Kisah Para Rasul 5

Si Ananias wo si Safira

1Awéan esa tuama makangaran Ananias wo si penanaanna makangaran Safira. Sia wo si penanaanna imangkér in tana' éra. 2Wo en doit wééna in tana' itu, awéan sé tinang i Ananias wo awéan en aiwééna a sé ruru'du'an. Pakasa en itu kailekan ka'i i penanaanna.

3Wo icua i Petrus, “Ananias, kéitu réén en atému kinawasa i kikiiten é sétang? Ico tumowoo a si Roh Le'nas wo tinangmuke' si sangaperua im bééna in tana' itu. 4An tutuw en tana' itu ra'ipé' aiwangkér, en itu kasa in anumu, wo an tutuw ka'i aiwangkéro, en doit wééna in itu ang kakawasaanmu. Kéitu réén en atému mawasa méma' in tanu siitu? Ico ra'ica itumowoke' a sé tou taan itumowoo a si Amang Kasuruan.”

5Kelinga i Ananias in itu, sia icarepa an tana' wo maté. Wo pakasa en tou sé iluminga ing kamamualian itu, maindé' keli. 6Wo mai sé piraan mangalitou wo saputen éra ing kaéng e mayat i Ananias. Wuléngen éra kumesot wo mangé icubur.

7Wona' tiga jam kekawus in itu, muntepai si penanaanna, taan ra'ica kailekanna sapa e imamuali. 8Wo icua i Petrus ai sia, “Icua mai a yaku. Wutul réén em bééna in tana' wayake' in tana'i?”

Isowat i Safira, “Wutul, em bééna wayake' in taniitu.”

9Wo icua i Petrus ai sia, “Kéitu réén kamu in dua meesa e mangepé' si Roh i Casuruan? Sérén angé, sé tou makakuburé' mai si penanaanmu an dioro im papalen. Séra oka ka'i e muléng ico kumesot.”

10Asi témpo ituke' si Safira icarepa an dior i Petrus wo maté. Kekawus in itu, sé piraan mangalitou muntepai wo sérén éra si Safira imatéo. Wo wuléngen éra e mayatna, icesot éra e mangé icubur an duru i penanaanna. 11Wo pakasa sé jamaat wo pakasa en tou sé imakalinga in itu, maindé' keli.

Keli en tou sumakit sinama' é ruru'du'an

12Asi témpo itu, kelian tuu-tuus wo kakaya'kaan sé niéma é ruru'du'an an uner é tou keli. Wo pakasa sé tou maéman meesa en até wo tatap mali'us an Lésar Salomo am Balé Le'nas. 13Keli sé tou masiri' ai séra, taan sé tou walina ra'ica wana em brani meesa wo iséra. 14Makauré makaaweso sé tou maéman a si Apo' Yesus, awéan sé tuama wo awéan sé wéwéné. 15Sé tou sumakit iwali é tou an tembir in lalan wo itekel éra am patekelan wo an tepé. Séra méma' in taniitu wosama' sa si Petrus lumangkoi, sé tou sumakit itu ro'na katenaan im bayangna. 16Asi témpo itu mai ka'i sé tou keli ang kota-kota walina owo sé menduruan wo en Yerusalem. Wali éra mai sé tou sumakit wo sé tou rinasuk i roh léwo'. Pakasa séra imasama'.

Sé ruru'du'an aicesot am bui

17Asi témpo itu, si imam wangko' wo sé tou Saduki sé makii-kiit isia, manganat keli a sé ruru'du'an wo tindaken éra. 18Tangkaan éra sé ruru'du'an wo yuntep am bui. 19Taan asi wengi ituke', si malaékat i Casuruan mai muka' im papalen-papalen im bui wo makawali iséra kumesot. Wo icua i malaékat itu, 20“Mangém wo tumulungo ang kintal im Balé Le'nas wo isusuio mangé a sé tou en taar andumoro' ing katouan weru.”

21Matawi i mando, sé ruru'du'an itu muntep ang kintal im Balé Le'nas wo tumo'tolo masusui am bitu. Asi témpo itu ka'i an tampa walina si imam wangko' wo sé tou mengakiit sia rumu'du' sé anggota Mahkamah Agama e mali'us. Séra ituo sé matu'a é tou Yahudi sé mengasina'u. Iru'du' éra mangé mindo sé ruru'du'an itu am bui.

22Taan an tutuw sé tou airu'du' itu icateka' an untep im bui, sé rua ruru'du'an itu ra'io am bitu. Wo séra maréng angé a sé kikiiten é tou Yahudi, icua éra, 23“An tutuw ami icateka' mangé am bui, em papalen kinusi' in sama' wo sé tou makatéir an dioré' im papalen. Taan kewuka' ami im papalen, ra'io wana tou an untep.”

