Kisah Para Rasul 4

Si Petrus wo si Yohanes an dior i Mahkamah Agama

1An tutuw i Petrus wo si Yohanes maroma' a sé tou keli wo mai sé imam, si capala mengatéir im Balé Le'nas wo sé tou Saduki.#4:1 Sé tou Saduki ra'ica mengapercaya sa sé tou imatéo touen oka sumawel. 2Sé tou itu mae'bow keli ampa'paan si Petrus wo si Yohanes masusui wo makua a sé tou keli sapaoka sé tou maéman touen oka sumawel an uner é tou imaté. 3Anaé, iru'du' éra tou en tumangka' si Petrus wo si Yohanes taan ampa'paan imawengio, si Petrus wo si Yohanes yuntep éra am bui akar i woondona mai. 4Taan an uner é tou sé iluminga in sususuien itu kelian sé maéman, akar eng kakeli éra wona' awéan lima ngariwu tuama.

5Asi woondona mai, sé kikiiten é tou Yahudi, sé matu'a wo sé makailek wutul in Torat sumidang an Yerusalem. 6An sidang itu, lumili ka'i mai si imam wangko' Hanas wo si Kayafas, si Yohanes wo si Aleksander wo sé tou walina sé icauntep an taranak é imam wangko'. 7Si Petrus wo si Yohanes isaru an dior in sidang itu. Wo tumo'tolo séra memué-muéi ai séra in dua, “Ang karapi réén ing kawasa i séi wo maké i ngaran i séi, akar kamu méma' waya in itu?”

8Si Petrus si kinawasa i Roh Le'nas sumowat ai séra, “Éi, kikiiten wo matu-matu'a é tou Yahudi! 9Sa intarépé' kami musti sidangen ampa'paan kami iméma'o in loor a si tou késo' wo kami tumerangkan ang karapi ing kawasa i séi akar si tou sumakit itu masama', 10musti kailekan iow im baya wo sé tou Israel, sapaoka si tou anio' imasama' ampa'paan ing kawasa i Yesus Kristus si tou Nazaret si aisalip iow, taan tinou sumawel i Amang Kasuruan an uner é tou imaté. Wo ampa'paano si Yesus ituo, akar si tou anio' imasama' wo ro'na makatulung an dior iow. 11#Mzm. 118:22 Si Yesus itu tanuoka,

‘Watu si aitiya' é bas im bangunan, camuo itu,

taan Sia niéma'o mamuali watu patuuran.’

12Si Yesuske' e ro'na lumowir sé tou. Ampa'paan ra'ica wana ngaran walina ang kayo'baan anio' e ro'na lumowir sé tou.”

13Wo sé tou isumidang im perkara itu mangaya'ka' an tutuw suméré si Petrus wo si Yohanes brani keli, ampa'paan kailekan éra sapaoka sé rua tou itu tou biasa wo ra'ica sumicola, wo kailekan éra sé rua tou itu makiit si Yesus. 14Taan sé tou itu ra'io toro kumua sapa-sapa en sumangkal iséra in dua, ampa'paan pakaséréno é tou itu, si tou imasama'o itu makatulungo an duru é rua ruru'du'an itu. 15Anaé, ru'du' éra kumesot sé rua ruru'du'an itu wo séra meroma' andumoro' im perkara itu 16wo kumua, “Sapa e musti émaanta a sé rua tou itu? Pakasa sé tou an Yerusalem makaileko sa séra iméma'o in tuus kakaya'kaan sé ra'io icakua wo ra'io kasangkalanta. 17Tana'io, wosama' si papaaren anio' ra'ica lébé icaserar a sé tou keli, aweso taré pangindéénta wo péronenta séra wosama' ra'io maroma' a sé tou andumoro' i ngaran i Yesus.”

18Kekawus ako in itu, iru'du' éra muntep sumawel si Petrus wo si Yohanes wo peréntan éra wosama' ra'io toro ka'i mengaroma' kuma'pa mengasusui a sé tou mengapaké i ngaran Yesus.

19Taan isowat i Petrus wo si Yohanes ai séra, “Icamuo en tumantu si wisa si wutul an dior i Amang Kasuruan, le'tek am perénta é tuang kuma'pa le'tek am perénta i Amang Kasuruan. 20Ampa'paan kami ra'ica toro mento' mengua-ngua andumoro' in sapa sé sinéréo wo liningao ami.”

