Lukas 5

Si Yesus tumowa sé murit-Na kataré

(Mat. 4:18-22; Mrk. 1:16-20)

1 # Mat. 13:1-2; Mrk. 3:9-10, 4:1 Asi makasa si Yesus makatulung an tembir in lour Genesaret.#5:1 Si lour anio' ngaran walina i ‘Lour Galilea’. An Taar Uré si lour anio' patuulen ka'i ‘Lour Kineret’ (Bilangan 34:11), kuma'pa ‘Lour Kinerot’ (Yos. 12:3). Wo keli sé tou imali'usai ai Sia e mai luminga in Taar i Amang Kasuruan. 2Wo kaséréan i Yesus sé rua londéi an tembir in lour itu. Asi témpo itu sé tou matangka' sera' itumumpao an londéi wo ang karoro'ano i mawu'as in lolombo'. 3Wo si Yesus sumaké asi esa londéi anu i Simon. Wo iru'du'-Na si Simon en tumuké in londéina wosama' tumayang toyo' an tembir in lour. Wo si Yesus lumukut an londéi itu wo sumusui a sé tou keli sé an tembir in lour.

4Kekawus ako si Yesus masusui wo icua-Na a si Simon, “Simon, ilondéio mangé si londéi anio' an tampa rarem wo ilomboo mio' en lolombo'mu en tumangka' sera'.”

5 # Yoh. 21:3 Isowat i Simon, “Guru, sangawengio kami maéré-éré sera' taan ra'ica wana eng kinatangkaan ami. Taan, ampa'paan si Guru irumu'du' yaku, ilombo'ku sumawel en lolombo'.” 6#Yoh. 21:6 Pakaémaan éra mako en airu'du' i Yesus wo séra makatangka' sera' kelian ulit akar en lolombo' éra tumo'tolo makésé'. 7Wo kapéien éra sé kara-karapi éra an londéi walina wosama' séra mai sumémbong. Wo sé kara-karapi éra itu mai wo mewali-wali mumpun sé sera' asé rua londéi itu akar imawuta, akar sé londéi itu tawio tuminep. 8An tutuw i Simon Petrus suméré in itu, sia kumundu an dior i Yesus wo kumua, “Tuang, itela'uo mai aku ampa'paan yaku anio' tou kelian kamesé-meséaan.” 9Si Simon icumua tanu siitu ampa'paan sia wo pakasa sé tou mewali-wali wo sia mangaya-ngaya'ka' isuméré ing kakeli é sera' sé kinatangkaan éra. 10Taniitu ka'i sé kara-karapi i Simon, si Yakobus wo si Yohanes sé toyaang i Zebedeus, séra mangaya-ngaya'ka' isuméré in itu.

Wo icua i Yesus a si Simon, “Simon tioo maindé'! Ico manaram mengatangka' sera', taan tumo'tol intarépé' ko mengaéré oka tou eng kumiit Yaku.”

11Kumawus in itu wésoono i Simon wo sé kara-karapina en londé-londéi ang katanaan wo itela'u éra waya en itu wo kumiit si Yesus.

Si Yesus sumama' si tou sumakit kusta

(Mat. 8:1-4; Mrk. 1:40-45)

12Asi makasa si Yesus an esa kota. Am bitu awéan esa tou en owakna wuta ing kusta. An tutuw i tou itu suméré si Yesus, sia kumundu wo mekiupus an dior i Yesus, icuana, “Tuang, sa icasalé' i Tuang, si Tuang ro'na sumama' yaku.”

13Kelinga in itu, yulur i Yesus eng kama-Na e misu' si tou itu wo kumua, “Icasalé'-Ku, masama'o ko.” Asi témpo ituke', icatalao en sakit kustana. 14#Im. 14:1-32; Mat. 8:4; Mrk. 1:44 Wo péronen i Yesus si tou itu wosama' tioo icuana a sé tou sapaoka si Yesus en isumama' in sakitna. Wo icua i Yesus, “Mangé ipapaturu' en owakmu a si imam wo mééo mio' raragés binatang pinokol tanu si aiperénta i Musa tanu tuus ai séra sa ko imasama'o.”

15Taan en abar andumoro' i Yesus icaseraro taré am bisa-wisa. Wo kelian tou mai en luminga in sususuien-Na wo e mapasama' in sakit éra. 16Taan si Yesus imangéke' sumombayang an tampa lulu in tou.

Si Yesus sumama' si tou késo'

(Mat. 9:1-8; Mrk. 2:1-12)

17Asi makasa an tutuw i Yesus masusui, awéan piraan tou Farisi wo sé makailek wutul in Torat makalukut makalinga Sia. Séra mai am pakasa in doong ang Galilea, Yudea wo ka'i an Yerusalem owo. Eng kawasa i Amang Kasuruan awéano a si Yesus en sumama' sé tou sumakit. 18Asi témpo itu, paalinai é tou a si Yesus si esa tou késo' aitekel am patekelan. Séra rumaméji maali si tou késo' itu an untep im balé wo iweta' an dior i Yesus. 19Taan ampa'paan kumeli-keli sé tou am bitu, si tou késo' itu ra'ica icauntep éra am balé. Anaé, séra sumosor am bawo im balé wo egan éra en atep wo itumpa éra mio' si tou késo' itu si pakatekel am patekelan an uner é tou keli an dior wutul i Yesus.

