John 19
19
Jisü Yeda Pìthíve Penike Xathabeve
1Ikelo Pilate no Jisü sawuve pe püzü heqhi pe. 2Ghüshimiqo no asahu ghoküna pe akütsükuqho mülà no pa pipe. Panongu no hughai keu chijeboboi-phi pa puwu 3eno pa lau ide-ide ighi püzü ishi pi, “Jewmiqo kükau sheqhe ani!” Tisheno panongu no Jisü gi lo ghapuku tsüe.
4Pilate no itaghi khalau ipeghino tilehi Jewmi kumqo pe akemiqo vilo pi, “Julo, ni ye timi hipau shou ngukube eno lachile kepu kiumu phulu amoe ipi nongu pelo ithive peniye pa sasü nongu lau saipeghi anie.” 5Kughou Jisü no asahu kütsükuqho eno hughai keu chijeboboi-phi pepusü khalau ipeghi keno Pilate no panongu vilo pi, “Timi hu hi chenie!”
6Achinetomiqo eno panonguw hiyampemiqo no Jisü ithulukhavi panongu no ishi ighamuku, “Yedavelo! Yedavelo!”
Ikemu Pilate no khochile, “Nongu no pa sasü wuve no pa yeda pìthívelo. I ghengu ye, ni ye timi hipau shou ngukube eno lachile kulupu kiumu phulu amoe.”
7Jewmi sakiphemiqo no ishi pikichichi, “Ningu ye ayeza lakhi anie, eno ayeza tipau kiqi lono pa ye thive moayesae, kughengu pa ye Alhou Nu kepi pa no pükha ke.”
8Kughou Pilate no hi chilu keno, pa ye alau shi msàve, 9eno pa ye kükaki alou ide ilove. Pa no Jisü vilo iniju, “No ye khilau no ighi kea?” ipi ikemu Jisü ye kiumu pa khochilemoe. 10Pilate no pi, “No ye I pütsani keu milive ani keshea? No ye I u lo O kuqhopheve momu yedave kepu küká akeu mtha keshea?”
11Jisü no khochile, “Tsalá Alhou no aküka O tsümo ke aye no ye I shou aküka kühani cheke. Tighenguno timi khuu no I küghape O tsüvea keno pa ye axiné kijè kipimí shivae.”
12Tinguno alau ye, Pilate ye Jisü kuqhopheve nike pükapütsa ae, ikemu Jewmi sakiphemiqo no ishi ighamuku auve, “Tsalá nono timi hipau pelo wuve pe aye, no ye Caesar küsàu kumoe. Timi khukhumu akükau kepi pükha aye pa ye Caesar lachile anike.”
13Kughou Pilate no hi chilu keno, pa ampi no Jisü sasü khalau ipeghi eno pa ye küghakütha lakhü khikhi Atuqu Khache (Arameami tsau no Gabbatha ipi chekeu) ipi cheni keno tile iqa ae. 14Tipau tsalà ye Hechekulu ghulhu Kukuto tsalà shi ake; eno tiye puchomta qhalo ke.
Pilate no Jewmiqo vilo pi, “Nongu kükau hi chenie.”
15Ikemu panongu no ighamuku pi, “Pa sasü wuvelo! Pa sasü wuvelo! Pa yedavelo!”
Pilate no iniju, “Ni ye nongu kükau yedaveni keshea?”
Achinetomiqo no khochile, “Ningu ye Caesar kumo aye akükau kütami kühae.”
16Ashekha lo Pilate no Jisü yeda pìthíve penike panongu u lo sǘvetsü.
Jisü Yeda Pìthíve Keu
Ike ghüshimiqo no Jisü sawuve. 17Pa likhi paw kros xapusü Aboghe (Arameami tsau ye Golgotha ipi cheni) ipikeu-a lo wuve. 18Tilehi panongu no Jisü yeda pìthíve, eno pa gholo kütami kini hula-hila qhi püzü Jisü no amta lo qhi no yeda pe qhive.
19Pilate no yepìthi lakhi ye pesü kros lo tsüghape qhive. Ishi yèpüa:
Nazareth no Ghami Jisü, Jewmiqo Kükau.
20Jewmi kutomo no amichipu hipau philu, kughengu Jisü yeda pìthíve keu-a ye mishighüna phivilo ke, eno atsa hu ye Arameami, Latin, eno Greek tsa lono yèpüa ke. 21Jewmi chinetomiqo no Pilate lachile ghi pi, “ ‘Jewmi Kükau,’ ipi yè kevilo ikemu timi hipau no Jewmi kükau pükha cheni ipi ye lo.”
22Pilate no khochile, “I no kiu yeva keno ti yèvae.”
