Mbete Fe laɓna Tempuki 7
7
1Mí ŋgernzuk fe puhna Ŋgerzah vbi Eten ɓahri : « Mú ɓah ɓay wo, náh lah. Ɓayri kú-u ɓaŋ ku̧ tul wo-ay ra wa, ɓa ketina gaŋ le ? »
2Wara mí Eten yih nzak woyri ɓahri : « Bah biri ke yi̧n biri, í lah ɓay bi-ay ɓa teh-u. Ŋgerzah nzuk riŋ ɗina ti̧h nun zih wah Abaraham ke sew ké-e kaɓ tusiɓa Mezopotami, dara mí ke loh si na ké Haraŋ ɓáy#7.2 Ɓay tu ɓay ɗina Abaraham ké Ŋgerzah ɗi ni, í ki̧ Mbete Sa̧w fe 11.31—12.1; 15.7 pi.. 3Ŋgerzah ɓah hi̧ Abaraham ɓahri : Mú poŋ tusiɓa wo ke sa̧w nzuk wori. Mú tɔr si tusiɓa ké mi ɓay sɔk mu.
4Bale Abaraham poŋ nzuk Kalderi ké Mezopotami. Ke tɔr si na Haraŋ. Fal hul bah ye bale, Ŋgerzah hi̧ ni ke loh gi na tusiɓa Kana ké nah na ri-ay. 5Mí Ŋgerzah wahɓay hi̧ ni tusiɓa-ay ɓa nzuku a ye ke gun zih yeri. Sewu-aw, ke mbuŋ gun ya ɓáy. Kana ɓa tusiɓa ye ya pi. Gel to-tom kara, ke ta keni ya. 6Ŋgerzah ɓah ɓay a ɓoru ɓahri : Sa̧wnzuk wori ɓay si na tusiɓa a ɓoru mbihmbam sɔɗ sɔɗ niŋ ɓa nzuk a gi-uri. Nzuk tusiɓa-awri ɓay laɓ niri ɓa mgbal. Ku ɓay sɔk nun seh woyri ɓa ŋgi̧-u pi#7.6 Ɓayay na ɓil Mbete Sa̧w fe 15.13,14 ke Mbete Exode 12.40..
7Mí Ŋgerzah el ɓahri : Mi kúŋ salɓay kan tul sa̧wnzuk ké mgba niri ɓa mgbalaw. Falu le, mi tén niri ke puh mgbal. Ku él gi kaɓ tusiɓa-ay ɓay dim mi ké ri.
8Kaŋ mí Ŋgerzah wahɓay ziŋ Abaraham. Ke ŋga̧h tul ɓayu ke bolkusol-kuŋ ndi̧w#7.8 bolkusol-kuŋ ndi̧w : Ɓay tu ɓay bolkusol-kuŋ ndi̧w ké Ŋgerzah hi̧ Abaraham, í ki̧ Mbete Sa̧w fe 17.9-14. Í ki̧ Mbete Galaɗri 3.6-29 pi.. Abaraham mbuŋ Isak mí ke kuŋ ndi̧w ye ke nam a toŋndɔk seɗe-u#7.8 Ɓayu na ɓil Mbete Sa̧w fe 21.3,4. . Isak laɓ kaŋ ziŋ Zakoɓ#7.8 Ɓayu na ɓil Mbete Sa̧w fe 25.24-26.. Zakoɓ#7.8 Zakoɓ : Riŋ Zakoɓ a ɓoru ké Ŋgerzah tu riŋ ye ɓa Izarayel kara laɓ kaŋ ziŋ gun yeri ké boh falu seɗe pi. Sa̧w zih wahri mí ɓa gun Zakoɓri#7.8 Ɓayu na ɓil Mbete Sa̧w fe 35.22-26..
9Zih wahri ra laɓ sere ziŋ toŋnafal woyri Zezeɓ. Ku mgba ni, mí ku yeh ni ɓa mgbal. Nzuk-yeh ni si ziŋ ni ké tusiɓa Eziɓte. Mí Ŋgerzah ƴo ziŋ ni kpatara#7.9 Ɓayu na ɓil Mbete Sa̧w fe (Genèse) 37.18-28.. 10Ke ten ni ke ɓil koseh yeri riw. Ŋgerzah hi̧ law faroŋ mbay Eziɓte rih ni tul Zezeɓ. Ŋgerzah el hi̧ Zezeɓ ru̧na pi. Mí faroŋ mbi ni ɓa gɔŋrɔŋ ye ké tusiɓa Eziɓte. Ke ƴo ko kerpuh mbay faroŋ pi#7.10 Ɓayu na ɓil Mbete Sa̧w fe (Genèse) 39-41..
