Mbete Fe laɓna Tempuki 9
9
Ŋgermbay ɗi Sɔl si ka-kah ɓay ye
1-2Ke sewu-aw, Sɔl ra toŋ laɓ nzukri ké dih fal Gaŋ tul feri riw koseh ɓa ŋgi̧-u. Ke ker ɓahri, ke í niri i. Mí ke ur si ta̧w ŋgernzuk fe puhna vbi ni ké vbeh mbete hi̧ ni ful rih ɓil vul misoŋ ziɓri ké Damas. Gelke-e ziŋ wo̧ronzuk mini wu̧ynzuk ké ko Zezu ɓa mahful le#9.1-2 Ɓay tu ɓay mahful, í ki̧ Mbete Za̧h 14.6., ke mgbá niri ŋga̧h gi keni Zurusalem. 3Sɔl ya̧ mbete ra, ke mbi mahful. Ke toŋ ɗih ya ɓay ka̧h Damas dale, gel teh gberere kandɔk sakna mbam gi ɗoŋ tul ye gbuk. 4Mí ke lih gbirik vbu siɓa. Le ke lah kusol nzuk ɗi ni ɓahri : « Sɔl, Sɔl ma, ɓay fe mú-u faŋ bol bi ƴo laɓ mi koseh kari-ay le ? »
5Sɔl vbi ni ɓahri : « Mbay, i ɓa ge le ? »
Mí ke ɓahri : « Mi ɓa Zezu ké mu faŋ bol bi ƴo laɓ mi koseh ra munu. 6Ur síɓa. Mú rih ɓil puh-aw gaŋ. Mu láh fe ké mu ɓay laɓu ɓáy. »
7Bɔh gahru Sɔlri ta̧h ƴo silili. Ku lah kusol mí ku ko nzuku ya. 8Mí Sɔl ur síɓa. Nun ye mgbu-mgbur kara, ke ko gel mba. Mí ku mgba ndɔk ye, ku maŋ ni si ka̧h Damas. 9Laɓ nam say, ke kaɓ ɓa ra̧w. Ké ɓil namawri, ke su̧ fe ya, ke nzo mbih ya pi.
10Ké ɓil Damas ra, nzuk-dih fal Ŋgermbay a hani-u ƴo ri. Riŋ ye ɓa Ananiya. Gaŋ tul feri riw ti̧h nun ye. Ke ɗi ni ɓahri : « Ananiya. »
Ananiya yih nzak ye ɓahri : « Gaŋ bi, mi ƴo-ay. »
11Gaŋ tul feri riw el ɓah hi̧ ni ɓahri : « Ur síɓa. Mú mbi ful ké haŋsekle puh kú-u ɗi ɓa mahful a ndaru. Mú si ka̧h kerpuh Zuda. Mú vbi nzuk Tarsi kú-u ɗi ni ɓa Sɔl. Mú ko, ke ƴo goŋ Ŋgerzah. 12Ké ɓil goŋna ye-ay, mi hi̧ ni ke ko fe. Ke ko mu Ananiya rih tul ye ɓaŋ ndɔk kan tul ye, mí ke el ko gel ɓáy. »
13Mí Ananiya el ɓahri : « Gaŋ bi, mi lah ɓay gun wo̧ro-aw ké nzak nzukri ya̧h ya̧h. Ku sɔk mi ɓahri, ke laɓ sa̧wnzuk wo ké Zurusalem koseh. 14Mí gina ye gelay kara, ke gi ke mbete ké ŋgernzuk fe puhna ke nzuk yeri vbeh hi̧ ni ɓay mgba nzuk a suŋ suŋ ké kan law tul wo ɓahri, mu ɓa Gaŋ ye. »
15Gaŋ tul feri riw ɓah hi̧ Ananiya ɓahri : « Mú si ɓay fe le, mi lu ni ɓa nzuku a bi. Ke si sɔ́k tehɓay riŋ ɗina bi par par hi̧ sa̧wnzukri ke mbay woyri ke gun Izarayelri pi. 16A bi gaŋ mí-i sɔ́k ni kosehri riw ké-e mah ɓay ko-u le, ke hí̧ riŋ ɗina bi mgbe ké sakra nzukri. »
17Bale Ananiya tɔr si rih tul Sɔl ké kerpuh Zuda. Ke ɓaŋ ndɔk kan tul ye. Ke ɓahri : « Yi̧n bi Sɔl. Gaŋ tul feri riw, a ye Zezu ké ti̧h tul wo ke mahful gina wo ra, ke pih mi ɓay mú el ko gel, ke pih mi ɓay Tempuki ɓá ya̧ mun wo gbam pi. »
18Sa gelaw mí fe ga̧y ke nun Sɔl eŋ hoy nzuy ku̧ siɓa. Ke el ko gel. Ke ur síɓa, mí ke ti̧h mbih batem. 19Ke su̧ fe, ke ziŋ ŋgerna.
