Mbete Fe laɓna Tempuki 10
10
Piyer ko sa̧w nzuk a ɓoru ti̧h ɓa sa̧wnzuk Ŋgerzah
1Ké Sezareh, nzuk a hani-u mbew ƴo ri. Riŋ ye ɓa Kɔrne. Ke ɓa kumandah ké sakra nzuk ŋgermu Italiri. 2Law ye te sa tul Ŋgerzah, a ye ke nzuk kerpuh yeri gbam. Kpatara, ku ƴo hȩk Ŋgerzah#10.2 Kɔrne sɔɓ mun ye ɓa ziɓ ya, ke kuŋ ndi̧w ya. Keni-aw kara ke ƴo hȩk Ŋgerzah ziɓri., ke ƴo so ziɓ a a̧yri ké ƴo ɓil koseh, ke ƴo goŋ Ŋgerzah pi. 3Sa̧wseh-goŋ Ŋgerzah a bɔklew ka̧h#10.3 Ɓay tu ɓay sa̧wseh-goŋ Ŋgerzah a bɔklew, í ki̧ Mbete Fe laɓna Tempuki 3.1., ke ƴo goŋ Ŋgerzah bale, tem nzak pihna Ŋgerzah ti̧h nun ye ɗi ni ɓahri : « Kɔrne. »
4Hȩkme mbah law ye, ke ko kona ka̧ah ma tul tem nzak pihna ra, mí ke ɓahri : « Mbay bi, mi ƴo lah mu. »
Tem nzak pihna ra yih nzak ye ɓahri : « Ŋgerzah yȩkre mu ya. Ke lah goŋna wo lah, fe sukiri ké mu laɓ hi̧ nzuk sehri ra rih law ye rih. 5Aŋay, mú pih nzukri si Zope kú ɗi Simu ké riŋ ye a ɓoru ɓa Piyer ké gi. 6Ke na kerpuh gɔlɔ ye Simu nzuk-gbak ho̧ko. Puh Simu ra na ɓel mahmbih. »
7Tem nzak pihna tɔr bale, ke ɗi gun kaɓna yeri seɗe ke soze mbew ké haŋsekle sozeri ké ƴo kɔr ni. Soze ra ɓa nzuk-hȩk Ŋgerzah. 8Ke ndazi ɓay ké tem nzak pihna ɓah hi̧ ni ra riw, mí ke pih niri ɓay kú si Zope.
9Tipele-u, ku ƴo tul ful kɔɓ ɓáy. Ku toŋ ɗih ya ɓay ka̧h Zope. Seh ƴo tul puh, Piyer ba, hil si kaɓ huh tem kú-u roŋ na tul vul, ke ƴo goŋ Ŋgerzah ké ri. 10Ɗaka i ni. Ke yih su̧ fe. Ku ƴo kar fe su̧na hi̧ ni, mí Ŋgerzah hi̧ ni ke ko fe ɓa lɔlɔ. 11Ke ko nunmbam mgbur, ke ko fe eŋ gar ɓa ah-u borol. Ku mgba ti̧w garu niŋ ɗer gi tusiɓa. 12Ké ɓilu-aw, ke ko nayri ke hay sa̧y kuhru ke selhaŋri ke gundoyri pi. 13Bale ke lah kusol nzuk ɓah hi̧ ni ɓahri : « Piyer, ur síɓa. Mú i, mú su̧. »
14Piyer ɓahri : « Mbay, kaŋ ya ! Bɔk mbew bi gel-su̧ hay ké mah nun Ŋgerzah ya, hay a kala ké bolkusol Ŋgerzah gboh su̧-u pi#10.14 Ɓay tu ɓay nayri ké Ŋgerzah hi̧ ziɓri su̧ le, í ki̧ Mbete Lévitique 11.. »
15Mí kusol ra el ɓah a bɔk seɗe-u hi̧ ni ɓahri se : « Fe ké Ŋgerzah ko mah nun ye ra, mú ko ɓa fe a kala ya. »
16Fe-u laɓ kaŋ bɔk say bale, gar ra ba, el ma nunmbam.
