' in sakit éra. Sé tou rinasuk i sétang ka'i sinama'-Na. 19Pakasa é tou itu rumaméji misu' Sia ampa'paan an owak-Na, palemboian ing kawasa e méma' iséra im baya masama'.

Si Yesus kumua andumoro' ing kamang wo ing kawangkuran

(Mat. 5:1-12)

20Wo sérén i Yesus sé murit-Na wo kumua,

“Pakakamangen kamu sé tou lengéi,

ampa'paan icamuo e makaanu ing Kakolanoan i Amang Kasuruan.

21Pakakamangen kamu sé intarépé' maarem,

ampa'paan émaan oka i Amang Kasuruan kamu mawesu.

Pakakamangen kamu sé intarépé' maamé',

ampa'paan émaan oka i Amang Kasuruan kamu kumé'ké'.

22 # 1Ptr. 4:14 Pakakamangen kamu sa kamu icasuut é tou,

ra'ica wana tou eng kumarapi,

kamu ipawawa' é tou wo pawuruken éra e ngaran iow,

ampa'paano kamu makiit Yaku, si Toyaang i Tou.

23 # 2Taw. 36:16; Kis. 7:52 Maaru-aruio wo masalé-salé'o mangé kamu an tutuw itu,

ampa'paan uli-ulit en laasamu wangko' an sorga.

Sé nabi indior niéma' ka'i é apo-apo' é tou itu tanu siitu.

24Taan icawangkuro mio' kamu sé tou siya' intarépé',

ampa'paan kamu imendamo ing kaaruian ang kasiyaan iow.

25Icawangkuro mio' kamu sé mawesu intarépé',

ampa'paan kamu mendam oka ing kaareman.

Cawangkuro mio' kamu sé imeké'ké' intarépé',

ampa'paan kamu mawendu oka wo maamé'.

26Icawangkuro mio' kamu sa pakasa sé tou marayo icamu,

ampa'paan tanu siitu ka'i e niéma' é apo-apo' éra indior, marayo sé nabi ra'ica wutul.”

Mengaupus angé sé kaséké'

(Mat. 5:38-48, 7:12a)

27“Taan kamu sé makalinga Yaku intarépé', icua-Ku mangé ai camu, icaupuso mangé sé kaséké' miow, wo mengaéma' mio' in loor a sé tou sé masuut icamu. 28Ipangileko mangé kamang torona é tou sé icumutuk icamu wo isombayango mangé ka'i sé tou mengawa'ba' icamu. 29Sa awéan tou sumepé' in amo kakan iow, iwééo mio' ka'i en amo ka'biri miow sepéénna. Sa awéan e mindo in jubamu, iwayao mio' ka'i indonna eng karaimu. 30Sa awéan tou mangilek sapake' mangé ai co, iwééo mio' sapa em pinangilekna. Wo sa awéan tou mandét sapake' mangé ai co, tioo pangilekenmu sumawel. 31#Mat. 7:12 Sapa sé icasalé' miow émaan é tou walina ai camu, tanu siituo si musti émaan iow a sé tou itu.

32Sa kamu asalo mengaupus sé tou sé mengaupus icamu, sapa eng kalébéanna ai camu? Ampa'paan sé tou iméma' ing kamesé-meséaan ka'i mengaupus sé tou sé mengaupus ai séra. 33Wo sa kamu asalo maéma' in loor a sé tou mengaéma' in loor ai camu, sapa eng kalébéanna ai camu? Ampa'paan sé tou iméma' ing kamesé-meséaan mengaéma' ka'i tanu siitu. 34Sa kamu méé iraman sapaanke' mangé a sé tou wo kamu maarap wosama' iwaréngna sumawel, sapa eng kalébéanna ai camu? Sé tou iméma' ing kamesé-meséaan ka'i mengawéé pairaman a sé tou ang kamesé-meséaan wo pengapangileken éra sumawel meputé ing kakeli sé niiram ai séra.

35Taan si musti émaan iow, mengaupus angé a sé kaséké' miow wo mengaéma'o mangé sé loor ai séra. Wo pengawéanio' iraman séra wo ra'ica maarap iwaréng. Sa émaan iow tanu siitu, kamu makéré oka laasa wangko'. Wo siituo e mamuali tuus sapaoka kamu uli-ulit toya-toyaang i Amang Kasuruan Si Rumangka-rangka'. Ampa'paan si Amang Kasuruan loor a sé tou sé ra'ica mengawéé makapulu'sama' wo ka'i a sé tou léwo'. 36Mengaupus angé kamu a sé tou walina kaputé si Amang iow an sorga taupus a sé pakasa sé tou.”

