Yohana 15

Yesu ngə Wur Anap nə Jirijiri

1“Naya ngə wur Anap nə jirijiri, Ada ɗa ngə ndər zwa. 2Dəhə cha wu nda pa tə yah cho tsaunda nyi, cha wu nda kwa yah tsəu, cho ɓatlətə nyi mənakəu, aka ga cha tsakətə yah ngulisha'a. 3Sakana chichinyi hi, aka ɓwanya nda ya dəkəbiya hi. 4Gəzətə ma kərnəhi, naya tsəu yo gəziya hi. Wi nda a cha wu da kwa nau yah təkərnyi wa, kəl nda cha tlə tə hatla wua. Nahi tsə'u a hyo mər sakəda wa, kəl nda ma hya daɓətəkər naya, hya ngya ku dza ya.”

5“Naya ngə wur Anap, nahi ngə cha cha. Madawa tə daɓətəkər naya, yo ngya ku cha, cho yah ɗang wi wur Anap, aka ma'a da hi ku ya wa, sə da hyo nau mər təkərnəhi wa. 6Ma ndə nda pa'a tə daɓətəkər naya njo tsaunda nyi wi ngə tə cha wua, ba sənda nyi cha 'ula, kəl nda nja tsəmtə nja hau hu'u kwa, cha ngi kəɗətsəu. 7Kəl ja, ma hya daɓətəkər naya, ɓwanya ɗa tsəu ku ɗufwa hi, hyo gədi sənda hyo i, ya njo nə hi. 8Nacha ngə laku nda njo hətə səlir Ada ɗa ti, ma hya yah ɗang wi wur anap, təwa əngə hyo ɗa ka shawa ɗa.

9“A nyida hi təya wi ngə Ada ɗa tə nyida ɗa, ngwa hi da təkə na nyida ɗa wa. 10Ma hya ɓəlatə tsaubar ɗa, a yo təkə na nyida hi wa, wi nda ya ɓəlatə tsaubar Ada ɗa, a da cha təkə na nyida ɗa wa. 11A wurtə ya dəkar hi sə'inga aka ga hirgyaɗi ɗa cha ngya ku ɗufwa hi, ga hirgyaɗi kəhi nyabiyadza. 12Jan na'a na tsaubar, ənda hya nyida kərnəhi tang wi ngə ya nyidatə hi. 13A vanya nyida da kwa ndiya nənnə wa, ənda ndə kwa sənda pya cha aka bazhi nyi. 14Hyo ɗa ka bazhi ɗa, ma hya mər sənda ya dəkar hi. 15A yo nga hi mavi'i wa, aka mava da kwa zəndə sənda tlakə nyi kwa mər wa. Yo nga hi bazhi, aka a nar hi təya dəhə sənda ya ngatə tsa Ada ɗa. 16A nahi ngə tə tabiya ɗa wa. Naya nga ɗəmtsə hi, ya ɓatliya hi təya ga hya ki yah ngulisha'a, ga nguli kəhi ngya ba'anawa. Aka dəhə sənda hyo gwa'a tsa Ada ɗa ku tləm ɗa cho nə hi. 17Tsaubar ɗa nə hi nacha ngə hya nyida kərnəhi.

Dunəya kwa Mər Dawa na Yesu kə'i Shawa Nyi

18“Ma dunəya ngya hi, hya zəndə naya cha ghəya ngyari tangərma. 19Macha nə dunəya hi, təki cho nda i hi, kəl ja, a da hi nə dunəya wa; aka a wurtə ya ɗəmbiya hi aku dunəya, nacha gwa'atə dunəya ngya hi. 20Ɗənghatə ma sənda ya nar hi, ənda ‘A mava da kwa ndiya tlakə nyi wa?’ Wi ngə nda ɗa məndza'u naya nga, əngə tanyi tsəu nda kwa mərtə hi, macha a hətə nda səlir ɓwanya ɗa, nda kwa hətə səlir nəkə hi tsəu. 21Dəhə sə nja kwa mərtə hi aka naya, aka a da nda zəndə ndə nda tə sə ɗa wa. 22Ma pa'a aka ɓwanya nda ya dəkar nda nə wa, bikər səpəla'a kənda da wa, kəl ja, sakana a tsə'u ɓwanya kənda da təkəra səpəla'a kənda wa. 23Madawa tə ngya ɗa, a ngyar tə cha Ada ɗa tsəu. 24Ma pa'a aka ya mər səshinshin nda a vanya ndə da tə ɗaka mər ku pama nda wa, a bikər səpəla'a kənda da wa. Kəl ja, sakana a la'atə nda dəhə sənda ya məra, dəhə ka ənga, a ngya ea tə nda kya ea na Ada. 25Sə'ingə dəhə aka ga ɓwanya nda nja tsəfətə ku gadlagadla kənda cha nyabiyadza, bəra, ‘Nda ngya ɗa a da ka vanya sə wa.’

26“Ma ndər vala nda yo sətə hi hya'atə kya dza Ada nda tə shili da hi. Nacha ngə Shanguɗə nə jiri nda hya'atə kya dza Ada, nacha ngo da dəkəbiya ɓwanya təkəra ya. 27Nahi ma'a ɗatə tuku hya dəkə ɓwanya təkəra ya, aka tangərma namən tanyi kə'i hi.”

Currently Selected:

Yohana 15: hbbNT

Highlight

Copy