17Piyer ƴo fakla sa̧wɓay lɔlɔ-ay bale, gun nzak pihna Kɔrneri ké ku ƴah puh Simu ra ka̧h. Ku ƴo polkɔkɔ. 18Ku ɗi fe ɓa mgbe-u ɓay tu ɓahri, Simu kú-u ɗi ni ɓa Piyer na gelay gaŋ le ? 19Law Piyer ƴah ɓay ɓoɗ ɓoɗ ké tul lɔlɔ ra, mí Tempuki sɔk ni ɓahri : « Mú ko. Nzukri say ƴo ri-aw. Ku ƴo ƴah mu. 20Ur síɓa, mú ɗer. Mú tɔr ziŋ niri. Kerɓay sa̧w wo ɓá zɔklɔ mu ya ɓay fe le, ɓa a bi mí-i pih niri munu. »
21Mí Piyer ɗer. Ke si ta̧w nzukri ra. Ke ɓah hi̧ niri ɓahri : « Mi ƴo-ay. Mi ɓa nzuk ké i ƴo ƴah-u. Sa̧wɓay ƴahna ké i ƴah mi ra ɓa fe le ? »
22Ku yih nzak ye ɓahri : « Kumandah Kɔrne mí pih na. Ke ɓa nzuk ké ƴo hȩk Ŋgerzah. Ke ɓa nzuk a ketina. Ziɓri gbam ɓah lakna ɓay ye. Mí tem nzak pihna Ŋgerzah sɔk ni ɓahri, ké ɗi mu, mú si puh ye ɓay ké lah ɓay fe sɔkna wo. »
23Bale Piyer ya̧ niri. Ku na ta̧w ye. Tipele-u, ke tɔr ziŋ niri. Yi̧n Piyer a haniri ɓil Ŋgermbay ké Zope ɓaŋ ni si Sezareh pi.
24Kɔrne ba, ɗi nzuk in yeri ke ya̧h ye a a̧yri ké-e tu niri ɓa teh-u. Ku kaɓ geŋ gina Piyer. Pelah-u mí Piyer ke gun nzak pihna Kɔrneri ka̧h Sezareh. 25Ka̧hna woyri, Kɔrne nzɔh nun Piyer. Ke guɓ siɓa dim ni. 26Mí Piyer ɔr ni ɓahri : « Mú ur síɓa. A bi kara mi ɓa nzuk pirmatul pi. »
27Ku lu mberem si rih keni ɓil vul dale, Piyer ndukru daɓa nzukri mgbim ké mbu̧h geŋ ni. 28Mí ke ɓahri : « A woiri i tu te-teh, mahful ɓay hi̧ ziɓri ɓá mgba bɔh sina ziŋ sa̧wnzuk a ɓoruri ta-a, kaɓ ziŋ niri kara ta-a pi#10.28 Í mgba gel ki̧na-ay tuh ke gel ki̧na Mbete Za̧h 18.28 le, i tú ɓay fe mí ŋgernzuk ziɓri rih ɓil kerpuh Pilaɗ ya. Ziɓri ƴo tul bolkusol Ŋgerzah mí mgba mun woyri ɓoɗ ke sa̧wnzuk a ɓoruri.. Mí a bi ba, Ŋgerzah ɓah hi̧ mi ɓahri, mí ko nzuk ɓoɗ mba, mi ta ɓahri, ke mah na ɓa nunu a Ŋgerzah ya. Le ke mah ti̧h ɓa sa̧wnzuk ye wara. 29Kaŋ mí-i deh ɗina ya. Mi gi ɓa gah-u. Aŋay, mi yih tu sa̧wɓay fe ɗina woiri. »
30Kɔrne yih nzak ye ɓahri : « Laɓ nam niŋ sa̧wseh kandɔkay mí-i ƴo goŋ Ŋgerzah ɓil vul bi ke sa̧wseh-goŋ Ŋgerzah a bɔklew, mí nzuk ké ndoh gar ké ndu̧y ver ver ti̧h nun bi. 31Mí ke ɗi mi ke riŋ bi ɓahri, Ŋgerzah lah goŋna bi lah. Fe sukiri ké mi laɓ hi̧ nzuk sehri rih law ye rih. 32Ke sɔk mi ɓahri, mí pih nzuk si Zope ɓay ɗi mu Simu ké riŋ wo a ɓoru ɓa Piyer ɓá gi. Mu na kerpuh gɔlɔ wo Simu nzuk-gbak ho̧ko. Puh Simu ra na ɓel mahmbih. 33Sa̧wu mí-i pih ɗi mu ɓa gah-u. Mí a wo ba, nzak pihna-ay rih law wo mú-u gi-ay. Aŋay le, nah kaɓ pol Ŋgerzah, a ye Gaŋ tul feri riw ɓay náh lah ɓayri ké-e hi̧ mu ɓay mú sɔk na. »
