John 21
21
Jisü eno Akümzapushi Akha Khalu keu
1Tipathiu Jisü no Galilee#21:1 Greek tsa lo ye Tiberius ipi ani. züghi phivilo itaghi pa khopemiqo lau ipeghi. Hipa ghola lono ipeghi ke: 2Simon Peter, Thomas (Didymus#21:2 Greek tsa lono Thomas eno Arameami tsa lono Didymus ipi akeu pama kinikujo kiqi ye kümtsa punú keu ipi ani. ipi chekeu), Galilee lo Cana lono ighi keu Nathanael, Zebedee nu James ngò John, eno akhopemi kütami kini panongu kümtsa ngo ae. 3Simon Peter no panongu vilo, “Ni ye akha khau nike wuchea,” ipi kelo panongu no, “Ningu ghí O gholo wunie,” ipi. Ike panongu no wu püzü ashuka lo ilo, ikemu panongu ye tipau jì lo kiumu khamlave.
4Inaqhe itheno Jisü ye azü mükü lo puthugho ae, ikemu akhopemiqo ye tiye Jisü kepi mtha no ae.
5Jisü no panongu vilo pi, “Aküsàmiqo, nongu ye akha lakhimu khalu mphi keshea?”
“Khalu mphie,” ipi panongu no khochile.
6Jisü no pi, “Nongu khame pe ashuka ajeu küdau vesülo eno nongu no akha hami ithulu nanie.” Kughou panongu no tishi keno, panongu ye akha kutomo khalu keu ghenguno akhame sünhekide mülave.
7Jisü no kimiye chekeu khopeu hu no Peter vilo pi, “Hiye Ampeu ke!” Pa no, “Hiye Ampeu ke,” ipikeu chilu kemtsa Simon Peter no paw hekuuphi pesü pa phi küzüluve (kughengu pa ye aphì xave no ake) eno azü lo ilhe ilove. 8Akhopemi kütamiqo ghí ashuka gholo no akhame lo akha chhitoi sünhe pesü ighi, kughengu panongu ye azü mükü lono aunhekipishe 300 qhalo ake.#21:8 Momu meter 90 toi keu 9Kughou panongu no azü mükü lo ighi keno, amìyiqo piti iqü akeu shou akha ngò asho hami aghí keu ithulu.
10Jisü no panongu vilo pi, “Nongu no itehi akha khalu keu khami peighilo.” 11Ike Simon Peter no ashuka lo idewo mili iku püzü akhame azü mükü lo sünhe pesü ighi. Akha kijè 153 hu no akhame chhitoi ake, ikemu akha tishi kutomo akeghi akhame ye ixümoe. 12Jisü no panongu vilo pi, “Ighino müzüvekütha chulo.” Ike akhopemiqo khumu pa vilo, “No ye khuu kea?” ipi inijuni keumu shimoe, kughengu pa ye Ampeu kepi panongu no ithi ake. 13Jisü no ighino asho ikhilu püzü panongu tsüe, eno titoi akha ghí panongu tsüe. 14Jisü ye akithí lono xüputhuve kethiu hino aküthüu shi pa khopemiqo lau ipeghi.
Jisü no Peter Sasüchile
15Kughou panongu no chuqhive keno, Jisü no Simon Peter vilo pi, “John nu Simon, no ye thime hipaqo nguno alau I kimiye chenima?”
Simon no pi, “Iyei, Ampeu, I no O kimiye chekeu nono ithi anie.”
Jisü no pi, “Iw ambetiqo lojí lo.”
16Itaghi Jisü no pi, “John nu Simon, no ye I kimiye chenima?”
Pa no khochile, “Iyei, Ampeu, I no O kimiye chekeu nono ithi anie.”
Jisü no pi, “Iw ambeqo tucho-mjo lo.”
17Ghuthu aküthüu Jisü no pa vilo pi, “John nu Simon, no ye I kimiye chenima?”
Jisü no ghuthu aküthüu ghi, “No ye I kimiye chenima?” ipi iniju keu lo Peter ye alosüve. Pa no pi, “Ampeu, nono thowkha kümtsü ithi anie; I no O kimiye akeu nono ithi anie.”
Jisü no pi, “Iw ambeqo lojí lo. 18Kuchou no I no nongu vilo pìní, kughou nongu no alhothe shiche keno nongu ye nongu kutoshi tiphimini pepu no nongu no wu nishi keu-a lo wuche; ikemu kughou nongu no kitemi shiveni keno nongu ye nongu u chhope ngo püzü kütami no nongu ghili kutotsü nani eno nongu no wuni shimo keu-a lo sawu nani.” 19Jisü no hi pikeu ye Peter ye kiu ghola lono thive no Alhou juküvüpu shitsü nani keno tipau kichetsü ake. Tipathiu pa no Peter vilo pi, “I papelo!”
20Peter no idewo ju kelo Jisü no kimiye chekeu akhopeu hu panongu pape chekeu ithulu. (Hiye aghulhu chu akelo Jisü thikhau mungupe no, “Ampeu, khuu no O pesü thechu shi niye ani kea?” ipi iniju keu ke.) 21Kughou Peter no pa ithulu keno, pa no iniju, “Ampeu, pa ye kíshi nani kea?”
22Jisü no khochile, “Tsalá I no ideghimo ke kutólo pa pelo xüaghi penishi aye, no ye kiu shilo pi kepu ania? No ye I pape moayesae.” 23Hi ghenguno, akhopeu hipau ye thimo nani ipi küpülümiqo dolo uyewu tsa kügha wove. Ikemu Jisü ye pa ye thivemo nani ipi pimoe; Jisü ye, “Tsalá I no ideghimo ke kutólo pa pelo xüaghi penishi aye, no ye kiu shilo pi kepu ania?” ipikeu likhi pike.
24Thime hipaqo thopi shi eno yèpeqhi keu ye akhopeu hipau ke. Paw thopi ye kuchou kepi ningu no ithi anie.
25Jisü ye thime kütau ghí kutomo shike. Tsalá tipaqo kümtsü yèpe qhike aye, I no kümsüju kelo kaku yèpeqhi keu tipaqo pesü ayeghiqha kuchopu lo qhi kepu chebo kühave nanie.
Currently Selected:
John 21: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
