Mbete Marki 6
6
1Zezu tɔr ke puh-aw el si puh ké-e hu̧h ké ri. Nzuk-dih fal yeri si ziŋ ni pi. 2Nam ɔkna ka̧h bale, Zezu titil firma nzuk puh yeri ɓay lák mbay Ŋgerzah ké vul misoŋ. Fe firma ye na daɓa nzukri yer. Ku ɓahri : « Sa̧w fe firma ye-ay ur ke fál suŋ le ? Ke ziŋ sam ru̧na ye ké tul ge le ? Ŋgerna-laɓ fe saŋ ye-aw ba, sa̧wu ɓa fe le ? 3A ye ke ɓa nzuk-ɓar kpuh ra ya le ? Ke ɓa gun Mari ya le ? Zak, Zoze#6.3 I mgba Mbete Matiye 13.55 tuh ke gel ki̧na-ay., Zuda, Simu, ku ɓa yi̧n yeri ya le wo ? Manah yeri ƴo ziŋ na-ay pi ya le ? »
Kandɔkaw mí ɓay Zezu zɔr law woyri. 4Mí Zezu ɓahri : « Gelri ɓoɗ ɓoɗ ku ƴo hȩk gun nzak pihna Ŋgerzah. Sa ɓa nzukri ké puh ye, nzuk in yeri, nzuk kerpuh yeri mí ku hȩk ni ya. »
5Kandɔkaw mí Zezu ziŋ ful-laɓ fe saŋri ké puh hu̧hna ye ra ya. Sa ɓa nzuk sena a haniri mí ke ɓaŋ ndɔk kan tul woyri gah niri. 6Gelɓay mba ni ɓay tul nzuk puh yeri kú-u ta ziŋ ni ya. Mí ke tɔr si puh a ɓoruri ké ɗoŋ Nasareɗ ƴo firma nzukri ɓay lák mbay Ŋgerzah ké ri.
7Zezu ɗi nzuk-dih fal ye a boh falu seɗeri gi ta̧w ye. Wara mí ke pih niri seɗe seɗe. Ke hi̧ niri ŋgerna ɓay mba tul záh tukalari. 8Zezu ɓah hi̧ niri ɓa teh-u ɓahri, kú fa̧h fe-si gahru woyri ya. Sa ɓa ka̧wkpuh sina mí kú si keni. Kú si ke fe su̧na ya, ɓɔl ɓay goŋ fe ya, lari ya. 9Wara le sabɔk ké bɔk woyri mí kú si keni. Gar a ɓoru ɓá dɔm tul gar ndohna woyri ya pi.
10Ke el ɓahri se : « Kerpuh ké mgba wuri gahru le, í na kerpuh-u ka̧h nam tɔrna woiri. Í ti̧h si ɓil puh-aw ka-kah ɓay lák mbay Ŋgerzah. 11Puh a a̧y ké sa mgba wuri gahru ya, ké sa lah nzak pihna woiri ya le, tɔrna woiri ke puh-aw, í kpoh kasal bɔk woiri sɔk keni tehɓay ɓahri, salɓay suya woyri mgbahla wuri ya. »
12Kaŋ mí nzuk-dih fal yeri tɔr si ka-kah ɓay hi̧ nzukri ɓahri, kú mbi law woyri ké tul suya ma fal el kan law tul Ŋgerzah.
13Nzuk-dih fal yeri ra ni̧h záh ké tul nzukri ɓa ŋgi̧-u. Ku suh num ku̧ tul daɓa nzuk senari mí gah niri keni pi.
14Riŋ Zezu ya̧ gelri hi̧ ɓayu toh suk mbay Eroɗ, mí ke ɓahri, Za̧h batisi mí ti̧h ke puh záh. Sa̧wu mí ke ƴo ke ŋgerna-laɓ fe saŋri-aw.
15Nzuk a ɓoruri ba, ɓahri, ɓa Eli gun nzak pihna Ŋgerzah a lewsa̧. Nzuk a ɓoruri ɓáy ɓahri, ke ɓa gun nzak pihna Ŋgerzah kandɔk gun nzak pihna Ŋgerzah a lewsa̧ri kaŋ. 16Mí Eroɗ lah ɓayu bale, ke ɓah ɓay ye ɓahri : « Za̧h ké mi hi̧ ku kuŋ tul ye mí záh ye ti̧h-aw. » 17-18Fe ké hi̧ Eroɗ kuŋ tul Za̧h ra mí na-ay : Eroɗ ya̧ Herodiya wu̧y yi̧n ye Filiɓ ké ƴo ke nun ɓáy. Mí Za̧h toŋ ɓah hi̧ Eroɗ ɓahri : « Bolkusol Ŋgerzah hah yá̧ wu̧y yi̧n wo ké hu ya ɓáy. »
Sa̧wu mí Eroɗ mgba Za̧h ŋga̧h ni si mbih ɓil vul mgbal.
