Mbete Fe laɓna Tempuki 8
8
1Sɔl kara ƴo fal ŋgaŋ nzukri ké i Eten ra pi.
Nzuk-dih fal Ŋgermbayri ka-kah ɓaysuki Ŋgermbay ké tusiɓa ɓoruri
Nam kú-u i Eten ra bale, koseh a luki ziŋ sa̧w nzuk Ŋgermbayri ké Zurusalem. Mí ku gbakra hani kparki kparki ké tusiɓa Zude ke tusiɓa Samari, sa ɓa gun nzak pihna Ŋgermbayri mí toŋ ké Zurusalem. 2Nzuk law Ŋgerzahri vuh hul Eten ɗik ɗik#8.2 Bolkusol nzuk-kuŋ salɓay ziɓri ɓahri, nzuk kú-u vbuk ni kasaw le, kú vuh hul ye ya, kú gɔr hul ye ɓoɗ. Mí keni-aw kara, nzukri ké kan law tul Ŋgermbay laɓ hȩkme ya. Ku ko Eten ɓa nzuk a ketina, mí ku vuh hul ye mgbum.. Ku mbi hul ye si gɔr. 3A ye Sɔl ba, ke ƴo sɔk nun seh sa̧w nzuk Ŋgermbayri ɓa ŋgi̧-u. Ke si ke kerpuh kerpuh, ke mgba sa̧w nzuk Ŋgermbayri ke ŋgere si ku̧ vul mgbal. Ke laɓ wo̧rori ke wu̧yri gbam mah hani.
4Mí sa̧w nzuk Ŋgermbayri ké zikri-aw, ƴo sɔk ɓaysuki Ŋgermbay Zezu ke puhri gbam kú-u ɗuk si ri hi̧ nzukri lah. 5Kaŋ mí Filiɓ ba#8.5 Filiɓ ɓa nzuk kú-u lu ni ɓa gun-laɓ pihna hi̧ nzukri (diyakere) ké sakra nzukri ké toŋndɔk say ra. Í ki̧ Mbete Fe laɓna Tempuki 6.5 ɓay tu ɓay Filiɓ. , ɗuk si puh a hani ké tusiɓa Samari, mí ke ka-kah ɓaysuki Ŋgermbay hi̧ nzuk puh-uri. 6Nzukri lah ɓaysuki Ŋgermbay ké Filiɓ sɔk, ku ko fe saŋri ké-e laɓ pi dale, ku te suk woyri keh lah ɓay ye ke law mbew. 7Záhri ti̧h ke vba̧ nzak ɓeleŋ ɓeleŋ ké tul daɓa nzukri, gɔmri ke nzuk kpereri ɓa ŋgi̧-u ziŋ mun gahna. 8Kaŋ mí nzuk puh-awri ziŋ law rihna ɓa ŋgi̧-u.
9Ke sewu-aw, nzuk sa̧wkpuh ƴo puh-aw. Riŋ ye ɓa Simu. Ke ko mun ye ɓa nzuk a luki. Ke laɓ fe saŋri ɓa ŋgi̧-u rɔk keni nzukri hi̧ niri ku kaɓ yer. 10Ŋgereri ke gunri gbam ko ni ɓa nzuk a kpakpaŋu. Ku ɓahri : « Nzukay ƴo ke huhrumun Ŋgerzah. Ɓa ŋgerna a luki gaŋ. »
11Doro-u ɗi-ɗih ké-e ƴo rɔk nzukri ke fe laɓna ye-aw. Sa̧wu mí nzukri ɓaŋ law woyri kan tul ye. 12Mí Filiɓ gi sɔk ɓaysuki lak mbay Ŋgerzah ke riŋ Ŋgermbay Zezu bale, nzukri poŋ Simu el kan law woyri tul ɓaysuki ké Filiɓ sɔk, mí ke soh niri mbih batem, wo̧rori ke wu̧yri pi. 13Simu gaŋ kara ya̧ ɓay ɓahna Filiɓ pi. Fal ti̧hna ye ɓil mbih batem, ke poŋ fal Filiɓ ya, ke ko gel ka̧ah ɓay ŋgerna fe saŋri ké Filiɓ laɓ, mí ke kaɓ yer.
14Gun nzak pihna Ŋgermbayri ké Zurusalem lah ɓahri, nzuk Samariri ya̧ ɓay Ŋgerzah da. Mí ku pih Piyer ke Za̧h si ta̧w woyri. 15-16Ka̧hna Piyer ke Za̧h ra bale#8.15-16 Í ki̧ Mbete Luk 9.52-54 ɓay tu ani míZa̧h yih ɓay ɓeɓ nzuk Samariri ɓay baa ké na haŋsekle woyri ziɓri ke Samariri. Mí aŋay, baa ta mba., ku goŋ Ŋgerzah ɓay ké hi̧ Tempuki ɓá ku̧ tul nzuk Samariri ɓayu kú-u ti̧h mbih batem kan riŋ Gaŋ tul feri riw a ye Zezu ké tul woyri, mí Tempuki ku̧ tul woyri ya ɓáy. 17Wara mí Piyer ke Za̧h ɓaŋ ndɔk kan tul woyri mbew mbew gbam, mí ku ya̧ Tempuki.