21Kelinga in itu, sé tou an sidang itu makarepetke' taré mangindé' si Petrus wo si Yohanes. Taan iwekar éra sé rua ruru'du'an itu ampa'paan ra'ica kailekan éra sapa en ukuman iwéé ai séra wo ka'i maindé' a sé tou keli am bitu sé marayo-rayo si Amang Kasuruan ampa'paan si tou késo' si masama'o itu. 22Wo ka'i si tou imasama'o ampa'paan ing kakaya'kaan itu, en umurna lébéo epat ngapulu' ngata'un.

En sombayang wosama' brani masairi

23An tutuw i Petrus wo si Yohanes aiwekaro, wo séra maréng angé a sé kara-karapi éra. Wo isisil éra waya sé aicua é kikiiten é imam wo sé matu'a é tou Yahudi ai séra. 24#Kel. 20:11; Neh. 9:6; Mzm. 146:6 An tutuw é kara-karapi éra luminga waya in itu wo séra im baya mewali-wali sumombayang, “O Kasuruan si Makakawasa si méma' in langit, ing kayo'baan, in ta'sic wo pakasa sé an untepna, 25#Mzm. 2:1-2 indior, si Casuruan maroma' maké i Roh Le'nas a si Daud apo' ami, si ata-Mu, tana'i,

‘Kéitu sé bangsa ra'ica Yahudi mae'bow?

Kéitu sé bangsa mawasa-wasa si ra'ica wana torona?

26Sé kolano ang kayo'baan matu'tu-tu'tulo

wo sé kikiiten mali'uso

en sumundur si Casuruan wo si Mesias.’

27 # Mat. 27:1-2; Mrk. 15:1; Luk. 23:1, 7-11; Yoh. 18:28-29 En aicua i Daud wutul imamualio ang kota anio'. Ampa'paan si Herodes, si Pontius Pilatus, sé tou ra'ica Yahudi, wo sé tou Israel imali'uso en sumundur si Yesus, si Ata Le'nas i Casuruan, Siao si Mesias. 28E niéma' éra itu, aitantuo i Casuruan indioré'wo ciit ing kawasa wo ing kasalé'an-Na. 29Wo intarépé' é Kasuruan, séréno mai tambisa séra mangindé-ngindé' icami, wéanai kabranian kami ata-ata-Mu eng kumua in Taar-Mu. 30O Kasuruan wéanai kawasa kami wosama' kami ro'na sumama' sé tou wo ro'na méma' ing kakaya'kaan wo tuu-tuus walina ang karapi i ngaran i Yesus si Ata-Mu le'nas.”

31Makasombayangai séra, en tampa lini'usan éra itu mangéro'. Wo séra kawasan i Roh Le'nas wo tumo'tolo makua in Taar i Amang Kasuruan ang karapi wuta ing kabranian.

Eng katouan é tou maéman

32 # Kis. 2:44-45 Pakasa sé tou maéman meesa en até wo esa wewerot, ra'ica wana mandé esake' tou eng kumua sapaoka en anuna, anunake' in esa. Anaé, eng kasiyaan éra anu éra im baya. 33Wo ang karapi ing kawasa wangko', sé ruru'du'an méé kasairian andumoro' i Apo' Yesus si tinou sumawel am papaté. Wo séra im baya menonou an upus si aitambér i Amang Kasuruan si ra'io icakua. 34Ra'ica wana esa tou ai séra sé kinainaan sapa-sapa, ampa'paan sé tou e makaanu tana' kuma'pa walé, mengawangkér ing kasiyaan éra itu wo en doit em bééna in itu, 35paalin éra a sé ruru'du'an. Wo pakasa en doit yéké é ruru'du'an itu a sé tou kiit ing kaperluan i esa wo si esa.

36Taniitu ka'i si Yusuf taranak i Lewi si tumou an Siprus. Sia pengatowan é ruru'du'an ‘Barnabas’, eng kaangéanna ‘tou mengawéé ing kaketeran a sé tou walina’. 37Sia imangkér in umana wo en doit em bééna in umana itu, paalina wo wéé a sé ruru'du'an.

Currently Selected:

Kisah Para Rasul 4: TNT

Highlight

Copy