John 18
18
Jisü Küghaluve Keu
1Kughou Jisü no akighini shitave keno pa no pa khopemiqo sasü wuve no Kidron khilaqa kathave. Akhilaqa hukukuu aghutu lakhi ae, ike Jisü eno pa khopemiqo no tile iloe.
2Ike Judas, khuu Jisü thechu shive keno, pa ye tipau-a ithi ae, kughengu Jisü no pa khopemiqo sasü tilehi ghuthu kutomo kusho ke. 3Ike Judas no ghüshimi mqo, achinetomiqo’w hiyampemi khami eno Phariseemiqo là kichesü aghutu lo ighi. Panongu ye akuluqhe, amizükulu, eno aghünanuqo pesü ighi.
4Jisü ye pa shou kiu shive niye akeno kümtsü ithi akeghi wu no panongu vilo ishi iniju, “Nongu ye khuu avehupu shi ani kea?”
5Panongu no khochile, “Nazareth nó ghami Jisü.”
Jisü no khochile, “Tihu ni ke.” (Eno thechu kishiu Judas ghí tilehi panongu gholo puthugho ae.) 6Kughou Jisü no, “Tihu ni ke,” ipi keno panongu ye athiu idewove no ayeghi lo iluqive.
7Itaghi Jisü no panongu vilo iniju, “Nongu ye khuu avehupu shi ani kea?”
Panongu no khochile, “Nazareth nó ghami Jisü.”
8Jisü no khochile, “Tihu ni ke ipi nongu vilo pivae. Tsalá nongu no I phu cheghi aye, timi hipaqo pelo wuve pelo.” 9Hipau shikeu ye pano atsa hitoi piqhipüa keu shikupu niye ke: “Ni ye nono I tsü keqo hu lakhimu püha mphie.”#18:9 Jn 6:9
10Ikelo Simon Peter khuu akihizüta peche keno, pa no tipau süjo pesü achinetomiqo shou atou qeu shou ghipuku no pa kìní küsave tsü. (Aqeu je ye Malchus ke.)
11Jisü no Peter vilo azah tsü, “O kihizüta süchileve lo! Ni ye Apù no aghime jikhu I pelo sho peniye tsü keu shomoni keshea?”
12Ikelo ghüshimi mqo eno panongu gholo zatsüu eno Jewmi’w hiyampemiqo no Jisü küghaluve. Panongu no Jisü tshüluve no 13atüghishi Annas lau saighi. Annas ye tipau mpe lo achinetomiqo shou atou shi ake eno Caiaphas ye pangu ke. 14Caiaphas ye Jewmi sakiphemiqo vilo timi lakhi no timiqo ghenguno thive keu pavi ke ipi mijetsü keu ke.
Peter no Atüghiu Milive keu
15Simon Peter eno akhopemi kütami lakhi pama ye Jisü pape che. Akhopeu hipau ye achinetomiqo shou atou ithi akehu pa ye Jisü gholo achinetou kikhala lo ilo ke, 16ikemu Peter ye khalau ahukikha lo ngokhe ae. Achinetomi shou atou sasü kilethi akeu akhopeu hu no khalau ideipe no ahukikha lo aqeu ilimi akeu pütsa püzü Peter sasü alou iloghive.
17Li no Peter vilo iniju, “No ghí timi hipau khopemiqo gholo lakhi ke kumo keshea?”
Pa no khochile, “Ni ye kumoe.”
18Mkomghai akehu aqemi eno hiyampemiqo ye lüvüi ngo nike ghenguno panongu ye ami shi no sühope ngo ae. Peter ghí panongu gholo pa likhi pa vapülü ghi puthugho ae.
Achinetomi Shou Atou no Jisü Vilo Iniju
19Tishi akelo, achinetomiqo shou atou no Jisü vilo pa khopemiqo ghili eno pa kükütsü vehu iniju.
20Jisü no khochile, “Ni ye ikhikiphe shi ayeghilomi vilo pivae. Ni ye alhokuthu Jewmiqo kümtsü no ighino kumqo chekeu-a synagogqo momu achineki lo kütsü achenie. Ni ye tuqhou shi kiumu pipüamoe. 21Kushiye I vilo iniju ani kea? I kükütsü chilu kemiqo vilo iniju lo. Panongu ye I no kiu pi keno mütsümishei ithi anike.”
