ESTHERE 6
6
Mordekai o a tlotliswa. — Hamane o a kokobetswa.
1Bosiung bona boo, morena a hlobaela boroko; yaba o re, ho tliswe buka ya dikgopotso, ya ditaba tsa mmuso, ya ba ya balwa pela morena. 2Ha fumanwa ho ngodilwe kamoo Mordekai a neng a hlahisitse ditaba tsa Bigthane le Thereshe kateng, matona a mabedi a morena a balebedi ba monyako, tsa kamoo ba batlileng ho isa letsoho ho morena Assueruse kateng. 3Morena a re: Hlompho le kganya ke dife tseo Mordekai a di etseditsweng bakeng seo? Bahlanka ba sebeletsang morena, ba re: Ha a ka a etsetswa letho. 4Morena a re: Ya lebaleng ke mang? Kanthe Hamane o fihlile lebaleng le kahare ho ntlo ya morena, a tlile ho kopa ho morena hore ho fanyehwe Mordekai sefateng seo a mo lokiseditseng sona. 5Bahlanka ba morena ba re ho yena: Hamane ke enwa, o eme lebaleng. Morena a re: A ke a kene.
6Yaba Hamane o a kena, mme morena a re ho yena: E ka kgona monna eo morena a ratang ho mo hlonepha a etsetsweng? Pelong ya hae Hamane a re: Morena a ka rata ho hlonepha mang, haese nna? 7Yaba Hamane o re ho morena: Haele motho eo morena a ratang ho mo hlonepha, 8ho ke ho tliswe seaparo sa borena se aparwang ke morena, le pere e palangwang ke morena, le moqhaka wa borena o rwalwang hloohong ya hae; 9seaparo le pere di bewe matsohong a kgosana e nngwe ya morena ya tse kgolo; ho apeswe motho eo morena a ratang ho mo hlonepha; jwale, a tsamaiswe ka pere mapatlelong a motse, mme ho howeletswe kapele ho yena, ho thwe: Ho etswa jwalo motho eo morena a ratang ho mo hlonepha! 10Yaba morena o re ho Hamane: Phakisa o nke seaparo le pere, jwalokaha o sa tswa bolela, mme o etse jwalo ho Mordekai, Mojuda ya dutseng pela monyako wa morena; o se ke wa lesa taba leha e le nngwe ya tsohle tseo o di boletseng. 11Yaba Hamane o nka seaparo le pere, a ya apesa Mordekai, mme a mo tsamaisa ka pere mapatlelong a motse, a ntse a howeletsa kapele ho yena, a re: Ho etswa jwalo motho eo morena a ratang ho mo hlonepha!
12Mordekai a ntoo kgutlela pela monyako wa morena, Hamane yena a phakisa a ikela ha hae, a le maswabing, a ikgurumeditse hlooho. 13Hamane a phetela Sereshe, mosadi wa hae, le metswalle yohle ya hae, tsohle tse mo hlahetseng. Ba bohlale ba hae, le mosadi wa hae Sereshe, ba re ho yena: Erekaha Mordekai eno eo o qadileng ho wa pela hae e le wa mofuta wa Bajuda, o ke ke wa mo fenya, empa ruri o tla wa pela hae. 14Ba re ba sa bua, ke ha matona a morena a fihla, a phakisa a isa Hamane dijong tse entsweng ke Esthere.
Currently Selected:
ESTHERE 6: SSO61-SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1961. Used with permission. All rights reserved.