11Sewu-aw ra, ɗaka bahpihya laɓ nzukri koseh kal ŋgoŋ ké tusiɓa Eziɓte ke tusiɓa Kana pi. Zih wahri kara ziŋ fe kú-u ɓay hɔl keni mun woyri ya#7.11 Ɓayu na ɓil Mbete Sa̧w fe (Genèse) 42-45.. 12Bah woyri Zakoɓ lah ɓay fe su̧na ké Eziɓte bale, ke pih gun yeri si ri ɓa a titilu. 13Sina woyri a bɔk seɗe-u, Zezeɓ sɔk mun ye hi̧ yi̧n yeri tu ni. Mí faroŋ tu keni sa̧w in Zezeɓ. 14Wara mí Zezeɓ pih si ɗi bah ye Zakoɓ ke nzuk in ye a ɓoruri riw gi. Ŋgi̧na woyri gbam laɓ bon toŋndɔk say falu ndiɓi#7.14 Ɓayu na ɓil Mbete Sa̧w fe (Genèse) 46.. 15A woyri gbam, ku si ɗeh puh ké Eziɓte. Zakoɓ hu ké ri. Zih wahri-aw kara, hu ké ri pi. 16Mí ku suk hul woyri el si mbek ké Sikem#7.16 Sikem : Sikem na tusiɓa Samari ké na ɓil tusiɓa Kana. Ɓayu na ɓil Mbete Sa̧w fe 23.16 ke Mbete Sa̧w fe (Genèse) 49.29-33; 50.25-26 ke Mbete Exode 13.19 ke Mbete Josué 24.32. ké hoh kasaw-mbek hul ké Abaraham yeh ké ta̧w gun Hamor-ri.
17-18Mí wahɓay ké Ŋgerzah wah ziŋ Abaraham ƴo laɓ wara. Sa̧w wah seh ma pol pol ké Eziɓte kpu̧ru ka̧h sew ké mbay a ɓoru lak mbay ké Eziɓte. A ye, ke tu ɓay Zezeɓ mba. 19Mbay ra mba nzuk wahri riw ke ru̧na. Ke mgba zih wahri ra ke ŋgere hi̧ niri ku fa̧h gun a peŋuri kú-u mbuŋ ɓa gun wo̧rori ku̧ kpah ɓay duh niri#7.19 Ɓayu na ɓil Mbete Exode 1..
20Ke sewu-aw mí, ku mbuŋ Moyiz. Ke ɓa gun pol tehna. Ku suk ni laɓ few say ké ɓil kerpuh bah ye#7.20 Ɓay Moyiz ké Eziɓte na ɓil Mbete Exode 2.. 21Nam kú-u mbi ni mu̧h ɓil suy ké ɓel mbih dale, gun faroŋ a wu̧yu si fi̧h ni, mí ke mbi ni el hɔl ni ɓa gun ɓil ye. 22Ku sɔk Moyiz goso ru̧na nzuk Eziɓteri riw. Moyiz ra ti̧h ɓa nzuk gosoɓay ke goso pihnari, mí ke ŋger ɓilu. 23Ke laɓ mbihmbam bon niŋ bale, kerɓay rih law ye ɓahri, ke sí ta̧w yi̧n ye, gun Izarayelri ɓay hekre niri ko. 24Ka̧hna ye le, ke ziŋ nzuk Eziɓte a hani ƴo vba̧ yi̧n ye ɓa gɔɓrɔ. Ke si yih tul yi̧n ye. Mí ke vba̧ nzuk Eziɓte ra lih gbimgbiŋ ɓa hul. Ke dal baa yi̧n ye. 25Moyiz ker ɓahri se, nzuk yeri ɓay tu ɓahri, Ŋgerzah lu ni ɓay ten niri ké ɓil mgbal, mí fe-u guh law woyri ya dih.