22Kughou Jisü no hi pi keno, pa phivilo akemi hiyampemiqo dolo lakhi no Jisü gi lo ghatsü. “No ye hipau gholau no achinetomiqo shou atou khochile cheni keshea?” ipi pa no iniju.
23Jisü no khochile, “Tsalá I no kiuala pi pimive aghí aye kiu pimi ani keno pitsülo. Ikemu tsalá I no kuchou pi aghí aye, no ye kushiye I he ani kea?” 24Tisheno Annas no Jisü tshü pesü achinetomiqo shou atou Caiaphas lau puwuve.
Peter no Akiniù eno Aküthüu Milive keu
25Ike ti kutólo Simon Peter ye pa likhi pa vapülü ghi tilehi puthugho ae. Ikehu panongu no pa vilo iniju, “No ghí pa khopemiqo gholo lakhi ke kumo keshea?”
Pa no milive ghi ishi pi, “Ni ye kumoe.”
26Achinetomi shou atou qemi, Peter no akìní küsave tsü keu no sholokumi, no ishi pa khü, “Ni ye nono aghutu lo pa gholo chekeu ithulu ke kumo keshea?” 27Itaghi Peter no milive, ikelo tipa mtsa lono awudu no igha thuve.
Pilate Zülo Jisü Sasü Ighi
28Ikelo Jewmi sakiphemiqo no Caiaphas lau no Jisü sasü Rommiw angh kükaki lo sawu. Tishi akelo inaputho shive, eno panongu ye chine-chini lo kitiqe keu shimo nike ghenguno akükaki lo ilomove, kughengu panongu ye Hechekulu ghulhu chu niye shi ake. 29Ike Pilate no khalau ipeghino panongu vilo iniju, “Nongu ye timi hipau shou nguku kepuqo kiu süghi ani kea?”
30Panongu no khochile, “Tsalá timi hipau no ayeza heküxami shi aghimo ke aye, ningu ye pa kügha süwo O tsümoni cheke.”
31Pilate no pi, “Nongu no pa sawuve lo eno nolikhi no yeza kiqi lono pa shou xakütha shilo.”
Panongu no lachile ghi pi, “Ikemu ningu ye khiumu pìthíve kepu chipiu kühae.” 32Hitoi shikeu ye Jisü no kiu ghola lono thive niye ani keno pipüa keu shikupu niye ke.
33Pilate no kükaki alou ide ilove no Jisü ku püzü pa vilo ishi iniju, “No ye Jewmiqo kükau keshea?”
34Jisü no iniju, “Tiye O likhi nono kümsülu püzü iniju ani keo kütamiqo no I ghili pesü O vilo pi kea?”
35Pilate no khochile, “Ni ye Jewmi lakhi keshea? O likhi ow timi eno achinetomiqo no O pesü I u lo sǘ tsüke. No ye hiye kiu shive kea?”
36Jisü no pi, “I kükaphu ye hipau yeghiqha lau no kumoe. Tsalá tishiaghi aye, I qemiqo no Jewmi sakiphemiqo pelo I küghalu pemo nike lachileni cheke. Ikemu I kükaphu ye a-a kütau lono ke.”
37Pilate no pi, “Tishiaye no ye akükau lakhi keshea?”
Jisü no khochile, “Nono ni ye akükau lakhi kepi pi anie. Kuchou lo ye, I punú keu eno ayeghi hipau lo ighi keu kimiji ye kuchou thopi shipe niye ke. Kuchou küdau akemi kümtsü no I tsa chilu cheni.”
38Pilate no müghachhoi iniju, “Kuchou ye kiu kea?” Hipathiu pa no itaghi khalau Jewmi kumqo pe akemiqo lau ipe no pi, “Ni ye pa ngukube eno lachile kulupu kiumu phulu amoe. 39Ikemu nongu kukhuaye kiqi lo ni ye Hechekulu ghulhu ghuloki lo akughumi lakhi kuqhope nongu tsü cheni ke. Nongu ye I pelo ‘Jewmiqo kükau,’ kuqhopheve tsüpe nishi ani keshea?”
40Panongu no ighamuku khochile, “Moe, pa kumoe! Barabbas ningu tsülo!” Barabbas ye heqhi-buqhi keu kümlà shi chekemi ke.
Currently Selected:
John 18: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
