Luka 4

Sərtakə tə Dzə Yesu kwa Takəu

(Mat 4:1-11; Mar 1:12-13)

1Yesu, nyinyinyi na shanguɗə Karti, cha hya'ati hi Urdun. Ngə Shanguɗə Karti tə nəu nacha gwa takəu, 2tangnda sərtakə tə dzə nyi nə hanyi fwaɗəkumənyi. Aku hanyi inga a da cha səm sə wa, atə udiya nyi, cha ngatə huɓwa.

3Ngə sərtakə tə nar nyi, “Macha Zər Hyel ka, nar nyi nə hangu ina, nda ɗa ka gwazhilakəu.”

4Yesu tə wuma, “Tsəftsəfənyi ku likatəkata, a ndə do ngya ka gwazhilakə tanyi wa.”

5Ngə sərtakə nda nəu na cha gyati mə dzəgaməu, ga char nyi təlkur dunəya dəhəu aku bəji kushiu, 6cha nar nyi, “Yo nənghə dəhə gyalkur kənda ana səli kənda, aka a na'a nji na'a əngə tsəu yo nau nə nyi nə ndə nda yo i. 7Yo nə ngha, maka uzhi ga hətə ɗa səli.”

8Ngə Yesu tə ɓəlakə nyi, “Tsəftsəfənyi, ka həsəli nə Hyel Tlakə ngha, kəl a nənyi tanyi ko mər mavakur.”

9Ngə sərtakə tə təra na Yesu gwa Urshalima, ga ta'ində nyi kyatə mbwa dzəgam nə Mbwa'alə Hyel, ngə cha nar nyi, “Macha Zər Hyel ka, fəl səya hu'i. 10Aka tsəfətsəfə nyi cha ənda,

‘Cho nar nyi nə Chama nyi

nda ɓəlatə nghə mənakəu.

11Nda kwa tsautə nghə ku cha nda,

tsa kə da ba'a dəgəya hya kə tə hangu.’ ”

12Ngə Yesu tə ɓəlakə nyi, “Tsəftsəfənyi, əngwa ka da dzə Hyel Tlakə nghə wa.” 13Ahir sərtakə tə wur na dzə Yesu, ngə cha ngya nyi kəl vanya bəji.

Nja Ngyar Yesu vu Nazarat

(Mat 13:53-58; Mar 6:1-6)

14Ngə Yesu tə ɓəl yi Galili, gyalkur Shanguɗə Karti tsa'a nacha. Ɓwanya nyi tsə'u a ma'i tə mada abari. 15Cha dlədləɓə ku vi pətlənya kənda i, madawa kwa fal nyi.

16Ngə cha shili vu Nazarat, mələm nda cha hə kwa. Pəshir ngyaməngya, cha go vi pətlənya wi nda cha tsəl ni. Nda cha hya'atə ka cha mər kəratsən, 17ngə nja lətənyi likatəkatə nə Ishaya ndər mətakər Hyel. Cha waliya ga uya mbwa nda nja tsəfə bəra, 18“Shanguɗə nə Tlakə təkəra ya, aka cha tabiya ɗa ka ga ya shili na Mafakə Mənakə nə njir ɗali. Cha sə ɗa ya bəzə ənda nja kwa dəliya nji'inda ku jarum, nji'inda wuləfəu kwa ghəya na la'a səu, nja kwa pələya nji'inda kwa mər mavakur. 19Ana ya bəzəya ənda bəji ɗatə nda Tlakə kwa dləuya nənyi na nji.”

20Ngə cha pəɗətə likatəkatə nda ga ɓəlandənyi nə ndər gəza, ngə cha səya ngya. Dəhə nji'inda ku vi pətlənya nda, a pətə li təcha nda kwa ndzam nyi. 21Ngə cha na, “Səngə nja tsəfətə ku likatəkatə nə nyabiya tə dzə ənya wi ngə hya ngatə na hima hi.” 22Dəhə nji kwa fal nyi nda kwa mər məngəl na ɓwanya mənakə nda kwa biya ku nya cha. Nda kwa jau tsa kərnənda, “A zər Yusufu nda nə wa ya?”