24Kelinga in itu, si capala matéir im Balé Le'nas wo sé kikiiten é imam mabingo-bingo oka andumoro' in itu wo séra membum-buéian wo maindé' sapa wona' e mamuali sa.

25Wo si esa tou mai ai séra wo kumua, “O tuang-tuang, sé tou ayuntep iow am bui, intarépé' ang kintalo im Balé Le'nas. Séra masusui a sé tou keli am bitu.”

Sé ruru'du'an an dior i Mahkamah Agama

26Kelinga in itu, si capala matéir im Balé Le'nas wo sé tou ipawali-walina mangé am Balé Le'nas wo mindo sé ruru'du'an itu ang karapi in sama' ampa'paan icaindé' éra oréoka séra wangkilen é tou keli im batu. 27Wo iwali éra sé ruru'du'an itu mangé isaru a Mahkamah Agama. Wo si imam wangko' tumo'tolo mamuéi a sé ruru'du'an itu, 28#Mat. 27:25 “Repeto eng kepéro ami ai camu wosama' kamu ra'io toro masusui andumoro' i Tou itu. Taan aiseraro miow en sususuien am pakasa in tampa an Yerusalem. Wo ka'i tinudu miow sapaoka, ampa'paano icami si Tou itu maté.”

29Wo isowat i Petrus wo sé ruru'du'an walina, “Kita musti male'te-le'tek a si Amang Kasuruan, ra'ica a sé tou. 30Si Amang Kasuruan si paapo'an é apo-apo'ta, Siao en tumou sumawel si Yesus si aisalip iow. 31Wo angkaien-Na mangé si Yesus ang karapi ing kama kakan-Na an tampa pasiri-siriin, wosama' sé tou Israel ro'na mape'dis wo makéré ing kaampungan ang kamesé-meséaan. 32Wo icamio e mamuali sairi andumoro' waya in itu, wo ka'i e Roh Le'nas si aiwéé i Amang Kasuruan a sé pakasa en tou sé le'tek ai Sia.”

33Kelinga in itu, sé anggota Mahkamah Agama mae'bow keli. Wo séra mawasa e maté sé ruru'du'an itu. 34Taan awéan si esa tou anggota i Mahkamah Agama makangaran Gamaliel. Sia guru in ukum Torat ang golongan Farisi wo ka'i pasiri-siriin é tou. Wo sia tumulung am bitu wo rumu'du' sé tou wosama' kumesot toyo' am bitu. 35Kekawus in itu, si Gamaliel kumua a sé kara-karapina a Mahkamah Agama itu, “Éi tou Israel, weroten angé sumama-sama' sapa en émaan iow a sé tou anio'! 36Ta'néien iow, indior awéan esa tou makangaran Teudas. Sia imangkai in owakna mamuali tou pasiri-siriin wo kelian tou e makiit isia, eng kakeli éra wona' epat ngaatus tou. Taan tutuw sia pinaté, sé tou ipawali-walina icasera-serar akar i maka'pu. 37Kekawus sia, awéan ka'i esa tou makangaran Yudas tou Galilea. An tutuw sé pemerénta Romawi méma' sensus penduduk, towan i Yudas sé tou keli e meesa wo isia en sumundur sé pemerénta Romawi. Taan eng kasiwakanna, sia pinaté wo pakasa sé makiit isia icasera-serar. 38Anaé, intarépé' icuaku ai camu, aweso taré kamu ra'ica toro méma' in sapa-sapa a sé tou itu. Iwayao mio' séra. Sa em pawasa-wasan éra wo em paémaan éra itu asé tou owo, tantu en itu maka'pu oka. 39Taan sa en itu asi Amang Kasuruan owo, ra'ica kawooan iow sumundur iséra. Ra'ica kawooan iow eng kuma'pu iséra taan taré icamu in esao wona' en sumundur si Amang Kasuruan.” Kelinga éra in itu, sé anggota Mahkamah Agama tumerima in sama' pakasa sé aicua i Gamaliel. 40Wo towan éra sé ruru'du'an itu wo tepian éra. Wo pinéro éra ka'i sé ruru'du'an itu wosama' ra'io sumusui maké i ngaran i Yesus. Kumawus ako itu iwekar éra sé ruru'du'an itu.

41Wo itela'u é ruru'du'an itu en sidang Mahkamah Agama ang karapi in arui ampa'paan weroten éra sapaoka séra nianggapo i Amang Kasuruan patus meta'up ing kawenduan ampa'paan i ngaran i Yesus. 42Wo susur in endo séra masusui am Balé Le'nas wo ka'i am balé-walé é tou wo makua in Abar Kaaruien andumoro' i Yesus, Siao si Mesias.

Currently Selected:

Kisah Para Rasul 5: TNT

Highlight

Copy