Si Yesus masusui wosama' tioo maakim sé tou walina

(Mat. 7:1-5)

37“Tioo kamu mengaakim sé tou walina wosama' kamu ra'- ica akimen. Wo tioo kamu mengaukum sé tou walina, wosama' kamu ra'ica ukumen i Amang Kasuruan. Wéanio' kaampungan a sé tou walina wosama' kamu ampungan i Amang Kasuruan. 38Mengawééo mangé a sé tou walina wosama' kamu wéan oka ka'i mai i Amang Kasuruan. Ukuren-Na am pengaukuran loor wo ipengéro-ngéro' wo ipemese-meseké' ka'i wo awesan-Napé' akar i mawuta-wuta wo wéé-Na ai cita. Ampa'paan sa kamu mengawéé wayake' im pira a sé tou walina, kamu ka'i wéan oka i Amang Kasuruan waya im pira. Sa kamu mengawéé keli a sé tou walina, kamu ka'i wéan oka i Amang Kasuruan kumeli-keli.”

39 # Mat. 15:14 Wo icua ka'i i Yesus ai séra esa andéan, “Ro'na réén sé tou wola maakin sé tou wola? Tantu ra'ica, ampa'paan séra in dua tantu lumepok oka an lo'beng. 40#Mat. 10:24-25; Yoh. 13:16, 15:20 Taniitu ka'i ra'ica wana murit en lum mai wo si guruna. Taan sa si murit itu itumamato an sicola, sia imeputéo wo si guruna.

41Kéitu réén en awu ing kayu am beren i poowmu kaséréan iow taan em balak am beren iow in esa ra'ica kaséréan iow? 42Tambisa réén kamu ro'na kumua a si poowmu, ‘Éi poow, mayoo icesotku en awu ing kayu am berenmu!’ Taan em balak am beren iow ra'ica kaséréan iow. Éi tou punek! Icesot owo em balak am beren iow, wosama' ro'na kaséréan iow wutul eng kumesot in awu ing kayu am beren i poowmu.”

En até é tou kakailekan oka am perina

(Mat. 7:16-20, 12:33-35)

43“Ra'ica wana tuura loor mawua' ra'ica loor. Wo ra'ica wana tuura ra'ica loor wo mua' loor. 44#Mat. 12:33-34 Ampa'paan en tuura itu kailekan oka é tou am bua'nana. Anaé, sé tou ra'ica kawisa mupu' im bua'na in ara an dukut tutunéan owo wo ka'i ra'ica kawisa mupu' im bua'na in anggor an sarawét. 45Si tou sama' em ipanuwu'na asaloke' in andumoro' sé loor, ampa'paan an untep in aténa wuta in andumoro' sé loor. Taan si tou léwo' em ipanuwu'na asaloke' sé léwo', ampa'paan an untep in aténa wuta in andumoro' sé léwo'. Ampa'paan sapa sé ayéma' an aténa, siituo en lumembo mai am ba'ba'.”

Sé tou mengaéma' in sususuien i Yesus

(Mat. 7:24-27)

46“Kéitu réén kamu kumua a Yaku, ‘Tuang, Tuang’ taan kamu ra'ica maéma' sapa en aicua-Ku? 47Icua-Ku ai camu, pakasa en tou imai a Yaku wo luminga sé aicua-Ku wo péngaémaanna, ituru'-Ku oka ang karapi in sapa sia aipeputé-Ku. 48Sia ipeputé wo si tou mangun im balé: Kataré-taré sia kuma'il in tana' rarem keli wo tumulir im batu pandasi wo mangun im balé am bawo im batu itu. An tutuw mai en sonop wangko' wo tumuli im balé itu, em balé itu ra'ica iméro' ampa'paan winangun am bawo im pandasi enté'. 49Taan si séike' mangé si luminga in aicua-Ku wo en itu ra'- ica pengaémaanna, sia itu meputé wo si tou si mangun im baléna am bawo in tana' ra'ica imaké watu patuliran. An tutuw mai en sonop wangko' wo tumuli im balé itu, em balé itu makala'us rume'ba wo makatongka-tongkar.”

Currently Selected:

Lukas 6: TNT

Highlight

Copy