19Herodiya ba, mgba Za̧h ɓu law ye. Ke yih ɓay i ni, mí ke ziŋ ful ya 20ɓayu ké Eroɗ laɓ hȩkme Za̧h. Ke tu ni ɓa nzuk-ƴo ziŋ Ŋgerzah. Ke tu ni ɓa nzuk lawpuki. Kandɔkaw mí ke kɔr ni ke nun. Gelke-e lah ɓay ké Za̧h ɓah le, ɓayu kpu-kpuh kara ke lah ɓayu ke law rihna.
21Nam a hani-u mbew dale ɓa nam pol tehna Herodiya. Namu-aw Eroɗ lek yi̧hna a bawu ɓay nam mbuŋna ye. Ke ɗi ŋgernzuk a lukiri, kumandahri, nzuk riŋ ɗinari ké tusiɓa-lak mbay ye ké Galile gi su̧ fe su̧na ti̧hmbih ziŋ ni. 22Gun Herodiya ké ɓa tikla gi nda nday ké pol Eroɗ ke gahru yeri ra bale, ndayu ndɔh nun ye ke nun gahru yeri mbamba, mí mbay Eroɗ ɓah hi̧ tikla ra ɓahri : « Fe a suŋ suŋ ké law wo yih, mú vbi mi, mi hí̧ mu. »
23Eroɗ el hah mun ye gbaɗ gbaɗ ra ɓáy ɓahri : « Fe a suŋ suŋ, mú vbi le, mi láɓ fe-u hi̧ mu. Ɓa ra puh lakna bi kara mi kéhr ke haŋsekle hi̧ mu hi̧ gaŋ. »
24Tikla ra ti̧h kala si ta̧w mah ye vbi ni ɓay fe mí ké vbi le ?
Bale mah ye ɓahri, ké vbi tul Za̧h batisi.
25Tikla ra el ke ɗukna kiriŋ gi vbi mbay Eroɗ. Sa gelaw mí ke goŋ ni ɓahri : « Mi yih ɓay í hi̧ mi tul Za̧h kan pala aŋay. »
26Law Eroɗ rih mba. Ɓay tul fe hahna ké-e hah ké pol gahruri mí ke sa vbir ɓay ye hi̧ tikla ra ya. 27Sa gelaw mí Eroɗ pih bolnzak hi̧ kú kuŋ tul Za̧h. Mí ku si kuŋ tul ye ké vul mgbal. 28Ku ɓaŋ tul Za̧h kan pala gi keni hi̧ tikla ra. A ye ba, ke ya̧ si hi̧ mah ye. 29Nzuk-dih fal Za̧hri lah ɓayu, mí ku si mbi hulu gɔr.
30Gun nzak pihna Zezu a boh falu seɗeri el ke gel ka-kah ɓay lák mbay Ŋgerzah gi mbu̧h hani ké ta̧w Zezu. Ku ki̧ fal ɓayri gbam hi̧ ni, ɓay fe laɓna woyri ke fe firma ɓay Ŋgerzah kú-u firma nzukri pi. 31Ké gelaw nzukri ɓa ŋgi̧-u toŋ gi fal hani fal hani ma ta̧w woyri. Nzuk ginari, nzuk elnari ƴo gi-u hi̧ Zezu ke nzuk yeri ziŋ ful-su̧ fe ya. Mí Zezu ɓah hi̧ niri ɓahri : « Náh tɔr wuri si gel ké nzukri ta-a le, í ɔk mun woiri ndi̧. »
32Mí ku hil kumbon, ku tɔr si gel a ɓoru ké nzukri ta ri ya. 33Daɓa nzukri ko tɔrna woyri. Ku tu niri, mí ku ur ke ɗukna ɗukna ke puhri ɓoɗ ɓoɗ si ka̧h gelu pol. 34Zezu ke nzuk-dih fal yeri ba, ka̧h. Ti̧hna woyri ke ɓil kumbon, Zezu ko daɓa nzukri ké ŋgi̧ mbamba-aw. Mí ku baseh ké nun ye ɓay fe le, ku na kandɔk sami ké nzuk-kɔr niri ta-a. Wara mí ke firma niri ɓay lák mbay Ŋgerzah ɓa ŋgi̧-u.