26Tipele-u, ke el si ta̧w yi̧n yeri ra ɓáy le, ke ziŋ nzukri seɗe ƴo vba̧ hani. Ke yih ɓay kehr niri ɓay gɔl niri, mí ke ɓahri : A woiri i ɓa yi̧nri ba, ɓay fe mí i ƴo laɓ hani se kaŋay le ?
27Mí nzuk ké ƴo gɔɓrɔ mbaŋ ye ra sɔkrɔ Moyiz ɓahri : A ge mí mbi mu ɓa mbay mini nzuk-kuŋ salɓay nzuk wahri le ? 28Mu yih ɓay i mi kandɔk nzuk Eziɓte ké mu i kelew ra le ?
29Moyiz ɓá lah ɓayaw gak dale, ke ɗuk si na Madyaŋ puh sa̧wnzuk a ɓoruri. Ke mbuŋ gun wo̧rori seɗe ké ri. 30Bol falu laɓ mbihmbam bon niŋ dale, tem nzak pihna Ŋgerzah ti̧h nun ye ɓil lawkɔr ké ɓel kasaw Sinay. Ke ti̧h nun ye ké ɓil rim hɔrɔ ké gay kpuh, mí hɔrɔ-u se gay kpuh ya. 31Moyiz ko kaŋ, fe-u na ni yer ɓa fe saŋ. Ke loh ma ta̧wu ɗih ya ɓay ko sa̧wu ɓa teh-u bale, ke lah kusol Miƴori ɓahri : 32A bi, mi ɓa Ŋgerzah, záh zih wori Abaraham, Isak, Zakoɓ.
Bale hȩkme laɓ Moyiz. Mun ye to kpak kpak. Ke sa ko kona ma ma ri mba. 33Gaŋ tul feri riw ɓah hi̧ ni ɓahri : Mú lu sabɔk wo ɓayu ké gel ƴona wo-ay ɓa gel ké mi ƴo ri. 34Ketina, mi ko koseh nzuk biri ké Eziɓte ko. Mi lah vuhna woyri, mí-i ɗer gi yá̧ niri. Aŋay, namu ka̧h da. Mú gi. Mi píh mu si Eziɓte.
35Moyiz ké yi̧n yeri sa ɓay ye ya, ku ɓahri se, a ge mí mbi mu ɓa mbay mini nzuk-kuŋ salɓay nzuk wahri ra, a ye gaŋ mí Ŋgerzah mbi ni ɓa mbay. Ke pih ni si ten yi̧n ye gun Izarayelri ké ɓil mgbal. Ŋgerzah pih ni ke ŋgerna tem nzak pihna ké sɔk mun ɓil rim hɔrɔ ké na gay kpuh ra. 36Moyiz ra ten niri. Ke nda pol woyri. Ke laɓ fe saŋri ɓoɗ ɓoɗ ké ɓil tusiɓa Eziɓte pi, ké ɓil mahmbih a si̧h-u pi, ké ɓil lawkɔr mbihmbam bon niŋ pi#7.36 Ɓay ti̧hna woyri ke puh mgbal Eziɓte na ɓil Mbete Exode mah-u 5 ka̧h mah-u 13. Ɓay kalna woyri ke ɓil mahmbih a si̧h-u, í ki̧ Mbete Exode mah-u 14 ka̧h mah-u 15. Ɓay ha̧rma woyri ɓil lawkɔr, í ki̧ Mbete Exode mah-u 15 ka̧h ɔh tɔr mbete-u ke Mbete Deutéronome mah-u 1 ka̧h mah-u 2.. 37Ɓa Moyiz gaŋ mí ɓah hi̧ gun Izarayelri ɓahri, Ŋgerzah ɓay lu gun nzak pihna a ɓoru ké sakra woyri eŋ mi Moyiz kaŋ#7.37 Ɓayu na ɓil Mbete Deutéronome 18.15.. 38A ye ké-e ƴo ziŋ zih wahri ɓil lawkɔr, ke ɓa nzuk ƴo haŋsekle zih wahri ke tem nzak pihna Ŋgerzah ké ɓah ɓay hi̧ ni ké tul kasaw Sinay. A ye mí, ke ya̧ ɓay ke nzak Ŋgerzah el gi ndazi hi̧ na#7.38 Ɓayu na ɓil Mbete Exode mah-u 19 ka̧h mah-u 20.. Ɓayuri ɓa ɔkna ké na ɓa ŋgɔh. 39Mí a ye ba, zih wahri ra sa lah ɓay ye mba. Tul woyri sɔɓ, mí ku sɔɓ fal woyri ti Moyiz el ɓaŋ law kan tul záhri ké Eziɓte 40Ku ɓah hi̧ Aroŋ ŋgernzuk Moyiz ra ɓahri : Mú laɓ fe ɓa záh hi̧ ni ké nda pol wah. Moyiz ké ten na ké tusiɓa Eziɓte ra, nah tu fe ké ziŋ ni mba.
