Luka 3
3
Ɓwanya nda Yohana Ndər Mər Baɓtisma tə Dəka
(Mat 3:1-12; Mar 1:1-8; Yoh 1:19-28)
1Aku kwabətufəkunya far təlkur Kaisar Tibariyas, ku bəji nda Buntus Bilatus kwa səm təlkur a hi Yahudiya, Hiridus kwa səm təlkur vu Galili, zamə nyi Filibus kwa səm təlkur hi Ituriya ana Trakunitis Lisaniya tsə'u kwa səm təlkur hi Abiliya. 2Aku bəji nda ka Hanana na Kayafa ngə gau fərist, əngə ɓwanya Hyel tə shili nə Yohana zər Zakariya kwa takəu, 3cha nəubiya hə'i inda ɓandə dəl Urdun nda dəhəu. Cho bəzə ɓwanya Hyel, ənda nja tubi, nja mərtə nda baɓtisma ga nda uya farbikər səpəla'a. 4Wi nda cha tsəfətsəfə nyi ku likatəkatə Ishaya ndər mətakər Hyel,
“Kurakəu kwa nga kwa takəu,
ɓatliya ma laku nə Tlakəu,
mərtə laku tandar nənyi.
5Dəhə dakə kwa nyabiya dzəa,
nja məməliya məa ana dəgəl dəhəu.
Laku nganga nja hya'abiya ta'iu,
nja mərtə laku inda ɓwaɓwa'a ɓeɓetəu.
6Ya dəhə sə ndə ndəu kwa la'a dləuya nə Hyel.”
7Yohana tə nar nyi nə daɓədzər nji'inda kwa shili da cha aka ga cha mərtə nda baɓtisma nda, “Nahi nguli tsapəu! Wa təɗar hima hi, hya hwi tsa huɗətla ngo shili nga? 8Mər ma sə nda kwa char ənda tubi təhi, ngwa hya na nə kərnəhi, ənda ‘Adan ea Ibrahim wa.’ Aka yo nar hi, Hyel kwa nau yanda ngulisha'a nə Ibrahim ku huɗa hangu ina. 9Aka a səu tə nji kəm ku ngilangha wua, ya dəhə wu nda pa'a kwa ya nguli mənakəu njo gəganda nyi njo pəu ku hu'u.”
10Daɓədzə nda jau nyi, “Mi eo mər sakanə ja?” 11Ngə Yohana wum ga na, “Ndə nda na ləkutə mətləu cha təkəya na ndə nda pa'a da ni, ana ndə nda na ɗəfə tsəu cha mər ənga.”
12Njir tsəm tsachi tsəu tə shili aka ga nja mərtə nda baɓtisma. Nda jawa, “Maləm, mi eo kina məra?”
13Ngə Yohana tə ɓəlakə nda, “Ngwa hya da dləu matsa wi nda njo gwa'a hya dləu wa.”
14Əngə tsəu ka ləvaləva tə jau nyi, “Mi ea mər tsəu'a?” Cha nar nda, “Ngwa hya da dləu guratsə wa, ya ngwa hya da nənyi bikə nə nji ɓwa'atanyi wa, hya ngya aka sənda njo ki hi.”
15Nji'inda kwa səka ana fəkər dəhə nda kwa jigadəma ku ɗufwa nda ənda ndara Yohana ngə Kəristi nda. 16Ngə Yohana nar nda dəhəu, “Naya yo mərtə hi baɓtisma ana ɓiti. Kəl ja, vanya ndə da, nda a ndəɗə ɗa na gyalkur kwa shili, mada sər mba ɓiɓi nyi a da ya nji ka ya pəliya wa. Cho shili mərtə hi baɓtisma ana Shanguɗə Karti ana hu'u, 17shala pi nyi ku cha cha, aka ga cha tsəkənda lar nyi mənakəu, cho tsəkəu alkama gu val nyi ana cho nginda chachang ana hu'u kəla tah.” 18Ana ɓwanya ɗang Yohana tə fətənyi ɗufəu nə nji ga bəzəya nda Mafakə Mənakəu.
Hiridus tə Fəu Yohana ku Jarum
19Aku bəji nda Yohana tə guhi təl Hiridus təkəra Hirudiya mala zamə nyi nda cha həbiya, ana alenya səɗimi nda cha məra. 20Hiridus tə tsakətə bikəu a təkəra sə'ingə dəhə ga fəu Yohana ku jarum.
Yohana tə Mərtə Nyi Baɓtisma nə Yesu
(Mat 3:13-17; Mar 1:9-11)
21Ahir nja mərtə nyi baɓtisma nə dəhə nji, nja mərtə nyi nə Yesu tsəu. Nda cho pətlənya, kəl huɗamələm tə mbəɗa, 22ngə Shanguɗə Karti tə səya ndzəm təkəra cha wi mbətla. Ngə kurakə tə səya kya huɗamələm ga na, “Nakə ngə Zər ɗa nda yo nyida, yo ngatə məsəɗakur na ka.”
Nyandəla Nji'inda Yesu tə Biya kwa
(Mat 1:1-17)
23Sakanda Yesu tə ɗa zər fa makərkumənyi aku bəji nda cha ghəya mər tlər nyi. Nja hətə nyi zər Yusufu cha, Yusufu zər Heli,
24Heli zər Matat,
Matat zər Levi,
Levi zər Malki,
Malki zər Yanna,
Yanna zər Yusufu,
25Yusufu zər Matatiya,
Matatiya zər Amus,
Amus zər Nahum,
Nahum zər Hesli,
Hesli zər Nagai,
26Nagai zər Ma'ata,
Ma'ata zər Mataliya,
Mataliya zər Shimeya,
Shimeya zər Yusufu,
Yusufu zər Joda,
27Joda zər Jonan,
Jonan zər Resa,
Resa zər Zarubabel,
Zarubabel zər Sheyaltiyal,
Sheyaltiyal zər Niri,
28Niri zər Malki,
Malki zər Addi,
Addi zər Kosama,
Kosama zər Almadama,
Almadama zər Er,
29Er zər Joshua,
Joshua zər Eliyezer,
Eliyezer zər Jorim,
Jorim zər Matat,
Matat zər Levi,
30Levi zər Saminu,
Saminu zər Yahuda,
Yahuda zər Yusufu,
Yusufu zər Jonam,
Jonam zər Eliyakim,
31Eliyakim zər Malaya,
Malaya zər Mainana,
Mainana zər Matata,
Matata zər Natan,
Natan zər Dauda,
32Dauda zər Jesi,
Jesi zər Obida,
Obida zər Bu'aza,
Bu'aza zər Salmon,
Salmon zər Nashon,
33Nashon zər Aminadab,
Aminadab zər Aram,
Aram zər Hezron,
Hezron zər Peris,
Peris zər Yahuda,
34Yahuda zər Jakop,
Jakop zər Ishaku,
Ishaku zər Ibrahim,
Ibrahim zər Tera,
Tera zər Nahor,
35Nahor zər Serug,
Serug zər Reyu,
Reyu zər Peleg,
Peleg zər Eber,
Eber zər Sala,
36Sala zər Kenan,
Kenan zər Arfakshad,
Arfakshad zər Shem,
Shem zər Nuhu,
Nuhu zər Lamek,
37Lamek zər Metusela,
Metusela zər Anuhu,
Anuhu zər Jared,
Jared zər Mahalalel,
Mahalalel zər Kenan,
38Kenan zər Enosh,
Enosh zər Shitu,
Shitu zər Adamu,
Adamu tsəu nə Hyel.
Currently Selected:
Luka 3: hbbNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
