Luka 6

Jau təkəra Ɓəlatə Pəchir Ngyaməngya

(Mat 12:1-8; Mar 2:23-28)

1Atə vanya Pəchir Ngyaməngya, Yesu ka shawa nyi kwa ma'i tahə fa alkama. Ngə shawa nyi inda ghəya satə alkama nda, nda kwa kəkəɗə ku cha nda nda kwa ɗəa. 2Alenya njir Farisi tə jawa, “Mya gwa'atə hyo mər sənda gadlagadla tə katə nji tsa mər tə Pəchir Ngyaməngya?”

3Ngə Yesu tə wum ga nar nda, “A da hya kəratsəntə sənda Dauda tə mər ku bəji nda huɓə tə mbatsə nyi, nanda ka nji'inda kwa ma'i kə'i cha wa ya? 4Cha gwa ku vi həsəli nə Hyel ga gwa hətə gwazhilakə nda nja fiya mar Hyel ga ɓangha, sənda a da tsa'atsa'a ku gadlagadla kənda wa, nda kəl ka fərist ngə kwa kina ɓangha, cha nənyi ma'a nə nji'inda cha kə'iri.” 5Ngə Yesu tə udiya ga na, “Zər Ndə ngə Tlakəu, ma'a nə Pəchir Ngyaməngya.”

Yesu tə Mbandə Vanya Ndə tə Pəchir Ngyaməngya

(Mat 12:9-14; Mar 3:1-6)

6Vanya Pəchir Ngyaməngya, Yesu tə gwa ku vi pətlənya cho dlədləɓə nə nji. Vanya ndə nda kunda, nda chisəma cha tətənyi. 7Ngə Njir Farisi ana Maləm gadlagadla inda kwa gwa'a laku nda ndo səya Yesu na bikəu, nda kwa ndzam nda la'a ndara Yesu kwa mbandə ndə tə Pəchir Ngyaməngya. 8Yesu zəndəbiyatə sənda ku jigadəma kənda. Ngə cha nar nyi nə ndə nda, “Hya'atə ka shili ta'i tangna.” Ngə ndə nda hya'ati ga shili ta'i tangnda. 9Ngə Yesu tə nar nda, “Yo jau hi, mi sənda gadlagadla na nja mər tə Pəchir Ngyaməngya? Sə mənakə zəma aa səɗimi? Nja mbəɗandə pi zəma aa nja tsəya?” 10Ngə cha ndzamtə nda dəhə nda, ga nar nyi nə ndə nda, “Ndəɗabiya cha ka.” Ngə cha ndəɗabiya cha cha, təma cha cha nda mbəa.

11Ngə Njir Farisi ana Maləm dlədləɓə gadlagadla inda mər huɗətla gagaɗa, nda ghəya ɓwanya ku pama kərnənda təkəra sə nda nda kwa mərtə nyi nə Yesu.

Yesu tə Ɗəmtsə Shawa Kwabəmətləu

(Mat 10:1-4; Mar 3:13-19)

12Aku hanyi inga Yesu tə təra gyo maka cha pətlənya, həm hanyi cho pətlənya nə Hyel. 13Nda vi tə wura, ngə cha nga shawa nyi inda ga ɗəmtsə nji kwabəmətlə ku huɗa nda, cha fəndzə nda tləm, “Changhabal.” 14Shiman (nda Yesu tə fəndzə nyi Bitrus). Ana Andrawus zamə nyi, Yakubu ana Yohana, Filibus ana Batalamaus, 15Matta ana Toma, Yakubu zər Halfa, ba'a Shiman (nda njo nga ndər nyida hə'i nyi), 16Yahuda zər Yakubu, ba'a Yahuda Iskərayoti nda tləɗanda nyi. 17Ngə cha təra səya ka nji'inda cha ɗəmtsə inda, ngə Yesu tə ta'ita nyi tə vanya mbwa nda na babal 'ualəu, ana alenya dlama shawa nyi. A tangnda tsəu jan nji ɗang hya'atə tə mbwa pampamə ku hə'i njir Yahudiya, ana Urshalima, ana mələm Taya ana Sidon inda nya fa'a dəgaləu. 18Nda shili ka ga nda ngatə Yesu, ana nda uya nja mbandə nda na shiləkə kənda pampaməu. Nji'inda məlləm kwa chinda tsə'u a mbandə nda tə nji. 19Madawa kwa i cha tsəkar Yesu, aka gyalkur da kwa biya ku dza cha nda kwa mbandə nji.