41Ke seh-aw, ku fa̧h lari lɔr ɓa ŋgi̧-u, ku vbo el mboh kɔk fe eŋ nday#7.41 Ɓayay na ɓil Mbete Exode 32.. Ku gi ke fe puhna hi̧ ni ɓa záh woyri. Ku laɓ yim nday ké pol záh ké ku laɓ ke ndɔk woyri ra. 42-43Wara mí Ŋgerzah sɔɓ fal ti niri. Ke poŋ niri dim záh feri ké ƴo nunmbam. Ke ɓah ɓil mbete vbehna gun nzak pihna a lewsa̧ri ɓahri : A woiri gun Izarayelri, fe puhna ké i puh ké ɓil lawkɔr laɓ mbihmbam bon niŋ ra wa, i puh hi̧ mi Ŋgerzah gaŋ le wo ? Kaŋ ya, i pɔr vul kani hi̧ záh Molok#7.42-43 Záh Molok ɓa záh tukala a hani-u ké sa̧wnzuk a haniri ké tusiɓa Kana dim. Gun woyri, ku i hi̧ záh ra ɓa fe puhna. Í ki̧ Mbete 2 Rois 23.10 ɓay tu ɓay záh Molok., i laɓ fe záh Rafan eŋ gunwu̧y nunmbam#7.42-43 Záh Rafan ɓa záh tukala a ɓoru ké sa̧wnzuk a haniri dim. Ku ɗi riŋ gunwu̧y nunmbam a hani mbew ɓa Rafan, mí ku puh fe hi̧ ni.. Fe záhri-aw ra, gelri riw ké i ƴo si ri, i suk ha̧rma keni. Záhri-aw, i laɓ ke ndɔk woiri, mí i ƴo dim niri. Sa̧wu mí-i ɓay ni̧h wuri ɓa ɗih-u kal tusiɓa Babiloŋ#7.42-43 Ɓayay na ɓil Mbete Amos 5.25..
Mí ke ni̧h niri ra gaŋ ba.
44Ɓay vul kani Ŋgerzah ra mí na-ay : Moyiz pɔr vul ho̧ko ɓa gel fe puhna hi̧ zih wahri kandɔk ké Ŋgerzah hi̧ ni ke ko sam vulu ke nun ye. Ku mbek fe vbehna bolkusol Ŋgerzah ké-e ŋga̧h ziŋ zih wahri ké ri. Ku suk ha̧rma keni#7.44 Ɓay tu ɓay vulu, í ki̧ Mbete Exode mah-u 25.8 ka̧h mah-u 28 gel ki̧na 43.. 45Vulaw ra, zih wah a lewsa̧ri poŋ hi̧ gun woyri. Ku suk si keni fal Zozuwe, ku rih keni tusiɓa-ay ké Ŋgerzah hi̧ niri. Ke hi̧ niri ku ni̧h sa̧w nzukri ké kaɓri-aw riw#7.45 Ɓayay na ɓil Mbete Josué.. Ku kɔr vul kani a pɔru-aw kpu̧ru ka̧h sew ké Daviɗ lak mbay#7.45 Ɓay mbay Izarayelri titilu ke Mbete 1 Samuel kpu̧ru ka̧h Mbete 2 Chroniques..