18-19Simu ko ani mí Tempuki gi ta̧w nzukri gelke gun nzak pihnari ɓaŋ ndɔk kan tul woyri ra. Ke ndar lari hi̧ Piyer ke Za̧h ɓahri : « Í hi̧ mi ŋgerna-aw le, mí ɓaŋ ndɔk kan tul nzuk le, nzuku ɓá ya̧ Tempuki kaŋ pi. »
20Mí Piyer ɓahri : « Lari wo ɓá se hɔrɔ gbɔlɔk gbɔlɔk ziŋ mu ɓayu ké mu ker ɓahri, ku yeh fe ké Ŋgerzah hi̧ ndikpo ke lari. 21Fe ké Ŋgerzah hi̧ ra ɗih ziŋ mu ɗih, mu ta ɓilu ya. Law wo sih ndiŋ ndiŋ ké tul Ŋgerzah. 22Kaŋ le mú mbi law wo ké tul kerɓay suya wo ma fal, mú el gi leh seh ké ta̧w Gaŋ tul feri riw. Le, law ye ɓay voh ké tul kerɓay wo-aw ɓáy. 23Mi ko ɓahri, law wo zuŋ mbak mbak, kerɓay tukala ŋga̧h mu kiɗik kiɗik ɓa mgbal. »
24Mí Simu el ɓah hi̧ Piyer ke Za̧h ɓahri : « A woiri gaŋ, í goŋ wuri Gaŋ woiri ɓay tul bi rɔkɔ fe ké i ɓah-ay ɓá laɓ mi. »
25Falu ké Piyer ke Za̧h ɓah tehɓay Gaŋ tul feri riw, ku te-teh ɓayu hi̧ niri ku lah pi, mí ku el si Zurusalem. Elna woyri-aw, ku sɔk ɓaysuki hi̧ puhri ɓa ŋgi̧-u ké tusiɓa Samari.
26Mí tem nzak pihna Gaŋ tul feri riw gi sɔk Filiɓ ɓahri : « Ur síɓa, mú mbi mahful a ɓel ɓil seh a fál ndɔk lakna#8.26 Ɓel ɓil seh a fál ndɔk lakna sɔk ɓahri, sud., ful ké ɗer ke Zurusalem si Gaza. »
Fulu, nzukri si ri ŋgi̧ ya. 27Filiɓ tɔr bale, ke si ko nzuk Etiyopi a hani mbew. Ke ɓa pɔrɔ. Ke ɓa nun mbay Kandas ké ɓa mbay a wu̧yu ké lak mbay ké tusiɓa Etiyopi. Pihna ye ɓa kɔr fe ziŋna mbay. Ke si Zurusalem dim Ŋgerzah. 28Elna ye ma puh, ke kaɓ ɓil sareɗ mbay ké ɗeŋeri ƴo kɔklɔ-u, ke ƴo ki̧ mbete vbehna Ezay gun nzak pihna Ŋgerzah a lewsa̧ ɓa mgbe-u. 29Mí Tempuki sɔk Filiɓ ɓahri : « Mú si ma ɓel sareɗaw. »
30Filiɓ ur ɗukna si ka̧h ɓel sareɗ ra bale, ke lah kusol nzuk Etiyopi ra ƴo ki̧ mbete vbehna Ezay gun nzak pihna Ŋgerzah a lewsa̧, mí Filiɓ vbi ni ɓahri : « Mbete ké i ki̧-ay ra wa, i lah sa̧wɓayu te-teh gaŋ le ? »
31Nzuk ra yih nzak ye ɓahri : « Nzuk-sɔk mi ta-a ba, ani mí-i tu sa̧wu le ? » Mí ke el ɓah hi̧ Filiɓ ɓá hil kaɓ ɓel ye ké ɓil sareɗ. 32-33Gel ki̧na ké-e ƴo ki̧-u ra mí na-ay :
Kandɔk sami kú-u maŋ ɓay si vbeh-u,
gun sami kú-u ƴo su̧h pirma-u,
ke vuh ya, ke fer ɓay ya.
Ku kuŋ salɓay hul ɓa gɔɓ kan tul ye, mí ke ɗiŋ tul.
A ge mí mah ko ɓay nzukri ke sew ye-aw ra le ?
Ɓay fe le, ku i ni i # 8.32-33 Ɓayay na ɓil Mbete Esaïe 53.7,8. Í ki̧ Mbete Marki 9.12 ɓay lah ɓayu pi..
34Wara mí nzuk pɔrɔ ra vbi Filiɓ ɓahri : « Kɔkrɔya, mú sɔk mi ɓayay, mí lah. Gun nzak pihna Ŋgerzah-ay ɓah ɓay tul ge le ? Ɓay tul ye mini ɓay tul nzuk a ɓoru le ? »
35Ur ke gel ki̧na-u-ay, Filiɓ sɔk ni ɓaysuki Zezu. 36Ku ƴo si ful kɔɓ ɓáy, mí ku ti̧h nzak mbih dale, nzuk pɔrɔ ra vbi Filiɓ ɓahri : « Mbih mí na-ay. A fe mí gboh ɓay mú soh mi mbih batem le ? » 37#8.37 Nzuk goso fe tuna Ŋgerzah ɓahri, gel ki̧na-u-ay, nzuk-vbeh mbete-ay vbeh kan ɓil mbete-u ya. Bol falu dara, nzuk a ɓoruri vbeh ndoh ri ɓay hi̧ nzukri ɓá lah ɓahri, nzuk pɔrɔ kan law ye tul Ŋgermbay.
38Nzuk pɔrɔ hi̧ ku ta̧h ƴo. A woyri ke Filiɓ, ku ɗer seɗe mbɔk si ɓil mbih, mí Filiɓ soh ni mbih batem. 39Ku ti̧h ke ɓil mbih bale, Tem Gaŋ tul feri riw mbi Filiɓ zi rik rik. A ye, nzuk pɔrɔ ba, ke mbi mahful ye ke mun rihna, ke ko ni mba. 40Filiɓ ba, ti̧h ké Azoɗ kpetere. Ke si par par sɔk ɓaysuki hi̧ nzukri puh ke puh ka̧h Sezareh.
Currently Selected:
Mbete Fe laɓna Tempuki 8: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