Yesu tə Səkə Nyi Papa'akur nə Nji

(Mat 5:1-12)

20Yesu tə ndzamar shawa nyi i ga na,

“Njir papa'akur hi, njir ɗali,

hyo uya təlkur Hyel!

21Njir papa'akur hi nji'inda kwa ngatə huɓə sakana,

aka hyo nyi!

Njir papa'akur hi,

nji'inda kwa tiwi sakana,

aka hyo mər hirgyaɗi!

22Njir papa'akur hi ma nja ngya hi,

nda tlabiya hi,

nda kwa ngəl hi

nda kwa na ənda nji pəla'a hi,

aka Zər Ndəu!

23Ma sə wi ngə tə ɗa,

məra ma hirgyaɗi,

hya utsa ana hirgyaɗi,

aka zhar kəhi 'ualəu kya huɗamələm.

Tang wi ngə tanyi ka jival kənda tə mərtə nyi

nə njir mətakər Hyel inda təra yahi.”

24“Kəl ja,

sər təhuɗə nahi

Nji'inda na gəna sakana,

aka a wurtə hya uya məsəɗakur ngya kəhi!

25Sər təhuɗə nahi, nji'inda nyinyinyi sakana,

aka hyo ngya na huɓwa!

Sər təhuɗə nahi nji'inda kwa gyaɗi sakana,

aka hyo mər huɗətla, hya kwa tiwi!

26Sər təhuɗə nahi,

nahi inda nji kwa fala,

aka əngə tanyi ma'a ka jival kənda tə mərtə nyi nə

njir mətakər gəzhi.”

Hya Nyida Njir Dawa Kəhi

(Mat 5:38-48; 7:12a)

27Yo nar hi, nahi inda kwa sə hima da ya, nyida ma njir dawa kəhi, hya mərtə nyi mənakəkur nə nji'inda ngya hi. 28Səkə nyi ma papa'akur nə njir ngəl hi, hya pətlənya ka nji'inda kwa izza hi. 29Ma ndə nda dəgəu nghə chi ku judla kə zhang, shar nyi vanyi tsəu. Ma ndə nda dləuya daura ngha, səɗəya nyi ləkutə nghə tsəu. 30Nənyi nə dəhə ndə nda gədi sə tsa ka. Ma ndə nda dləuya vanya sə tsa ka, ngwa ka da gwa'a cha ɓəlandə nghə wa. 31Mərtə nyi ma nə nji wi sənda hyo i nja mər nə hi.

32“Macha kəl nji'inda kwa nyida hi tanyi hyo nyida ya, aman hyo ɗana uya papa'akura? Mada njir mər səpəla'a ma'a kwa nyida nda nji'inda kwa nyida nda. 33Macha kəl nə njir mər mənakəkur nə hi tanyi hyo mər mənakəkur ya, aman hyo ɗana uya papa'akura? Əngə tanyi ma'a njir mər səpəla'a kwa ɗa. 34Ya aman hyo uya papa'akur, macha kəl nə ndə nda kwa nau kinda hi məl kəhi hya kwa tlə məla? Mada njir mər səpəla'a kwa tlə nda məl nə kuvanda, ga nda uya nja kinda nda tsa'atsa'a! 35Əja, nyida ma njir dawa kəhi, hya mərtə nda mənakəkur, tlənda ma məl ngwa hya har kəl nja kinda hi wa. Ma hya mər ənga, hyo uya zhar kəhi 'ualəu, ya hyo ɗa ka nguli Hyel. Aka kwa mər cha mənakəkur nə nji'inda pa'a kwa usaku ana nji pəla'a. 36Ngya ma na təhuɗəu, tang wi nda Adan hi ndər təhuɗəu.”

