John 20
20
Akumoki Kümsá
1Apinedo tsalà atüghiu inaqhe zümoi aphi lo Mary Magdalene ye akumoki lo wu kelo ye ahukikha lo atuqu akeu hu tukulove aghí keu ithulu. 2Ike li no Simon Peter eno akhopeu lakhiu, Jisü no kimiye chekeu, lau posü ighino pi, “Panongu no akumoki lono Ampeu ikhipesü wuvae, eno panongu no pa pesü khilehi qhivea keno ningu ye mthae!”
3Ike Peter ngò akhopeu lakhiu pama akumoki lo wu. 4Pama kinikujo poche kemu akhopeu lakhiu hu no Peter züthave no atüghishi akumoki toluve. 5Pa no itsaqi no jupulo kelo tilehi phephei keu phì xachhopüa keu ithulu ikemu pa ye alou ilomoe. 6Ikelo Simon Peter no pa thikhau no ighino vejoi akumoki lo ilove. Pa no phephei keu phì tilehi xachhopüaghi keu ithulu, 7eno Jisü kütsü homüxa küzü keu phì ghí aghí keu ithulu. Aphì hu ye tikuto lo pa-a lo xachho pesü ae, eno phephei keu phì lau no pakütashi ae. 8Ashekha lo akhopeu lakhiu khuu atüghishi akumoki tove keno, pa ghí alou iloe. Pa no ithulu püzü pülüluve. 9(Panongu ye ti kutólo Kuchoyesü lo Jisü ye akithí lono xüputhuve nani ipikeu vethamla no ake.) 10Tisheno akhopemiqo ye panongu no khilehi ngoa keno tile idewove.
Jisü no Mary Mardalene lau Ipeghi
11Ike Mary ye akumoki khalau puthugho no qa ae. Li no qa ghi akumoki lo jusü niye pishiqho 12ikelo kungumi kini miyetsüghoi keu phì pepu no Jisü sükumo khile qhipüa keno tilehi lakhi no akütsü küdau eno lakhi no apukhu küdau ishi iqa aghí keu ithulu.
13Panongu no li vilo iniju, “Totimio, no ye kushiye qa ani kea?”
Li no khochile, “Panongu no I Mpeu pesü wuvae eno ni ye panongu no khilehi qhivea keno mthae?” 14Tisheno li no athiu tsüghǜ ighi kelo Jisü tilehi puthugho aghí, ikemu li ye Jisü kepi mtha püzü ae.
15Pa no li vilo iniju, “Totimio, no ye kushiye qa ani kea? No ye khuu phu cheni kea?”
Li no Jisü ye alukümlau küghashive no pa vilo pi, “Akijeu, nono pa pesü wuve aghí aye, I no luve nike no ye pa pesü khilehi qhivea keno I vilo pilo.”
16Jisü no li vilo pi, “Mary.”
Ikelo li no Jisü küdau tsüghǜ ighino Arameami tsau no ishi ighamuku, “Rabboni!” (hipau kiqi ye “Akükütsüu”).
17Jisü no pi, “I pheshelho kevilo, kughengu ni ye Apù lau iku mphi ke. Tishini ke züqhu I thiküzümiqo lau wulo eno panongu vilo ishi pilo, ‘Ni ye I pù eno nongu Papù, I Lhou eno nongu Lhou lau ikuve niye cheae.’ ”
18Mary Magdalene no asütsa pesü akhopemiqo lau wu: “Ni ye Ampeu ithuluvae!” Eno li no Jisü no hipaqo ghili pe li vilo pi kepi panongu vilo pi.
Jisü no Pa Khopemiqo lau Ipeghi
19Apinedo tsalà atüghiu avelau kughou akhopemiqo no Jewmi sakiphemiqo kümsà lau no ahukikha khapesü aqoshi ngoa keno Jisü no ighino panongu gholo puthugho no pi, “Aloino keu nongu gholo apeniu!” 20Pa no hi pive kethiu pa no pa u ngò pa jibo panongu pìye. Akhopemiqo no Ampeu ithulu püzü shishe alovive.
21Itaghi Jisü no pi, “Aloino keu nongu gholo apeniu! Apù no I puwu ketoi, ni ghí nongu puwu ani.” 22Tisheno pa no panongu shou atuthu fupuku no pi, “Aghungu Kimthe sasülulo. 23Nongu no khiuala xinéqo qhivetsü aye, panongu xinéqo qhivetsü nani; tsalá nongu no panongu kipimí qhitsümo aye, panongu kipimí qhitsümo nani.”
Jisü no Thomas lau Ipeghi
24Ike Chighikini dolo lakhi Thomas (Didymus ipi ghí ku chekeu), ye Jisü no ighi kelo akhopemiqo gholo küha no ake. 25Akhopemi kütamiqo no pa vilo, “Ningu ye Ampeu ithuluvae!” ipive.
Ikemu pa no panongu vilo pi, “I no pa u lo ayishu zaku ithumla eno I u pesü ayishu no qhusü keu-a lo chosüju, eno I u pe pa jibo lo bujumo ke kutólo niye pülümoe.”
26Apinedo lakhi thiu akhopemiqo ye itaghi aki alou ngoa, eno Thomas ghí panongu gholo ae. Ahukikhaqo ye khapüa keghi Jisü ye ighino panongu gholo puthugho no pi, “Alokughuno nongu gholo apeniu!” 27Tisheno pa no Thomas vilo pi, “O u loti pe hile sǘ lo; I u julo. O u chhopuwo no I jibo lo qhiju lo. Lipi akeu tave no pülülo.”
28Thomas no pa vilo pi, “I Mpeu eno I Lhou!”
29Tipathiu Jisü no pa vilo pi, “No ye ni ithulu keu ghenguno pülü anie, ikemu khuno no ni ithulumo namu pülüni keno panongu kümghae.”
John Atsakiviu Kimiji
30Jisü ye akhopemiqo nhekithe lono akümzapu kümlà kütau kutomo shikeqo kaku hipau lo yèsüpe püamoe. 31Ikemu nongu pelo Jisü ye Messiah, Alhou Nu kepi pülülu peniye hipaqo yèpüani eno pülülu keu vechewo nongu pelo pa je lono aküxü ape niye ke.
Currently Selected:
John 20: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
