Kisah Para Rasul 3

Si Petrus sumama' si tou késo'

1Asi sangando tutuw in jam tiga im bawaando, en témpona ipengasombayang é tou Yahudi, si Petrus wo si Yohanes mangé am Balé Le'nas. 2Am bitu awéan papalen wangko', si pengatuulen ‘Papalen Loor’. Am papalen wangko' itu, awéan si esa tuama eng ketounake' mai késo'. Susur in endo si tuama itu pengawuléngen é tou weta' am bitu wosama' sia ro'na mangile-ngilek a sé tou sé mauntep ang kintal im Balé Le'nas. 3Asi témpo itu sérénna si Petrus wo si Yohanes mauntepo im Balé Le'nas wo sia mangilek roit ai séra.

4Si Petrus wo si Yohanes suméré sia wo icua i Petrus, “Séréno mai kami!”

5Wo si tou itu tuméinteng ai séra wo maara-arap e ro'na makéré sapa-sapake' ai séra.

6Taan icua i Petrus ai sia, “Yaku ra'ica wana mas wo pérak. Taan sapa si a yaku, siitu em bééku ai co: Ang karapi i ngaran i Yesus Kristus si tou Nazaret itu, tumulung wo maya'o!”

7Wo timboian i Petrus eng kama kakan i tou itu wo atasanna sia tumulung. Asi témpo ituke', em bungkélé'na makala'us masama'. 8Wo si tou itu lumo'tic wo tumulung wo menguri-nguri mawaya'. Sia kumiit wo iséra muntep am Balé Le'nas, mawaya' malo'ti-lo'tic wo ka'i marayo-rayo si Amang Kasuruan. 9Pakasa sé tou am bitu suméré sia mawaya' ang karapi i marayo-rayo si Amang Kasuruan. 10Kailekan éra sia si manaram mengalukut wo mangile-ngilek an dior im Papalen Loor am Balé Le'nas itu. Ampa'paan in ituo séra mangaya-ngaya'ka' wo menguré-ngurésé in do'kos andumoro' sapa e imamuali ai sia.

Si Petrus maroma' an lésar i Salomo am Balé Le'nas

11Si tou késo' si masama'o itu mengii-ngiit oka a si Petrus wo si Yohanes. Wo an tutuw éra in telu cateka' mangé an lésar si pengatuulen ‘Lésar i Salomo’ wo mai sé tou keli sé mangaya-ngaya'ka' itu mali'us ai séra. 12Keséré i Petrus sé tou keli itu wo icuana ai séra, “É tou Israel, kéitu réén kamu mangaya-ngaya'ka' andumoro' ing kamamualian itu? Wo kéitu réén kamu menéinte-néinteng in taniitu ai cami? Paweroten iow réén si tou anio' ro'na maya' ampa'paan ing kawasa ami in esa kuma'pa ampa'paan ing kale'tekkan ami a si Amang Kasuruan? 13#Kel. 3:15 Si Amang Kasuruan si pengaapo'an é apo-apo'ta Abraham, Ishak wo si Yakub, Siao e méma' si Yesus ata-Na itu iparayo-rayo wo pasiri-siriin. Si Yesus ituo si aisarakan iow wo aicélong iow an dior i Pilatus em patén, mandé ka'i si Pilatus e musé'o e mekar woo Sia. 14#Mat. 27:15-23; Mrk. 15:6-14; Luk. 23:13-23; Yoh. 19:12-15 Taan aicélongo miow Sia si Le'nas wo si mengaéma' im butul. Wo pinangilek iowke' si mengapaté tou si wekar. 15Sia si Le'nas itu palemboian ing katouanta pinatéo miow taan Sia tinou sumawel i Amang Kasuruan an uner é tou imaté. Kamio e mamuali sairi sapaoka Sia tumou sumawel.

16Katuusano miow si tou anio' si indior uréo késo'. Si tou sinéré miow anio' maémano a si Yesus, ampa'paan in ituo sia imasama' an dior iow im baya. En itu imamuali ampa'paan sia maéman a si Yesus.

17Poo-poow, kailekanku kamu wo pakasa sé kikiiten iow e maté si Yesus ampa'paan ra'ica kailekan iow sapa e niéma' miow. 18Ang karapi i mulur taniitu imamualio en aicua i Amang Kasuruan indior imaké sé nabi, sapaoka si Mesias si ayutus-Na musti mendam ing keli kawenduan. 19Ampa'paano in itu, itela'uo mio' eng kaléwo-léwo'an sé pengaémaan iow wo mape'diso mangé wosama' eng kamesé-meséaan iow ampungan i Amang Kasuruan. 20Wo in taniitu émaan-Na oka eng katouan iow arui wo yutus-Na si Yesus ai camu si indior aitantu-Nao mamuali Mesias iow. 21Sia itu musti mento' an sorga akar mai en témpona si Amang Kasuruan méma' im pakasa mamuali weru. Pakasa en itu aicua-Nao indioré' owo, imaké sé nabi sé sinisir-Na. 22#Ul. 18:15, 18, 19 Si Musa sumangkumo icumua in tana'i, ‘Angkaien oka i Amang Kasuruan esa Nabi ai camu owo, si esaan angé asé poo-poowta tou Israel tanu Sia imangkai yaku mamuali nabi. Lingano waya sapake' en icua-Na ai camu. 23Si séi ra'ica luminga si Nabi itu, sia itané oka an uner é tou i Amang Kasuruan wo patén.’

24Ra'ica si Musake' en icumua andumoro' Sia, pakasa é nabi tumo'tolai asi Samuel akar a sé nabi walina kekawus i Samuel, séra icumuao i nunuwu' i Amang Kasuruan andumoro' in jaman anio'. 25#Kej. 22:18 Airior érao ing kumua a sé apo-apo' miow en janji i Amang Kasuruan en andumoro' i Mesias. Wo kamu im baya makéré oka bagéan an janji itu. Indior aicua-Nao a si Abraham in tana'i, ‘Asi taranakmu oka, pakasa sé bangsa ang kayo'baan kamangen oka.’ 26Ampa'paan in ituo, si Amang Kasuruan isumisiro si Ata-Na wo yutus-Na kataré-taré ai camu wosama' Sia kumamang icamu, en lalanna tawangen-Na kamu si esa wo si esa en tumela'u ing kaléwo-léwo'an.”

Currently Selected:

Kisah Para Rasul 3: TNT

Highlight

Copy