34Mí Piyer titil ɓah ɓay ɓahri : « Aŋay, guh law bi da. Ké ta̧w Ŋgerzah, nzukri riw mah hani. 35Ké ɓil sa̧wnzuk a ɓoruri gaŋ kara nzuk a suŋ suŋ ké hȩk Ŋgerzah, ké ƴo tul ketina le, Ŋgerzah ya̧ ni ndɔk seɗe ma law ye. 36Nzak pihna ké-e pih hi̧ gun Izarayelri ɓah ɓay law rihna ɓahri, Ŋgermbay Zezu ɓa sa̧w ɗeŋ nzukri. Ke ɓa Gaŋ tul feri riw. 37Ɓay ye ké ya̧ gelri gbam ɓil tusiɓa ziɓri, i la-lah. Ɓayu titilu ké Galile bol fal batem ké Za̧h ka-kah-u. 38Zezu nzuk Nasareɗ, Ŋgerzah mbi ni kan ɓoɗ ke Tempuki ke ŋgerna pi. Ke ha̧rma ke gelri ɓoɗ ɓoɗ laɓ lawsuki, mí ke gah keni nzukri ké záh laɓ niri koseh. Ɓay fe le, Ŋgerzah ƴo ziŋ ni. 39A wah, nah ɓa nzuk-ɓah tehɓayu ur ke fe laɓna ye gbam ké tusiɓa ziɓri ka̧h ɔh tɔr pihna ye ké ɓil puh Zurusalem. Ku ɓar ni ɓa hul nazi ké tul kpuh#10.39 Í mgba gel ki̧na-ay tuh ke Mbete Galaɗri 3.13 ɓay tu ɓay hul ké tul kpuh.. 40Ŋgerzah hi̧ ni ke ti̧h ke puh záh ke pa̧ymun a foyu ɓil nam a sayu. Ke hi̧ ni sɔk mun ye hi̧ na, nah ko. 41Ke sɔk mun ye hi̧ ziɓri gbam ya, sa ɓa a wah ké Ŋgerzah lu na lewsa̧ ɓa nzuk-ɓah tehɓay Ŋgermbay Zezu. Mí nah su̧ fe, nah nzo fe ziŋ ni. 42Ke pih na ɓay náh ka-kah, náh ɓah tehɓay ye hi̧ sa̧w nzuk yeri ɓahri, a ye mí Ŋgerzah mbi ni ɓa nzuk-kuŋ salɓay ké tul nzukri gbam, nzuk a huluri ke nzuk a ƴo ke ɔknari pi. 43Gun nzak pihna Ŋgerzah a lewsa̧ri riw sɔk tehɓay ye ɓahri, tumbɔl Ŋgermbay mí salɓay hul lu ké tul nzuk a suŋ suŋ ké kan law tul riŋ ye. »
44Piyer ƴo ɓah ɓay kɔɓ ɓáy, mí Tempuki ɗer gi ku̧ tul nzukri riw ké mbu̧h hani ƴo lah ɓay ye. 45-46Ziɓri ké kan law tul Ŋgermbay, ké ɓaŋ Piyer si puh Kɔrne ra, ku lah nzukri ké mbu̧h kaɓ puh Kɔrne ƴo ɓah ɓay ke nzak a ɓoruri ké Tempuki hi̧ niri, ku lah niri ƴo pir riŋ ɗina Ŋgerzah pi, mí ku kaɓ yer. Ku ɓahri se : « Sa̧wnzuk a ɓoruri ké kuŋ ndi̧w kandɔk bolkusol Ŋgerzah sɔk ra ya kara, Tempuki gi ku̧ tul woyri pi. »
47Wara mí Piyer ɓahri : « Bolkusol fe mí mah gboh soh nzukayri mbih batem le ? Ku ya̧ Tempuki kandɔk a wah. »
48Mí ke ɓah hi̧ niri ke riŋ Ŋgermbay Zezu, kú ti̧h mbih batem. Bale ku goŋ ni hi̧ ni ke kaɓ ziŋ niri nam mah fe dara mí ku tɔr ɓáy.
Currently Selected:
Mbete Fe laɓna Tempuki 10: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
