Mbete Marki 5
5
1Ku ka̧h kala mahmbih Galile ké tusiɓa nzuk Geraziri. 2Zezu ɗer ke kumbon. Sa gelaw mí nzuk a hani ti̧h ke gel-gɔr hulri gi nzɔh nun ye. Nzuku, záh ƴo tul ye. 3Gel nam ye ɓa gel-gɔr hulri. Mahful-ŋga̧h ni ta-a. Sal lari kara mah ɓay ŋgah ni ya pi. 4Kpatara ku ƴo ŋga̧h ndɔk ye ke sal lari. Bɔk ye ba, ku mgba ke ɗah. Ke ɗɔr sal lari ké ndɔk ye. Ke el nduk ɗah haw. Nzuk mbew ké mah ɓay mgba ni kaɓ ɗeŋ ta-a. 5Suŋ ke seh ke ƴo ha̧rma si tupal ke tupal ké tul kasaw. Ke vba̧ nzak ziriri ziriri. Ke ƴo kpa̧r mun ye ke kasaw.
6Nzuku ɓá ko Zezu ɓa ɗih-u bale, ke ɗuk si huk pol ye. 7Kusol nzuku ahla rew. Ke vba̧ nzak ɓeleŋ : « Zezu, gun Ŋgerzah ké deɓ ye ta-a, ɓay wo ɓa fe mí ziŋ mi le ? Mi hah fe ke riŋ Ŋgerzah, mú laɓ mi koseh ya. » 8Záh tukala-aw ɓah kaŋ ɓayu ké Zezu ƴo ɓah hi̧ ni ɓahri se, ké ti̧h ke tul nzuk ra. 9Mí Zezu vbi záh ra riŋ ye. Záh ɓahri : « Riŋ bi ɓa Ŋgi̧ŋgi̧ ɓay fe le, nah sɔɗ sɔɗ boh gel ŋgi̧-ŋgi̧. »
10Ke el vuh hi̧ Zezu ke kɔkrɔya, ké ni̧h niri ɓa ɗih-u ké tusiɓa ya.
11Ké haŋ kasaw ké na ɓel woyri mí daɓa kɔsɔŋri ƴo ƴah ri lakna. 12Mí záhri ra vuh hi̧ Zezu ɓá hi̧ niri kú si rih tul kɔsɔŋri-aw. 13Kaŋ mí Zezu poŋ ful hi̧ niri, mí záhri ti̧h si rih tul kɔsɔŋri-aw. Kɔsɔŋri ra laɓ sɔɗ sɔɗ boh gel seɗe (2.000) mí kpa̧h ke ɗukna si ka̧h nzak hereŋ lih ku̧ mahmbih kirim kirim mí mbih kal niri ndu̧y. 14Nzuk-kɔr kɔsɔŋri ba, su ɗukna si puh, mí ku ndazi ɓay feri ké kal hi̧ ɓayu ya̧ puh a luki ke gun puh a ɓeluri, mí nzukri ti̧h yir gi. 15Ku ka̧h ta̧w Zezu. Mí ku ko nzuk ké Ŋgi̧ŋgi̧ri ti̧h ke tul ye ra kaɓ ɗeŋ ɓa nzuk wara. Ke ndoh gar ɓa suki. Kerɓay ye na ɓa suki. Mí hȩkme el se niri. 16Nzuk-kɔr kɔsɔŋri ki̧ fal fe kú-u ko ke nun woyri hi̧ nzukri, ɓay nzuk ké záh ti̧h ke tul ye, ɓay kɔsɔŋri ra pi. 17Wara mí nzukri laɓ kɔkrɔya hi̧ Zezu ɓay ké tɔr ke tusiɓa woyri. 18Zezu hil kumbon ɓay tɔrna le, nzuk ké záhri ti̧h ke tul ye ra vbi ni ɓay si ziŋ ni pi. 19Mí Zezu sa-a. Wara le ke ɓahri se : « Mú el si puh ké ta̧w nzuk wori. Mú ki̧ fal fe sukiri riw ké Gaŋ tul feri riw laɓ ziŋ mu hi̧ kú lah. Mú ndazi ɓay in ké-e mgba ziŋ mu pi. »
20Kaŋaw mí nzuk ra tɔr si ka-kah ɓay sukiri gbam ké Zezu laɓ ziŋ ni hi̧ nzukri ké tusiɓa Dekapol lah mí na nzukri riw ɓa saŋ hi̧ ku kaɓ yer ɓayu.