Sɔl kaɓ ziŋ nzuk-dih fal Ŋgermbayri ké Damas nam mah fe. 20Ke geŋ ya, mí ke si sɔk ɓay riŋ ɗina Zezu hi̧ nzukri ɓil vul misoŋ woyri ziɓri ɓoɗ ɓoɗ ɓahri se, Zezu ɓa gun Ŋgerzah gaŋ. 21Ziɓri riw ké lah ɓay ɓahna ye kaɓ yer, ku ɓahri : « Ɓa a ye-ay ké-e sɔk nun seh nzuk Zezuri ké Zurusalem ra, mí ke gi gelay ɓay mgba nzukri ké riŋ nzukaw kan tul woyri ɓay si keni hi̧ ŋgernzuk fe puhna ke nzuk yeri, ya le wo ? »
22Mí Sɔl ziŋ ŋgerna ma pol pol, mí ke sɔk tehɓay Ŋgermbay hi̧ ziɓri ké kaɓ Damas. Ku ziŋ ful mba ni ke ɓay ya. Ke sɔk niri ke gelu gelu ɓahri, Zezu ɓa Ŋgermbay ké Ŋgerzah mbi ni ɓa mbay gaŋ. 23Laɓ nam mah fe ké Sɔl toŋ sɔk niri ɓay, mí ziɓri mbu̧h hani lek ɓay i ni. 24Ku ƴo kɔr nzak mahfulri ké ti̧h ke ɓil puh Damas gbam suŋ ke seh ɓay mgba ni i ni. Lekɓay woyri toh suk Sɔl. 25Gel ɓa suŋ, nzukri ké lah ɓay Sɔl mbi ni kan ɓil tɔlɔ. Ku ŋga̧h nzak tɔlɔ ra ke sal ɗer ni keni kan fal ila, mí ke tɔr.
26Sɔl el si Zurusalem. Ke ƴah ful ɓay mbu̧h ziŋ nzuk-dih fal Ŋgermbayri, mí riw woyri ku ɗuk ni ɗuk. Ku ɓahri, ke ɓa nzuk-dih fal Ŋgermbay a ketina ya. 27Barnabas mí ya̧ ni#9.27 Ɓay tu ɓay Barnabas, í ki̧ Mbete Fe laɓna Tempuki 4.36,37; 11.22.. Ke maŋ ni si keni ta̧w gun nzak pihna Ŋgermbayri. Ke ndazi ɓay ti̧hna ké Gaŋ tul feri riw ti̧h nun Sɔl ké ful Damas, ke sɔk ɓay ké Ŋgermbay ɓah hi̧ Sɔl dara mí ke ɓay fe sɔkna ké Sɔl sɔk ɓa teh-u ra ke riŋ Zezu hi̧ nzukri ké Damas lah pi. 28Kaŋ mí Sɔl ziŋ ful mbu̧h ziŋ niri mbew. Ke ha̧rma ziŋ niri ké Zurusalem dan fe zɔklɔ. Ke sɔk ɓay ɓa teh-u ke riŋ Gaŋ tul feri riw hi̧ nzukri lah. 29Ke lu mberem ziŋ ziɓ a ɓah nzak gerekri. Ke fah ɓay ziŋ niri pi. Mí a woyri ba, ku ƴah ful ɓay i ni. 30Ɓayu toh suk yi̧n yeri ɓil Ŋgermbay bale, ku maŋ ni si ka̧h Sezareh hi̧ ni ke tɔr ma Tarsi. 31Kandɔkaw, sa̧w nzuk Ŋgermbayri ké kaɓ tusiɓa Zude, Galile ke Samari riw, ku kaɓ ɗeŋ wara. Ŋgerzah hi̧ niri ku ƴo hu̧h ɓa vul gel ƴona ye. Ku ƴo hȩk Gaŋ tul feri riw ma pol pol ɓil siŋ sina woyri. Ku ƴo hew haniri ɓay tumbɔl Tempuki pi.