46Daviɗ rih law Ŋgerzah rih. Ke vbi Ŋgerzah mahful ɓay ké mboh vul kani hi̧ ni ɓá na ɓa gel ƴona ye ké haŋsekle sa̧w nzuk ye gun Izarayelri#7.46 Ɓayay na ɓil Mbete 2 Samuel 6.1 si ka̧h 7.29.. 47Ŋgermbay Salomoŋ gun Daviɗ mí mboh vul ra hi̧ Ŋgerzah#7.47 Ɓayay na ɓil Mbete 1 Rois 6.2.. 48Mí keni-aw kara, Mbay a luki ké lak mbay tul feri gbam ta kaɓ ɓil vul ké nzukri mboh ya. Ŋgerzah pih gun nzak pihna ye a lewsa̧ ɓah ɓayu ɓahri :
49 Nunmbam ɓa fe kaɓna mbay bi. Tusiɓa ba, ɓa gel ku̧ bɔk bi. Sam vul a suŋ mí i ɓay mboh hi̧ mi le ? Vul ké mah ɓay mí ɔk mun bi ɓilu ƴo ri ley ? 50Ɓa a bi gaŋ mí-i laɓ feri-aw riw ya le wo#7.50 Ɓayay na ɓil Mbete 1 Rois 8.23-55 ke Mbete Esaïe 66.1,2. ?
Miƴori, Gaŋ tul feri riw ɓah kaŋ.
51A woiri, nzuk law kpuhnari. Suk woiri lah ɓay Ŋgerzah ya kandɔk sa̧wnzuk-kuŋ ndi̧w yari kaŋ. I mba gel mbamba. Zih woiri ƴo kpuh tul ziŋ Tempuki. A woiri kara, i ƴo kpuh tul ziŋ ni kaŋ pi. 52Gun nzak pihna Ŋgerzah a suŋri mí zih woiri laɓ niri koseh ya le wo ? Ku i nzukri ké sɔk ɓay gina Nzuk lawpuki, mí aŋay, i ɔh tɔr pihna fe laɓna zih woiri da. Nzuk lawpuki ka̧h. Mí i mgba ni, i ɓaŋ ni ndoh ndɔk sa̧wnzuk a ɓoruri i ni, ɓayu mgba tul woiri. 53A woiri ké Ŋgerzah pih bolkusol ye ke tem nzak pihnari hi̧ wuri, mí i ƴo tul bolkusolu ya gaŋ. »
54Nzuk-kuŋ salɓayri ɓá lah ɓay ɓahna Eten kaŋ bale, law woyri zaŋ huɗ huɗ, mí ku su̧ sel woyri ŋger ŋger ké tul ye. 55Eten ra, sa̧w siŋ sina ye ɓa Tempuki, mí ke ɔr nun ye, ke ko gel gbak gbak ma nunmbam le, ke ko gel tehna mun Ŋgerzah ké ndu̧y ver ver. Ke ko Zezu ƴo tul bɔk ɓa ndɔk lakna Ŋgerzah pi. 56Ke ɓahri : « Í ko. Mi ko nunmbam na ŋgah. Mi ko gun nzuk pirmatul ké ɓa ndɔk lakna Ŋgerzah ƴo tul bɔk. »
57Ku lah ɓayaw kaŋ bale, ku vba̧ nzak gɔm. Ku mbih suk woyri, mí ku ur yir gi guɓ ni. 58Ku kɔklɔ ni ti̧h keni si fal puh Zurusalem. Nzuk-laɓ ɓay kan tul yeri lu mah gar woyri ku̧ ta̧w seke a hani ké riŋ ye ɓa Sɔl#7.58 Nzukri kélaɓ ɓay kan tul nzuk a ɓoru, mí ku kuŋ salɓay hul kan tul nzuku le, a woyri mí ku titil vbuk ni ke kasaw ɓay i-u. Í ki̧ Mbete Deutéronome 17.7 ɓay tu ɓayu.. Ku titil vbuk ni ke kasaw ɓay i ni. 59Ku ƴo vbuk Eten kɔɓ ɓáy bale, a ye ba, ke ƴo goŋ Ŋgerzah ɓahri : « Gaŋ bi Zezu, mi gi ma ta̧w wo. » 60Ke huk siɓa, mí ke vba̧ nzak ɓeleŋ ɓahri : « Gaŋ bi, mú hi̧ ɓay hul bi-ay ɓá mgba tul woyri ya. »
Ke ɓah kaŋ bale, ke lih ɓa hul.
Currently Selected:
Mbete Fe laɓna Tempuki 7: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