20An tutuw sérén i Yesus e niéma' éra, kinailekan-Nao sapaoka séra maéman ai Sia. Wo icua-Na a si tou késo' itu, “Éi poow, eng kamesé-meséaanmu niampungano.”

21Kelinga in itu, piraan tou sé makailek wutul in Torat wo sé tou Farisi mawero-werot an untep in até, “Si séi réén si Tou anio'! Em pakanuwu'-Na maojato si Amang Kasuruan. Ra'ica wana tou e ro'na méé kaampungan ing kamesé-meséaan é tou, wayake' si Amang Kasuruan.”

22Taan kailekan i Yesus em pawero-weroten éra. Wo icua-Na ai séra, “Sapa réén em pemero-meroten iow an untep in até? 23Si wisa en taporak icua-Ku; ‘Eng kamesé-meséaanmu niampungano,’ kuma'pa ‘Tumooro wo maya'o?’ 24Taan ituru'-Ku ai camu, wosama' kailekan iow sapaoka ang kayo'baan anio' si Toyaang i Tou awéan kawasa e méé kaampungan ang kamesé-meséaan.” Wo icua i Yesus a si tou késo' itu, “Tumulungo, angkaieno en tinekelanmu wo maréngo mangé am balému!”

25Asi témpo ituke', si tou késo' itu ka'i tumoor an dior é tou am bitu. Kumawus in itu, angkaienna em patekelanna wo sia maréng am baléna. Ang karoro'anna imawaréng, sia marayo-rayo si Amang Kasuruan. 26Keséré éra sapa e imamuali, pakasa sé tou am bitu mangaya-ngaya'ka' wo séra rumayo wo sumiri' si Amang Kasuruan. Wo ang karapi in indé' séra kumua, “Asi endo anio' sinéréo ami eng kakaya'kaan wangko' imamuali.”

Si Yesus tumowa si Lewi kumiit Sia

(Mat. 9:9-13; Mrk. 2:13-17)

27Kekawus in itu si Yesus kumesot wo sérén-Na si esa tou matagi im pajak, makangaran Lewi, makalukut an tampa é tou mawér im pajak. Wo icua i Yesus ai sia, “Kumiito mai Yaku!” 28Kelinga in itu si Lewi tumulung wo itela'una waya en itu wo sia kumiit si Yesus.

29Wo si Lewi méma' im pésta wangko' am baléna torona i Yesus. Am bitu kelian sé matagi im pajak wo sé tou walina sé mekiit icuman ang karapi i Yesus. 30#Luk. 15:1-2 Keséré in itu, sé tou Farisi wo sé makailek wutul in Torat menge'bo-nge'bow a sé murit i Yesus wo icua éra, “Kéitu réén kamu kuman wo melep mewali-wali ang karapi é matagi im pajak wo sé tou iméma' ing kamesé-meséaan?”

31Wo isowat i Yesus ai séra, “Ra'ica sé tou makaowak sama' e maperlu si dokter taan sé tou sumakit. 32Yaku mai ra'ica en tumowa sé tou wutul, taan tumowa sé tou iméma' ing kamesé-meséaan wosama' séra ro'na mape'dis.”

En andumoro' i mapuasa

(Mat. 9:14-17; Mrk. 2:18-22)

33Icua ka'i é tou Farisi itu a si Yesus, “Sé murit i Yohanes Mabaptis wo sé murit ami manaram mengapuasa wo mengasombayang. Taan kéitu réén sé murit-Mu kuman wo melep?”

34Isowat i Yesus ai séra, “Ro'na réén sé kara-karapi i pengantén tuama iru'du' muasa an tutuw i pengantén itu mewali-walipé' wo iséra? 35Taan maai oka en témpona si pengantén tuama indon é tou walina an uner éra wo asi témpo ituo séra muasa.”

36Wo icua ka'i i Yesus esa andéan a sé tou Farisi, “Ra'ica wana esa tou eng kumésé' sangakésé' kaéng ang karai weru wo itampalna ang karai matu'a. Ampa'paan eng karai weru itu tantu maléwó' wo eng kaéng sangakésé' itu ka'i ra'ica isumoma sa itampal asi karai matu'a. 37Taniitu ka'i, ra'ica wana esa tou e mumpun in anggor werupé' asi papumpunan in anggor uréo si niéma' ang kulit é binatang owo. Ampa'paan, sa en anggor weru itu sumepot, em papumpunan in anggor itu makenta'. Eng kasiwakanna en anggor itu icatiya' wo em papumpunan in anggor e niéma' ang kulit é binatang itu ka'i materi. 38Anaé, en anggor weru musti ipumpun asi papumpunan in anggor weru. 39Taniitu ka'i ra'ica wana mandé esake' tou si melepo in anggor uré wo masalé'pé' ka'i melep in anggor weru. Ampa'paan tantu icuana, ‘En anggor uré e numanamai wo in anggor weru.’ ”

Currently Selected:

Lukas 5: TNT

Highlight

Copy