Piyer ha̧rma puhri ɓoɗ ɓoɗ ɓay ko gun Ŋgermbayri
32Ke sewu-aw, Piyer si ke puh puh ɓay ko sa̧wnzuk Ŋgerzah. Ke ka̧h ké Lida pi. 33Ké ri, ke ziŋ wo̧ronzuk a hani. Riŋ ye ɓa Ene. Mun ye hu yɔh. Ke na sena-u mbihmbam toŋndɔk seɗe. 34Piyer ɓah hi̧ ni ɓahri : « Ene, Ŋgermbay Zezu gah mu da. Ur síɓa. Mú kah hih wo. »
Sa gelaw mí, ke ur síɓa. 35Ur ke Lida ka̧h puh a ɓoruri ké tusiɓa Saroŋ riw, nzukri ko nzuk sena ké ziŋ mun gahna bale, ku poŋ fal fe laɓna suya woyri el kan law tul Gaŋ tul feri riw.
36Ké Zope, wu̧y a hani ƴo ri. Ke ɓa nzuk-dih fal Ŋgermbay. Riŋ ye ɓa Tabita. (Ke sa̧w nzak gerek le, ɓa Dorkas#9.36 Dorkas yih ɓahri, sam nay a hani-u kú-u tu ni ɓa ɓoro. .) Ke ƴo laɓ fe suki ŋgi̧ mbamba, ke ƴo mgba in ziŋ nzuk sehri kpatara. 37Ke seh-u-aw, mun ye gi se ni. Ke ta̧h sɔrɔrɔ, mí ke hu. Ku soh ni mbih, mí ku mbi ni si kan ɓil vul fál síɓa vul-ka̧y tul hani. 38Kandɔk ké Lida ɗih ya ke Zope, nzuk-dih fal Ŋgermbayri ké Zope lah ɓahri, Piyer ƴo Lida. Mí ku pih nzukri seɗe si ɗi ni ɓay ké gi ɓa gah-u, ké kaɓ sal sal ya. 39Piyer ur si ziŋ niri. Ka̧hna ye bale, ku maŋ ni si ɓil vul fál síɓa vul-ka̧y tul hani ra. Wu̧y kaŋpeleri gbam gi ɗoŋ Piyer ke rew, ku kazi ɓayri. Ku sɔk ni gar haŋri ke mah gar-ri ké Dorkas kaŋ hi̧ niri. 40Piyer ten nzukri gbam ma kala dara mí ke huk siɓa goŋ Ŋgerzah. Ke el sɔɓ nun ye ma tul hul ra, mí ke ɓahri : « Tabita, ur síɓa. »
Hul ra mgbur nun ye ko Piyer, mí ke ur kaɓ síɓa. 41Piyer mgba ndɔk ye ɔr ni ƴo síɓa. Ke ɗi wu̧y kaŋpeleri ke sa̧wnzuk Ŋgerzah a ɓoruri, mí ke sɔk niri Dorkas ké el kaɓ ke nun wara. 42Ɓayu ya̧ gel ya̧h ya̧h ké Zope bale, nzukri ɓa ŋgi̧-u kan law tul Gaŋ tul feri riw. 43Piyer kaɓ Zope nam ro-ro. Ke na puh Simu nzuk-gbak ho̧ko#9.43 Pihna nzuk-gbak ho̧ko ɓa poŋ ho̧ko ke poko ɓay hi̧ pirma-u ɓá ga̧y le, ke voŋ ho̧ko ɓa teh-u ɓay sa̧h feri keni..
Currently Selected:
Mbete Fe laɓna Tempuki 9: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
