Yohana 16

1“A dəkar hi təya dəhə səu, atsa hya da ɓəl yahi ku jirikur kəhi. 2Aka nda kwa nda gədləbiya hi dəhə ku vi pətlənya kənda. Ya bəji kwa da shili nda dəhə ndə nda tə kuɗənda hi, ga nə hi ɓwaɓwatəu, kəl cho har ku kəra cha wi səli ngə cho hə nə Hyel. 3Nda kwa mər dəhə sə'ingə nə hi aka a da nda zəndə ea na Ada ɗa wa. 4Aka ya dəkar hi sə'inga, aka ma bəji nda da ɗa hya ɗənghatə ənda a tsau hi təya bar təkəri.

“A da ya dəkar hi sə'i nənnə ɗəɗəm wa, aka tsə'u mən kə'i hi.”

Tlər Shanguɗə Karti

5“Sakana, kaɗə ya təra gya da ndə nda tə sə ɗa, ya a zhang da ku pama hi nda tə jau ɗa a barkə wa. 6Kəl ja, aka ya dəkəbiya hi sə'i nənna, jan huɗətla nyandə tə ɗufwa hi. 7Jiri yo nar hi cho ɗa mənakə nə hi ma ya təra, aka ma a da ya təra wa, a hyo da uya ndər vala#16:7 Ndər vala nga, nacha ngə Shanguɗə Karti. kwa shili da hi wa. Kəl ja, ma ngə ya təra, ahir nga yo da sətə hi ndər vala. 8Ma ndər vala ngə tə shili, cho chabiyanyi nə njir dunəya, ənda jigadəma kənda da tsa'atsa'a təkəra səpəla'a, mənakəkur ba'a nəuma wa. 9A təkəra səpəla'a aka a da nda na'a jiri wa, 10a təkəra tsa'atsa'akur ɗa, aka yo təra gya dzər Ada, ya səkardzə kushə a tsə'u hya kwa la'a ɗa wa; 11ana təkəra nəuma, aka wurtə nji tlanda nyi nəuma nə təl dunəya#16:11 təl dunəya Nacha ngə: Sərtakəu. na.

12“Sə ɗang yo i ya dəkar hi, kəl ja, a ɗufwa hi do nau hətə wa. 13Ma sakanda ndər vala nda tə shili, nda nacha ngə Shanguɗə nə jiri, cho nəu na hi yo jiri. A cho shili pə sənda ku jigadəmar kərnyi wa, kəl sənda cha ngatə ana cho nar hi sənda kwa shili biyama tsəu. 14Nacha kwa na'a səli, aka cho dəkar hi kəl ba sənda cha dləutsə tsa ya. 15Madami tsa Ada, na'a nga, nacha ngə sənda gwa'atə ya nar hi Shanguɗə Karti kwa hətə sənda na'a cho nar hi.”

Huɗətla kwa nda Sha ka Hirgyaɗi

16“Səkardzə kushə a tsə'u hya kwa la'a ɗa wa, ahir səkardzə kushə tsəu, hyo la'a ɗa.” 17Kəl alenya shawa inda tə jau tsa kərnənda, “Mi hya ngəna ɓwanya? Jan cha nar mən, ‘Səkardzə kushə a tsə'u hyo la'a ɗa.’ Ndə cha tsəu, ‘Ahir səkardzə kushə hyo la'a ɗa? Ana aka yo təra gya dza Ada?’ ” 18Nda jau kərnənda, “Mi ngə, ‘Səkardzə kushə nga?’ A da eo zəndə səngə cho ɓwanya təkər ngə wa!”

19Yesu zəndətə ənda nda kwa gwa'a jau nyi, ngə cha nar nda, “Ya nar hi səkardzə kushə a tsə'u hyo la'a ɗa wa, ahir nga, səkardzə kushə tsəu hyo la'a ɗa, nacha ngə sənda hyo jau ku pama kərnəhya? 20Jiri yo dəkar hi, hyo da tiwi ana sə'ingwa biyama, dunəya nənyi kəl hirgyaɗi, hyo mər huɗətla, kəl ja, huɗətla kəhi kwa nda sha ka hirgyaɗi. 21Ma bəji nda ɓəlakərya tə səya malakəu, aku ɓwaɓwatəu cha, kəl ja, macha nda wur yah zər, kəl cho far na ɓwaɓwatəu nda, kəl hirgyaɗi, aka nja uya ndə shili tə dunəya. 22Əngə tanyi tsə'u a təkəra hi, sakana ana huɗətla hi, a biyama yo shili ka hi, bəji nda ɗufwa hi kwa ɗa twasəu ana hirgyaɗi, chul hirgyaɗi nda a ndə da kwa nau təkəbiya hi nə wa.

23“Aku bəji nda a tsə'u hyo jau madami tsa ya wa. Jiri yo nar hi Ada kwa nə hi dəhə sənda hyo gwa'a ku tləm ɗa. 24Ba'a sakana a da hya ta gədi madami ku tləm ɗa wa; gədi ma hyo uya, ga hirgyaɗi kəhi nyabiyadza.”

Yesu Kura tə Dunəya

25“Ya par hi dəhə səu, ana ba'ada. Kəl ja, bəji kwa shili nda a tsə'u yo da ɓwanya nə hi na ba'ada wa, kəl sənda təkəra Ada tanyi yo dəkar hi tə babaləu. 26Aku bəji nda ja, hyo da gədi madami aku tləm ɗa, nahi təkərnəhi kwa gədi tsa Ada; a da naya kwa gədi nə hi wa. 27Aka Ada təkərnyi kwa nyida hi cha, aka hyo nyida ɗa, ga na'a jiri ənda kya dzər Hyel səya. 28A kya dzər Ada hya'atə ya ga shili tə dunəya, nəchanə tsəu yo ngyar dunəya yo ɓəl gya dzər Ada.”

29Ngə shawa nyi inda tə nar nyi, “Yawa, sakanə ja, jan ko dzəgwa ɓwanya tə babaləu, a da na ba'ada wa. 30Sakanə ja a zəndətə ea, kwa nau kə madami, a da kəl nja jau nya kə wa. Nacha gwa'atə ea nənghə jiri ənda kya dzər Hyel səya ka.” 31Ngə Yesu tə jau nda, “Sakan ja ya, a nənyi tə hi jiri ya? 32Sakanə ja bəji kaɗə ɗa, a ɗatə ma'a, nda dəhə hi kwa wiɗa, madawa kwa təra kyo ki nyi, hyo ngya ɗa zhangta ɗa. Dəhə ka ənga, a da zhangta ɗa wa, aka Ada tsa'a naya. 33Ya dəkar hi sə'inga aka ga hya uya piyarɗufə aku daɓəkər naya. Aku ɓwaɓwatə kəhi tə dunəya, ngwa ɗufwa hi da dzədzə wa! A wurtə ya kura dunəya!”

Currently Selected:

Yohana 16: hbbNT

Highlight

Copy