21Zezu el ke kala mahmbih. Daɓa nzukri ɓa ŋgi̧-u geŋ ni ƴo ɓel mahmbih, mí ku mbu̧h ké ta̧w ye. 22Ŋgernzuk vul misoŋ a hani-u mbew gi. Riŋ ye ɓa Zayrus. Zayrus ɓá ko Zezu le, ke huk siɓa pol ye. 23Ke vuh seh ɓahri, gun ye a wu̧yu na nun hul. Zezu ɓá si ɓaŋ ndɔk kan tul ye ɓay ya̧ ni le, ke káɓ ɓa suki.
24Mí Zezu si ziŋ Zayrus. Daɓa nzukri ɓa ŋgi̧-u dih fal ye. Nzukri nzu̧h hani nzuturu ké ta̧w Zezu. 25Wu̧y a hani-u ƴo sakra daɓa nzukri-aw. Sem ƴo ti̧h ke ɓil ye laɓ mbihmbam boh falu seɗe kari da. 26Ke ko seh ɓa ŋgi̧-u ké ta̧w dɔktari. Ke ɔh ŋgerna ye gbam ɓay ziŋ mun gahna, mí ke ziŋ ya dih. Wara le sena-u el su ya ma pol pol. 27Wu̧y ra lah mberem fe laɓna Zezu, ke rih sakra daɓa nzukri-aw, mí ke si ke fal Zezu za nzak gar ye. 28Ke ɓahri se : « Gel ké mi za ké mun ye, ɓa ra nzak gar ye kara mi tí̧h ke ndɔk hul. »
29Sa gelaw mí ke gi za nzak gar Zezu ba, sem ké ti̧h ke ɓil ye ra kuŋ nzeɗ ba. Wu̧y ra tu ɓahri se, sena ye ɔh da. 30Sa gelaw mí Zezu tu ɓahri, ŋgerna ti̧h ke mun ye. Ke sɔɓ nun ye ké haŋsekle daɓari. Ke ɓahri : « A ge mí za gar bi-ay le ? »
31Nzuk-dih fal yeri ɓahri : « Daɓa nzukri ké nzu̧h hani ta̧w wo-ay, mu ko ya wa, ani mú-u ɓahri, a ge mí za mu le ? »
32Zezu ko gel ɗoŋ ɓa koro koro ɓay ko nzuku. 33Hȩkme laɓ wu̧y ra, mun ye to kpak kpak. Ke tu mun gahna ké-e ziŋ bale, ke ti̧h gi huk pol Zezu. Ke ɓah ketina ye gbam.
34Zezu ba, ɓahri : « Gun bi, law wo ké te sa tul bi-ay ya̧ mu ke ndɔk hul ya̧-ya̧. Mú si ke ɗeŋ. Mú ƴo ke mun gahna kew kew. »
35Zezu ƴo ɓah ɓay kɔɓ ɓáy bale, nzukri gi sɔk Zayrus ŋgernzuk vul misoŋ ra ɓahri, gun ye hu da. Ké zɔklɔ metere ra mba.
36Ɓayri kú-u ɓah ɓá toh suk Zezu bale, ke ɓah hi̧ Zayrus ɓahri : « Law wo ɓá lu ya. Law wo ɓá ƴo mbew ɓa kpuh-u. »
37Zezu gboh nzukri sí ziŋ ni. Sa ɓa Piyer ke Zak ke yi̧n ye Za̧h mí ke hi̧ niri si ziŋ ni ke bah gun ra. 38-39Ku ka̧h kerpuh ŋgernzuk vul misoŋ ra. Ku lah fe haŋnari, rewri, vbá̧ nzakri ɗik ɗik. Mí Zezu ɓah hi̧ nzukri-aw ɓahri : « Ɓay fe mí i vuh rew, i vba̧ nzak kari-ay le ? Gun ra hu ya. Wara le ke na nam kaŋto. »
40Mí ku sak ni gbaw. Zezu ba, ni̧h niri riw ti̧h kala. Bah gun ke mah gun ke nzuk-dih fal yeri ké say ra, mí ke hi̧ niri rih ziŋ ni ɓil vul ké hul ra ɓu ri. 41Ke mgba ndɔk hul ɓahri : « Talita kumi. »
Ɓayaw yih ɓahri : « Gun tikla-ay, mú el gi, mú ur síɓa. » 42Sa gelaw mí tem gun tikla ra el gi gaŋ ba, mí ke ur síɓa. Ke si sina. Mbihmbam gun tikla ra laɓ boh falu seɗe. Mí kerɓay nzukri ké ƴo vulaw laɓ niri ɓa fe saŋ. 43Mí Zezu ɓah ɓa teh-u le, el ɓah ra ɓáy hi̧ niri ɓahri, kú ɓah ɓayu hi̧ nzuk ya. Ke el ɓahri, kú hi̧ gun tikla ra fe su̧na, ké su̧.
Currently Selected:
Mbete Marki 5: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
