Luka 5

Yesu tə Ɗəmtsə Tangərmar Shawa Nyi

(Mat 4:18-22; Mar 1:16-20)

1Vanya pəchi, Yesu tə ta'i nya dəl Janisarata. Nji tsəu kwa mbəla kərnənda ya kəra cha ka ga nda ngatə ɓwanya Hyel. 2Ngə Yesu tə la'a alenya param tsa'a mətləu anya dəl nda, njir timi kalfi tə ngyari ga təra ki chi hiɗi kənda. 3Zhang ku huɗa param inda nə Bitrus cha, ngə Yesu tə gwa ngyata nyi kwa, ga gədi Shiman cha mbəlar param nda kush gwatə ɓiti. Ngə cha ngyata nyi kwa cho dlədləɓə nə nji.

4Nda cha wur na ɓwanya, ngə cha ɓəla nar nyi nə Bitrus, “Tsakətə mbəlar param ngə gwatə mbwa nda ɓiti ndzuɗakə ti, hya fəu hiɗi kəhi hya təɗəbiya kalfi.”

5Shiman tə nar nyi, “Tlakəu, dəhə vu'i ea mər tləra, ya a səda səya ea wa, kəl ja, manə ka na ənga, yo ɓəla səu hiɗi səkəu.” 6Ahir nda vakəu hiɗi kənda, təma nda səya kalfi dang gagaɗa hiɗi kənda tə ghəya tlətla. 7Ngə nda gwa'a vala tsa kuvan nda njir timi kalfi inda ku vanya param nda. Ngə nda nyandə param inda kya'a na kalfi, ngə param inda ghəya na təra səyo ndəla ɓiti aka tədəɓəkura kalfi inda. 8Nda Shiman Bitrus tə la'a sənda ɗa, ngə cha uzhi mar Yesu ga na, “Tlakəu, ngwa ka da shili ləhə dzə ɗa wa, ndər mər səpəla'a ya!”

9Shiman ka alenya nji'inda tə mər məngəl ana chul kalfi inda nda səya. 10Əngə ma'a ka Yakubu ana Yohana nguli Zabadi bazhi timi ka Shiman. Ngə Yesu tə nar nyi nə Shiman, “Əngwa da ngatə ləvər wa, fwatə sakana ana a biyama, a tsə'u ko timi kalfi wa, ko ɗa ka ndər nga nji shili da ya.” 11Ngə nda təɗəbiya param kənda zəbiya nya bam, ga ngyar dəhə sə tangnda ga nəu Yesu.

Yesu tə Mbandə Ndər Bibi

(Mat 8:1-4; Mar 1:40-45)

12Yesu tə shili ku vanya mələm, vanya ndə da, nda bibi tə ɗənya dza cha ku mələm nda, nda cha la'a Yesu ngə cha uzhi ma nyi ga gədi, “Tlakəu, macha kwa i ka, kwa nau kə mbandə ɗa ya ɗa chaməu!”

13Ngə Yesu tə ha cha cha ga tsəka nyi ni, ga na, “A i tiya, mbə ja.” Təma ndə nda mbə na bibi nda. 14Ngə Yesu tə tsau nyi bar, “Ngwa ka dəkə nə madawa wa, kəl nda ka ki char nyi kərnghə nə fərist, ana ka handa təmachi, tang wi nda gadlagadla Musa tə na, ga ka charə nyi nə dəhə nji ənda mbətə ka.”

15Dəhə ka ənga, kəl ka biyama, ka biyama tanyi ɓwanyar Yesu kwa ma'i, nji ɗang kwa shili da cha ka ga nda səhimi da cha, nda kwa gwa'a cha mbandə nda shiləkə kənda i. 16Kəl ja, Yesu kwa maka ma'i kyatə mbwa nda a ndə da nda wa, ka ga cha pətlənya.

Yesu tə Mbandə Ndə Zəza

(Mat 9:1-8; Mar 2:1-12)

17Vanya pəchi, Yesu kwa dlədləɓə nə nji, njir Farisi ana ka maləm gadlagadla Musa hya'atə tə mbwa pampam ku Galili ana hə'i Yahudiya daɓə mələm Urshalima tsatlə tangnda. Gyalkur Hyel tsəu tsa'a nacha ka cha mbandə njir shiləka. 18Ngə alenya nji tə shili na vanya ndə tə sərpiya nyi nda dza cha kuɗiyadza, nda kwa gwa'a ka nda həu nyi go ta ki nda, nda pinda nyi biyamar Yesu, 19kəl ja, a da nda uya laku wa aka dlama nji. Manda nda la'a ənga, ngə nda gi pakənda kəra pakəu ga ləu ndə nda dəhə ka sərpiya nyi səya mar Yesu ku dlama nji.