Ngwa Hya da Tlanda Nyi Nəuma nə Madawa wa

(Mat 7:1-5)

37“Ngwa hya da mbakənyi bikə nə madawa wa, tsa Hyel da mbakə hi bikə tsəu. Ngwa hya da tlanda nyi nəuma nə madawa wa, a Hyel do tlanda hi nəuma tsəu wa. Far ma bikər madawa, nahi tsəu Hyel kwa farbikə kəhi. 38Nənyi ma nə madawa, nahi tsəu njo nə hi, shala nda nyi zəvzəvəu, njo shabiya hi. Shala nda hya dəkə kwa nə alenya nji, nacha njo dəkəu hi kwa.” 39Ngə Yesu tə nənda vanya ba'ada ga na, “Ndər wuləfə kwa nau cha chatə nyi laku nə kuvanyi ndər wuləfəu ya? Macha mər ənga, kya'a nda kwa pəpə gu ka'u. 40A shawa da kwa ndəɗə maləm nyi wa, kəl ja, dəhə shawa nda udiya kəratsən nyi, cho ɗa wi maləm nyi.”

41“Mya gwa'atə ko ndzam zər ngəɗəkə nda tə lya kuvangha, ya a da ko ɗəngha na zəmər gang nda tə lyakə wa?”

42“A da ko nau nar nyi nə kuvangha, ‘Zama, ta'i ya hənda nghə ngəɗəkə tə lya ka,’ nakə nda pa'a do nau la'a zəmər gang nda ku lyakə wa. Ndə dəmən, ka ghəya hənda gang nda tə lya ka, tsa'aka ko nau la'a sə mənakəu ko hənda nyi ngəɗəkə tə lya kuvangha.”

Njo Zəndəbiya Chul Wua təwa Yayanyi

(Mat 7:16-20; 12:33-35)

43“A wu mənakə da kwa ya nguli ɗimi wa, ya wu ɗimi da kwa ya nguli məsəɗakə wa. 44Kala wua, njo zəndəbiya təwa yayanyi. A njo ɗəm yayar kanda ku wur shikəɗi wa, ndara yayar anap ku wur shikəɗi wa. 45Ndə dur kwa nau mər sə mənakəu aka sə'inda ku ɗufwa cha mənakəu. Kəl ja, ndə pəla'a kwa mər səɗimi aka sə'inda ku ɗufwa cha pəla'a. Sənda nyandə ɗufwa ndəu, nacha cho pəa.”

Njir Hər Mətlə ana Hyavi Kənda

(Mat 7:24-27)

46“Mya gwa'atə hyo nga ɗa Tlakəu, Tlakəu ya a da hya kwa mər sənda ya na hya mər wa? 47Yo char hi sənda ndə nda tə shili da ya, ga səndzə himi daya, ga mər sənda ya nar nyi cha məra kwa pabiya da. 48Pabiya da ndə nda kwa gwa'a hər ki nyi cha, cha labiya hyavi ndzuɗakəu ga ghəya hya vi tə fafa. Nda dəla səya, mandza dəgə ki nda, dəhə ka ənga a ki nda nda dzədzi wa. Aka nja səya hya ki nda tə fafa. 49Kəl ja, dəhə ndə nda tə ngatə ɓwanya ɗa, ya a da cha mər tlər nə wa, məlməl tanyi na ndə nda hərtə ki nyi tə mishishiu'a. Nda dəla səya, mandza tsə'u tə dəgə ki nda, təma ki nda səya ghərəzhəu.”

Currently Selected:

Luka 6: hbbNT

Highlight

Copy