Lukas 7
7
Si Yesus sumama' si ata i kikiiten é sangaatus suraro Romawi
(Mat. 8:5-13)
1Kumawusai si Yesus maroma' a sé tou keli itu wo Sia mangé ang Kapernaum. 2Am bitu, awéan si kikiiten é sanga atus suraro Romawi, makaanu esa ata si paupu-upusna. Si ata itu sumakit repet wo mepaté-patéo. 3An tutuw si kikiiten itu luminga andumoro' i Yesus, iru'du'na piraan matu'a é tou Yahudi mangé a si Yesus, mekiupus sa woo ro'na Sia mai am balé i kikiiten é suraro itu en sumama' si atana. 4An tutuw éra icateka'o mangé a si Yesus, séra wutu-wutul mekiupus ai Sia wosama' tawangen-Na si kikiiten é suraro itu. Icua éra ai Sia, “Amang, si kikiiten é sangaatus suraro Romawi itu patus tawangen i Amang, 5ampa'paan sia mengaupus sé touta tou Yahudi wo sia ka'i imanguno im balé paapo'an é agama Yahudi torona ami.” 6Wo si Yesus mangé mewali-wali wo iséra.
An tutuw Sia tawio icateka' am balé i kikiiten itu wo iru'du' na itu sé kara-karapina mangé a si Yesus, icua i perwira itu, icuao mio' in tana'i, “Tuang, nomoo makepé-kepé mai am baléku ampa'paan pawerotenku ra'ica patus aku tumerima si Tuang am baléku. 7Ampa'paano in itu aku ra'ica mangé a si Tuang, ampa'paan pawerotenku sapaoka aku ra'ica patus mai a si Tuang. Anaé, icuao mai esa nuwu'ke', tantu si ataku masama' oka. 8Ampa'paan aku awéané' kikiiten sé maperénta yaku. Wo ka'i aku, awéan suraro sé paperéntanku. Wo sa peréntanku esaan asé suraro itu: ‘Mangé!’, tantu sia mangé. Wo sa peréntanku si esa suraro: Mai!, tantu sia mai. Wo sa peréntanku si ataku, ‘Tawoien en anio'!’, tantu tawoienna.”
9Kelinga i Yesus en aicua éra andumoro' in aitaar i kikiiten é suraro Romawi itu wo si Yesus mangaya'ka' a si kikiiten itu. Wo sérén i Yesus sé tou keli makiit Sia wo icua-Na, “Icua-Ku mangé ai camu, ra'ipé' kawisa ipeta'up-Ku tou makaanu im paémanen wangko' tanu si anio' mandé ka'i an uner é tou Israel.”
10An tutuw sé tou airu'du' itu maréngo am balé i kikiiten é suraro Romawi, sérén éra si ata itu imasama'o.
Si toyaang i wéwéné balu tinou sumawel i Yesus
11Kumawus in itu, si Yesus mangé asi esa kota si makangaran Nain ang karapi é murit-Na wo sé tou keli. 12An tutuw Sia matawio im papalen wangko' ing kota, awéan sé tou makawuléng ing kalékos si pakatekelan i tou imaté. Si tou imaté itu toyaang tuama, toyaang esa-esa i wéwéné balu. Wo keli sé tou ang kota itu mawaya' mewali-wali wo si wéwéné balu itu. 13Keséré i Apo' Yesus si wéwéné balu itu, makala'us mai eng kaupusan-Na ai sia. Wo icua-Na a si wéwéné balu itu, “Inang, nomoo mengamé-ngamé'!”
14Kumawus in itu, Sia rumuru mangé ang kalékos itu, wo timboien-Na. Sé tou makawuléng ing kalékos itu makala'us mento', wo icua-Na, “Éi mangalitou, icua-Ku ai co tumooro!” 15Si mangalitou imatéo itu tumoor wo sia lumukut wo tumo'tolo maroma'. Wo iwali mangé i Yesus si mangalitou itu a si inangna.
16Pakasa sé tou am bitu maindé' wo séra rumayo wo sumiri' si Amang Kasuruan. Icua éra, “Si esa nabi wangko' an unertao! Si Amang Kasuruan imayo en lumowir sé tou-Na!” 17Wo icaseraro en abar andumoro' i Yesus am pakasa in tana' Yudea wo an li'cirna itu.