23Ngə Yesu tə nar nda, “A kəpal dawa hyo nau par ɗa karapə na, ‘Ndər kuzəkəu, mbandə kərngha,’ hyo nau nar ɗa tsə'u, ‘Mər səshinshin inda ea ngatə ka mər vu Kafarnahum inda ku mələm ngha.’ ”

24Ngə cha tsakətə nar nda, “Jiri yo nar hi, a ndər mətakər Hyel da na səli ku mələm ya nyi wa. 25Jiri yo nar hi, aku bəjir Iliya, mahi'ifi da ɗang tə hə'i Isra'ila nda kwa i nja vala nda ku bəji nda huɗamələm tə haɗətə dza a par dawa nə fa makərəu ana hya kwah, huɓa tlə 'ual 'ualəu ku dəhə hə'i Isra'ila. 26Kəl ja, a da nja sə Iliya yada mada zhang ku huɗa nda wa, kəl malafi nda hi Zarafat ləha dzər mələm Sidon. 27Aku bəjir Ilisha ndər mətakər, njir bibi da ɗang ku Isra'ila, kəl ja, a da nja chinda mada zhang ku huɗa nda wa, kəl Na'aman ndər Suriya.”

28Nda nji'inda ku vi pətlənya ngatə ngəna ɓwanya, ngə nda mər huɗətla 29ga təɗətə Yesu biyahir mələm, nda təra nacha gya nya dəgəl nda nja hər mələm kənda ti, nda kwa i nda mbəliya nyi səya kyatə dəgəl nda, 30kəl cha gwatanyi ku pama nda ga ma'i tanyi.

Yesu tə Gədləbiya Məlləm ku Kəra Ndəu

(Mar 1:21-28)

31Ngə Yesu tə təra yi Kafarnahum, vanya mələm tə hə'i Galili. A hinda, cha dlədləɓə nə nji pəshir ngyaməngya. 32A hinda tsə'u nja mər məngəl na dlədləɓə nyi, aka cho ɓwanya na gyalkur.

33Vanya ndə da na məlləm ku kəra cha ku vi pətlənya nda, cha hya'andə kurakə ga na, 34“Ha! Yesu ndər Nazarat, mi ko gwa'a tsa ea? Aa ka shili ka kə kuɗənda ea ya? Kwa zəndə ya ndara wa ka, nakə ngə ndə karti nə Hyel.”

35Ngə Yesu tə tsətə məlləm nda, “Bəgə ɗiyu!” Ngə məlləm nda dəgətənyi hə'i nə ndə nda ga biya ku cha, a da cha takasiya nyi wa.

36Dəhəkura nji tə mər məngəl, nda kwa na nə kərnənda, “Chul ɓwanya mi nə əna? Ana dunama ana gyalkur ndə na gədləbiya məlləm, ya nda biya!”

37Səngə Yesu tə mər nga tə gwa'atə nji kwa ɓwanya təkəra cha mada amani tə hə'i nda.

Yesu tə Mbandə Nji Ɗanghəu

(Mat 8:14-17; Mar 1:29-34)

38Yesu tə ngyar vi pətlənya ga təra yo ki Shiman, ngə nda nar nyi ənda amanya mala Shiman tə piya na gyang. 39Ngə cha yi uzhi ləhə dzər sərpiya mala nda, ga tsə gyang nda, ngə gyang nda wuniya nyi, ngə cha hya'ati ga ghəya mər sərsum nə nda.

40Nda pəchi tə təɗa, nja shili na njir shiləka pampam ɗang nə Yesu, ngə cha fəkə nyi chi nə madawa ku huɗa nda ga mbandə nda. 41Yesu tə gədləbiya məlləm ku kəra nji ɗanghəu, nda kwa ləlla nda kwa na “Naka, Zər Hyel ka!”

Kəl ja, Yesu tə tsətə nda, ga katə nda tsa ɓwanya, aka zəndə nda ənda nacha ngə Kəristi.

Yesu tə Bəzə Mafakə Mənakə ku Vi Pətlənya i'i

(Mar 1:35-39)

42Nda vi tə wura, Yesu tə ngyar mələm nda ga ki gwa'ar vanya mbwar ngya zhang tanyi. Ngə dlama nji tə shili, nda kwa gwa'a nyi, ahir nda uya nyi ngə nda gwa'a ənda nda kwa ɗana katə nyi tsa cha da təra. 43Ngə cha nar nda, “A kiti ya ma'i na Mafakə Mənakə nə təlkur Hyel nə alenya mələm, aka əngə sənda nja sə ɗa kari.”

44Əngə cho ma'i cho bəzə Mafakə Mənakə ku vi pətlənya inda ku hə'i njir Yahudiya.

Currently Selected:

Luka 4: hbbNT

Highlight

Copy