Yohana 14

Yesu ngə Lakur Gya da Ada

1“Ngwa huɗa hi da tla wa. Hya nənyi jiri nə Hyel, hya na'a jiri tsəu. 2Aku ki Ada ɗa vi da ɗanghəu, macha a da əngə wa, kwa nda ya nar hi. Yo təra ka ga ya gi ɓatliya hi mbwa. 3Ahir ma ya təra ga gi ɓatliya hi mbwa, yo ɓəla səya ka ga ya dləutsə hi təkərɗa, aka nahi ma'a hya ngya tangnda ya ti. 4Mbwa nda yo yi ti, kwa zəndə hi laku.”

5Kəl Toma tə nar nyi, “Tlakəu, a da eo zəndə ba nda ko ma'i tə wa, aman eo ɗana zəndə lakwa?”

6Ngə Yesu tə nar nyi, “Naya ngə laku, naya ngə jiri, naya ngə pi, a ndə da kwa nau ya dzər Ada wa, kəl ndara təwa ɗa. 7Macha zəndəbiya ɗa tə hi, kwa nda hya zəndə Ada ɗa tsəu, aka sakana, a zəndə nyi tə hi, ya la'a nyi təhi tsəu.”

8Kəl Filibus tə nar nyi, “Tlakəu, char ea Ada nga, ga kəra ea piya.”

9Ngə Yesu tə nar nyi, “Sakanda ya ngya kə'i hi ti, a da ka taa zəndə ɗa Filibus wa? Aka madawa tə la'a ɗa, a la'atə cha Ada. Mya gwa'atə ko na, ‘Char ea Ada?’ 10Filibus, a da ka nənyi jiri ənda naya ana Ada zhang ea ma? Dəhə sənda yo dəkar hi, a da ɓwanya kərɗa ngə wa, Ada nda ku ya nacha ngo mər tlər nyi. 11Na'a ma jiri, ənda naya ana Ada zhang ea, ma'a əngə wa, hya na'a jiri mada ka səshinshin inə hya la'a na. 12Vəlvəl yo nar hi, dəhə ndə nda tə na'a jiri, cho da mər chul tlər inə yo mər na, ndiya ingə ma'a, aka yo ɓəl gya dzər Ada. 13Yo mərtə hi dəhə sənda hya gədi ku tləm ɗa, aka ga nja hətə səlir Ada təwa Zər. 14Madami hya gədi ku tləm ɗa yo mərtə hi.”

Alkawal Shilir Shanguɗə Karti

15“Macha kwa nyida ɗa hi, kwa nda hi ɓəlatə tsaubar ɗa. 16Naya ma'a yo gədi Ada ka ga cha sə tə hi ndər vala, ga cha ngya kə'i hi ba'anawa. 17Nacha ngə Shanguɗə jiri nda njir dunəya da dləutsə wa, aka a da nda kwa nau la'a nyi wa, ya a nda kwa zəndə nyi wa. Nahi nəkə hi a zəndə nyi tə hi, aka hyo ngya tsa'a ka cha, cho ngya tsəu ku ɗufwa hi.”

18“A yo ngya hi tsəp wi nguli mahə wa, kəl ja, yo ɓəl shili da hi. 19Səkardzə kushiu a tsə'u njir dunəya kwa la'a ɗa wa, nahi nəkə hi hyo la'a ɗa, aka wi ngə kərɗa ana pi, nahi tsəu hya ɗa na pi. 20Ma bəji nda gəla hyo zəndə ənda ku Ada ya, nahi tsəu hya ɗa ku ya, tang wi ngə ya ku hi.

21“Madawa tə dləutsə tsaubar ɗa, ga ɓəlati, nacha ngə ndə nda kwa nyida ɗa. Aka Ada ɗa kwa nyida ndə nda kwa nyida ɗa, naya ma'a kwa nyida nyi, ya yo chabiya nyi kərɗa tsəu.”

22Kəl Yahuda (a da Iskərayoti wa), tə jau nyi, “Tlakəu, mya gwa'atə ko chabiya kərngha nə ea tanyi, ya a da nə njir dunəya wa?”

23Kəl Yesu tə nar nyi, “Madawa tə nyida ɗa, cho ɓəlati ɓwanya ɗa. Ada ɗa kwa nyida nyi, naya ana Ada ɗa eo da shili ngya ka cha. 24Ndə nda pa kwa nyida ɗa, a da cho ɓəlati ɓwanya ɗa wa. Dəhə ɓwanya ingə hyo ngatə nga a ɓwanya kərɗa ngə wa, kəl nda nə Ada nda tə sə ɗa nga.”

25“Na nda ingə sə'inda ya par hi, tsəu ya ka hi. 26Ndər vala, nacha ngə Shanguɗə Karti nda Ada kwa sətə aku tləm ɗa, na cha kwa shili dlədləɓtə hi dəhə səu, cho ɗənghatə hi dəhə sənda ya dəkətə hi.”

27“Yo ngya hi na ga'ar piyarɗufəu, piyarɗufə nə kərɗa nə yo nə hi. A da wi ngə dunəya kwa nə hi wa. Ngwa huɗa hi tla wa, ya ngwa hya da ləvər sənda kwa ɗa wa.”

28“A ngatə tə hi ya nar hi, yo təra, kəl ja, yo tsəu ɓəla shili. Macha hyo nyida ɗa, hyo mər hirgyaɗi ənda yo təra gya dzər Ada, aka a ndiya ɗa tə cha. 29A nar hi təya, təvi cho ɗa, aka ma sakanda cha ɗa ti, hya nənyi jiri. 30A tsə'u yo ɓwanya ka hi tərkus wa, aka təl dunəya kaɗə shili, kəl ja, da cha na gyalkur təkəra ya wa. 31Yo mər dəhə sənda Ada tə nar ɗa, ka ga njir dunəya zəndə kwa nyida ya Ada. Hya'atə ma mən ngyar mbwa na.”

Currently Selected:

Yohana 14: hbbNT

Highlight

Copy