Sé rua murit i Yohanes Mabaptis mamuéi a si Yesus
(Mat. 11:2-19)
18An tutuw lingan i Yohanes Mabaptis a sé muritna andumoro' im pakasa sé niéma' i Yesus, 19wo towanna rua tou asé muritna wo iru'du'na séra mangé mamuéi a si Apo' Yesus, “Amang, si Amang réén si tou aijanjio i Amang Kasuruan maai itu? Kuma'pa tou walina e musti entoon ami?” 20Kumawus in itu sé rua murit i Yohanes Mabaptis mangé a si Apo' Yesus wo icua éra tana'i, “Si Yohanes Mabaptis guru ami, irumu'du' icami mai mamuéi a si Amang: Si Amang réén si tou aijanjio i Amang Kasuruan maai itu, kuma'pa tou walina e musti entoon ami?”
21Asi témpo itu, si Yesus sumama' sé tou keli sé membam-balinaan en sakit si méma' iséra mawendu wo musér ka'i sé roh léwo'. Sia ka'i iméma' kelian sé tou wola ro'na maséré.
22 #
Yes. 35:5-6, 61:1 Wo en ai sowat i Yesus ai séra, “Maréngo mangé a si Yohanes Mabaptis wo icuao mio' ai sia sapa sé sinéréo miow wo sé liningao miow: si tou wola maséréo, si tou késo' mawaya'o, si tou sumakit kusta masama'o, si tou wengel malingao, si tou imatéo tinou sumawel, wo en Abar Kaaruien i Amang Kasuruan ipakua-kuao a sé tou lengéi.”
23Wo icua ka'i i Yesus, “Pakakamangen sé tou ra'ica marua-rua wasa maéman a Yaku wo ra'ica icumélong Yaku.”
24An tutuw sé ayutus i Yohanes mangém, tumo'tolo sisil i Yesus a sé tou keli en andumoro' i Yohanes, “Sapa réén en torona kamu maangé a si Yohanes an tana' kapayasan? Mangé réén suméré in saraw pengéro-ngéro' in deges? 25Sapa en torona miow maangé? Suméré réén si tou mekarai in loor? Si tou mekarai in loor wo menonou ang kasiyaan itu, em paento'anna am balé i colano. 26Anaé, sapa en torona miow maangé? Suméré réén si nabi? En itu wutul, taan icua-Ku mangé ai camu, sa si Yohanes lumébé mai wo si nabi. 27#Mal. 3:1 Ampa'paan, andumoro' sia awéan en aipatic ang kitap le'nas,
‘Séréno! Airu'du'-Ku mai si utusan-Ku rumiorai ai Co,
sia oka en tumu'tul in lalan wayaan-Mu.’
28Icua-Ku mangé ai camu, asé im pakasa in tou si ai tou é wéwéné ra'ica wana en ilumébé mai eng kawangko' i Yohanes Mabaptis. Taan sé tou ipawawa-wawa' ang Kakolanoan i Amang Kasuruan, ilumébé mai eng kawangko' i Yohanes Mabaptis.”
29 #
Mat. 21:32; Luk. 3:12 Wo pakasa sé tou iluminga in aicua i Yesus, wo ka'i sé tou matagi im pajak, makua sapaoka si Amang Kasuruan itu wutul. Ampa'paan séra im baya imééo in owak em baptisen i Yohanes Mabaptis. 30Taan sé tou Farisi wo sé makailek wutul in Torat makélong im pawasa-wasan i Amang Kasuruan ang katouan éra. Sérao sé tou sé ra'ica kiim baptisen i Yohanes Mabaptis.
31Wo icua i Yesus ka'i a sé tou keli itu in tana'i, “Sapa en yandé-Ku sé tou menonou intarépé'? Maké in sapa ka'i séra itu peputé-Ku? 32Séra itu tanu sé toyaang makalukut am pasar, maangko' a sé kara-karapi éra,
‘Pasengon ami em peloit torona miow,
taan ra'ica kiim iow maéngké.
Pakantar ami eng kakantaren mala'lu,
taan ra'ica kiim iow maamé'.’