23Kughou ghüshimiqo no Jisü yeda pìthíve keno, panongu no Jisü phiminiqo ikhiluve, eno panongu dolo kikijé bidí shi püzü lakhi-khi kijéluve. Panongu ye aphimini ashou pepu chekeu hu ye kijemo no ake, kughengu hiye süxümo keu, eno tiye kunguu no aqhou kutólo lakhi shi ghò keu ke.
24Panongu lakhi no lakhi vilo ishi pi, “Ningu süxümo no khuu no ithuluni keno asaqhi junie.”
Hipau shikeu ye Kuchoyesü lo ishi pipüa keu shikupu niye ke,
“Panongu no panongu dolo no I phimini süxü kijeve ke
eno I phinhemgha shou asaqhi ke.”#19:24 Leshe 22:18
Ike ghüshimiqo no hitoi shike.
25Jisü’w kros phivilo pazá, pazá pafo, Clopas nipu Mary, eno Mary Magdalene ishi puthugho ae. 26Kughou Jisü no tilehi pazá eno pa no kimiye chekeu akhopeu aphivilo puthugho akeu ithulu keno, pa no pazá vilo pi, “Totimio, O nu hi cheni,” 27eno akhopeu vilo ishi pi, “O zá hi chenie.” Tipathiu akhopeu hipau no li sasü pa ki lo sawuve.
Jisü Kithí
28Tithiu, Jisü ye thowkha kümtsü shikupuve keu ithive eno Kuchoyesü shikupu nike ghenguno, “Ni ye tüghüthi anie,” ipi. 29Alikoli lakhi lo akiqhizü ae, ike panongu no aghüshi pesü akiqhi zülo pütsü no aghüshi pe ayilo süloka lo sǘ no peqhe pe Jisü kichí lo sǘtsü. 30Kughou pa no akiqhizü yeluve keno, Jisü no pi, “Hiye shikupuvae.” Ti pive no pa ye pa kütsü pishiqhove püzü süthahuve.
31Ike tiye Hechekulu ghulhu Kukuto tsalà shia, eno thoghiu tsalà ye akimchi Sabbath tsalà shi niye ake. Jewmi sakiphemiqo ye Sabbath tsalà lo asükumoqo pesü krosqo lo qhipüa nishimo kehu panongu no asükumoqo apukhu hechheve no ikhiqhive nike Pilate qhüiniju. 32Tishive kehu aghükhemiqo no ighino Jisü gholo yeda pìthíve keu timi atüghiu pukhu hechheve, eno lakhiu pukhu hu ghí hechheve tsü. 33Ikemu kughou panongu no Jisü phivilo ighi keno pa ye thive aghí keu ithulu, tighenguno panongu ye Jisü pukhu hechhe keu shimove. 34Tishini ke züqhulo aghükhemiqo dolo lakhi no angu pesü Jisü jibo lo qhusü tsü, ikelo zülile no ajì ngò azü qò ipeghive. 35Tipau ithulu keu timi hu no ashepe tsü, eno pa shepe ye kuchou ke. Pa ye kuchou tsa piani kepi ithi ake, eno nongu ghí pülülu peniye pa no ashepe shike. 36Hi kümtsü shikeu ye Kuchoyesü lo hitoi akeu shikupu niye ke: “Paw asaghiqo lakhimu kubomo nani,”#19:36 Ipe 12:46; Akiki 9:12; Leshe 34:20 37eno Kuchoyesü a-a kütau ghí ishi pipüani, “Panongu no timi khuu qhuve keno panoqo no timi tipau ju nani.”#19:37 Zech 12:10
Jisü Qhove keu
38Tipathiu Arimathea nó ghami Joseph no Pilate vilo Jisü sükumo khu. Joseph ye Jisü khopemi lakhi kemu Jewmi sakiphemiqo msà keu ghenguno pa ye tuqhou no Jisü pape che. Ike Pilate’w puloza pesü pa no ighino Jisü sükumo pewuve. 39Pa gholo Nicodemus, timi khuu azüu putho lo Jisü sasü kusho keno, pa ghí pa küsa shiche ke. Nicodemus no müsüghüta ngò aloe sübo nika kitekungove keu ahukimighi shighi bidí qhalo pesü ighi. 40Pama no Jewmi asükumo qhoche keu kukhuaye kiqi lono Jisü sükumo pesü wuve no vepuju mkhu sǘ no phephei keu phì no küzüvetsü. 41Jisü yeda pìthíve keu-a lo aghutu lakhi ae, eno aghutu tipau lo timi khumu qho mphi keu kumoki akithé lakhi ae. 42Jewmi’w Hechekulu ghulhu Kukuto tsalà shia eno akumoki aphivilo akeu ghenguno Jisü sükumo ye tilehi qhove ke.
Currently Selected:
John 19: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