35Seh yekre bale, nzuk-dih fal yeri loh ma ta̧w ye ɓahri : « Gelay ɓa ɓil suy. Seh ƴo riŋna. 36Mú sel nzukri-ay ɓá tɔr si puhri ké ɗoŋ niri-ay, kú yeh fe su̧na, kú su̧. »
37Bale Zezu ɓahri : « A woiri gaŋ, í hi̧ niri fe su̧na, kú su̧. »
Nzuk-dih fal yeri ɓahri : « Náh fa̧h ra sak sɔɗ sɔɗ seɗe si yeh keni fe su̧na wal niri ndi̧ ndi̧ kara ta mah niri ya. »
38Bale Zezu ɓahri : « Peŋ ka̧h ani mí na ta̧w woiri le ? Í si ko. »
Ku si ko peŋ ɓa ndiɓi, nzuy ba, ɓa seɗe, mí ku sɔk Zezu.
39Zezu hi̧ bolnzak hi̧ nzuk-dih fal yeri ɓahri, kú hi̧ nzukri ɓá mgba hani kaɓ siɓa zuɓ zuɓ. Ké gelaw suy loŋ ri mbula su kaɓna. 40Nzuk-dih fal yeri hi̧ nzukri kaɓ siɓa zuɓ zuɓ, nzuk a sɔɗri ke nzuk a bon ndiɓiri.
41Zezu ya̧ peŋ ké ndiɓi ke nzuy ké seɗe ra, ke ɔr nun ma síɓa, mí ke lu mgbɔkɔ ku̧ tulu. Ke gɔh peŋ ra hi̧ nzuk-dih fal yeri wal hi̧ nzukri su̧. Ke wal nzuy ké seɗe ra hi̧ nzukri riw pi. 42Nzukri riw su̧ fe mbah ɓil woyri poŋ tɔru. 43Ku mbu̧h tɔr peŋ ké toŋ ke tɔr nzuy ra mbah tɔlɔ ɓa boh falu seɗe. 44Nzukri ké su̧ fe ra, ku ki̧ wo̧rori ɓa sɔɗ sɔɗ boh gel ndiɓi (5.000).
45Ku mbu̧h tɔr fe su̧na. Sa gelaw mí Zezu hi̧ bolnzak hi̧ nzuk-dih fal yeri ɓahri, kú rih ɓil kumbon, kú tɔr pol ma kala mahmbih ké Beɗsayda. A ye ba, ke toŋ fal ƴo vbar nzukri ɓá tɔr. 46Ke vbar niri, mí ke tɔr si tul kasaw ƴo ɓah ɓay ziŋ Ŋgerzah. 47Seh riŋ, mí kumbon ƴo ɓa ɗih-u ka̧h haŋsekle mahmbih. A ye Zezu ra, ke ƴo fal ke hȩk ye. 48Zezu ko nzuk-dih fal yeri ta̧h hehre kumbon ma pol kpu̧y ɓayu ké kuna nzɔh nun woyri mí fa̧h mbih vba̧ kumbon gbɔksɔ gbɔksɔ. Tipele toŋ ɗih ya mí ke si sina tul mbih ma ta̧w woyri. Ke si, mí ke yih ɓay ka-kal. 49-50Nzuk-dih fal yeri ɓá ko ni, ké-e si sina tul mbih le, ku ker ɓahri se, záh mbih munu. Mí gbam woyri vba̧ nzak kululu kululu ɓayu kú-u ko ni, mí tul woyri fa̧h zikiki zikiki. Sa gelaw mí Zezu ɓah hi̧ niri ɓahri : « Í su̧h law. A bi munu. Í laɓ hȩkme ya. »
51Zezu hil kaɓ ɓil kumbon ziŋ niri. Kuna tuk, mí gosoɓay zi nzuk-dih fal yeri zi-zi. 52Law woyri kpuh mbamba. Ku tu sa̧wɓay peŋ ké nzukri su̧ ra ya.
53Ku ka̧h kala mbih ké tusiɓa Genesareɗ. Ku ŋga̧h kumbon ké ɓel sew. 54Ku ti̧h ke ɓil kumbon. Sa gelaw mí nzukri ko ni ɓa a ye Zezu. 55Mí ku ur ke ɗukna si ka-kah ɓay gina ye ɓil puhri gbam ké ɗoŋ niri. Wara mí nzukri suk nzuk senari gi gel ké-e ƴo ri. 56Gelri riw ké-e si ri, ɓa ra puh a lukiri mini gun puhri kara nzukri suk nzuk senari si ku̧ ndiseŋe, mí ku ɗi Zezu ɓá gi ɓay hi̧ nzuk senari ɓá za nzak gar ye ndi̧ le, kú ziŋ mun gahna. Nzuk sena a suŋ suŋ ké za nzak gar ye le, ti̧h ke ndɔk hul ti̧-ti̧h.
Currently Selected:
Mbete Marki 6: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