33Kamu, meputé wo sé toyaang itu. Ampa'paan an tutuw i Yohanes Mabaptis imai, sia ra'ica mengakan i roti wo ra'ica mengaelep in anggor wo icua miowke', ‘Sia rinasuk i sétang.’ 34Wo mai si Toyaang i Tou, Sia makan wo maelep, wo ipakua miow, ‘Séréno, Sia tampenganen wo tampengelepen. Sia ka'i mekarapi wo sé matagi im pajak wo sé tou iméma' ing kamesé-meséaan.’ 35Taan eng kapinteran asi Amang Kasuruan owo, kaséréan oka a sé tou sé mengaéma' in sususuien wutul itu.”
Si esa wéwéné numaam in solo mawou manam a si Yesus
36Awéan esa tou Farisi makangaran Simon, menot si Yesus eng kuman ang karapina. Wo mai si Yesus am balé i tou itu wo lumukut kuman am bitu. 37#Mat. 26:7; Mrk. 14:3; Yoh. 12:3 Ang kota itu awéan esa wéwéné si kailekano é tou, sia menonou ang kamesé-meséaan. An tutuw sia luminga sapaoka si Yesus ang karoro'an makan am balé i tou Farisi itu wo sia makala'us mai am bitu maali-ali im botel teké' niéma' am batu pualam pinumpunan in solo mawou manam. 38Wo sia mangé tumulung an somoi i Yesus an duru ing kécéi-Na. Wo sia maamé' akar eng kécéi i Yesus marames in dano im berenna. Kumawus in itu lapenna maké im buukna eng kécéi i Yesus, ciomenna eng kécéi wo naamenna in solo mawou manam.
39An tutuw i tou Farisi si menot si Yesus suméré sapa e niéma' i wéwéné itu, sia kumua an untep in aténa tana'i, “Sa Sia uli-ulit nabi, tantu kailekan-Na si séi si wéwéné itumimboi ai Sia anio' wo tantu kailekan-Na sapaoka si wéwéné itu wéwéné menonou ang kamesé-meséaan.”
40Wo icua i Yesus a si Simon, “Simon, awéan en icasalé'-Ku icua ai co.”
Isowat i Simon, “Icuao mai é Guru.”
41Icua i Yesus, “Awéan rua tou miram roit a si tou mengawéé pairaman roit. Si esa tou miram roit lima ngaatus dinar wo si esa lima ngapulu' dinar. 42Taan en doit niiram éra in dua ra'io icawaréng, akar en doit niiram éra itu ra'io pinangilekna iwaréng sumawel. Anaé é Simon, si séi ai séra in dua en lébé mengaupus a si tou pairaman roit itu?”
43Isowat i Simon, “Sa werotenku, si tou miram roit keli.”
Icua i Yesus ai sia, “En aicuamu itu wutul.”
44Wo si Yesus suméré a si wéwéné itu wo icua-Na a si Simon, “Simon, sinérémuo sapa e niéma' i wéwéné anio'? Yaku muntepai am balému, taan ra'ica aitu'tulmu rano wu'as ing kécéi-Ku tanu ing kanaramenta. Taan si wéwéné anio' rano im berenna em pinakéna e mu'as ing kécéiku wo lapenna im buukna. 45An tutuw-Ku imai, ra'ica sinungkulmu in cumiom. Taan si wéwéné anio', keuntep-Ku mai am bia'i, ra'ica mento' sia menyio-nyiom ing kécéi-Ku. 46Ra'ica ninaammu in solo mawou manam en do'kos-Ku, taan si wéwéné anio', numaamo in solo mawou manam ang kécéi-Ku. 47Icua-Ku ai co, en upusna wangko' itu, itumuru'o sapaoka eng kamesé-meséaanna sé kumeli-keli itu niampungano. Taan sa si tou niampungan wayake' im pira, eng kaupusanna ka'i wayake' im pira.”
48Wo icua i Yesus a si wéwéné itu, “Eng kamesé-meséaanmu niampungano!”
49Sé tou makalukut makan mewali-wali wo si Yesus, mawerot an até éra, “Si séi réén Sia akar eng kamesé-meséaan ro'na ampungan?”
50Taan icua i Yesus a si wéwéné itu, “Ampa'paan ko maéman a Yaku, ico linowiro. Anaé, maya'o mangé ko ang karapi in elur!”
Currently Selected:
Lukas 7: TNT
Highlight
Share
Copy
Want to have your highlights saved across all your devices? Sign up or sign in
En Taar Weru a nunuwu' é Tontemboan @ LAI 2018