20Nda Yesu tə la'a jirikur nji'inda, ngə cha nar nyi nə ndər shiləkə nda, “Bazhi, a fartə nji bikə ngha.”

21Ka maləm gadlagadla Musa ana njir Farisi tə ghəya jigadəma ku ɗufwa nda, “Ndə manə nə kwa pə ɓwanya həyatəvi əna! Wa ndə nda na gyalkur farbikər səpəla'a matsa Hyel zhang tanya?”

22Yesu zəndəbiyatə sənda ku ɗufwa nda, ngə cha nar nda, “Mya gwa'atə hyo jigadəma əngə ku ɗufwa hya? 23Manə ngə kus lya, nja na, ‘A fartə nji bikə nghə zəma,’ aa nja na, ‘Hya'atə ka ma'i?’ 24Kəl ja, ga hya zəndə ənda gyalkur farbikər səpəla'a da tsa zər ndə tə dunəya na.” Ngə cha nar nyi nə ndə nda dza cha kuɗiyadzə nda, “Hya'ati, hətə sərpiya ngha ka təra kyo ki.”

25Təma ndə nda hya'atə madawa kwa ndzam nyi, cha pəɗətə sərpiya nyi, ga təra kyo ki, cho fal Hyel. 26Ləvər tə səya nji'inda nda kwa mər məngəl nda kwa fal Hyel, nda kwa na, “A la'atə ea sər məngəl ənya ja.”

Yesu tə Nga Levi

(Mat 9:9-13; Mar 2:13-17)

27Ahir nga, Yesu tə biya ga la'a vanya ndər tsəm tsachi, tləm nyi Levi, atə ngya tə vir tsəm tsachi, ngə cha nar nyi, “Nəu ɗa!” 28Təma Levi tə ngyar dəhə sə tangnda, ga nəu Yesu.

29Levi tə nga Yesu ka ladər dəgal nda cha ɓatliya ku ki nyi. Dlama njir tsəm tsachi da tsəu, ana alenya nji'inda tə ngya ka səm sərsum kə'i nda. 30Kəl njir Farisi ka maləm gadlagadla Musa, tə ghəya jiganya nə shawa Yesu, “Mya gwa'atə hyo səm sərsum ka njir tsəm tsachi ka njir mər səpəla'a?”

31Ngə Yesu tə wum nə njir Farisi inda, “Nji yiying do gwa'a ndər kuzəkə wa, Kəl njir shiləka. 32A da ya shili ka ya nga njir mər sə tsa'atsa'a wa, kəl nda njir mər səpəla'a, nda tubi.”

Nja Jau Yesu təkəra Səmdzən

(Mat 9:14-17; Mar 2:18-22)

33Alenya nji tə nar nyi nə Yesu, Mya gwa'atə shawa Yohana ana nə Njir Farisi kwa səmdzən ana pətlənya, ya shawa nghə nə ngha kəl sa ana səm tanyi nda kwa məra?

34Ngə Yesu tə wuma, “Aman ka bazhinya sal gambəl kwa səmdzən ya tsəu tanda ka sal gambəla? 35Kəl nda bəji kwa shili nda njo hənda sal gambəl. Sakanda ngə nda kwa dzəgwa səmdzən.”

36Ngə Yesu tə mərtə nda ba'ada ga na, “A ndə da kwa tatsə taɗər ləkutə ka ga cha səbiya ləkutə halhal nə wa. Aka macha mər ənga taɗər ləkutə nda kwa səwa, ya ləkutə halhala ana taɗənyi da kwa daɓə wa. 37Ya a ndə nda kwa pəu taɗər ɓitir anap ku salakam halhal wa, aka macha mər ənga, taɗər ɓitir anap nda kwa pətlənda salakam, taɗər ɓitir anap nda kwa pəa, ya salakam nda tsəu kwa pətla. 38Taɗər ɓitir anap ja, tuku nja pəu gu taɗər salakam! 39A ndə da kwa i sa taɗər ɓitir anap ahir cha sa ɗəɗəm nyi wa. Cho na, bəliya ɗəɗəmənyi nda!”

Currently Selected:

Luka 5: hbbNT

Highlight

Copy