Yohana 13

Yesu tə Chinda Hya Shawa Nyi

1Sakanda bəjir Ladər Dləgəlnda kaɗə ɗa. Yesu tsəu wurtə zəndə kaɗə bəji nyi gəla cho ngyar dunəya ga cha təra gya dzər Ada. Aka cho nyida ba nji'inda wur ɗaka nənyi ku dunəya, cho nyida nda a ɓəl nyi da wa.

2Yesu ka shawa nyi kwa səm sərsum nə akəu. Sərtakə wurtə chiu ku ɗufwa Yahuda Iskərayoti zər Shiman ga cha tləɗanda Yesu. 3Yesu wurtə zəndə Ada nyi taɓəu nyi tə dəhə gyalkur, a zəndətə cha kya da Hyel səya cha, ya cho təra gya da Hyel səkəu. 4Ku sakanda nda kwa səm sərsuma, kəl Yesu tə hya'atə tə ta'i, cha səɗənda ləkutə nda da biya, ga mbabiya sara cha ana tawul. 5Ahir nga kəl cha gəu ɓiti ku shala, cha ghəya chi hya shawa nyi inda ni, cha kəkəɗənda na tawul nyi nda. 6Nda cha shili təkəra Shiman Bitrus, ngə Bitrus tə na, “Tlaka, nakə ngo chi hya ya?”

7Ngə Yesu tə na, “Sakana a da ko ngabiya sən yo mər nə wa, ko tsə'u da ngabiya.”

8Ngə Bitrus tə nar nyi, “A'a, a da kwa ɗa pa'a wa, a ko chi hya wa.”

Ngə Yesu tə nar nyi, “Ma'a da ya chinda nghə hya kə wa, a tsə'u səda ku pama ma wa.”

9Shiman Bitrus tə nar nyi, “Tlakəu, a kəl hya ya tanyi wa, ma'a cha ya dəhə ka kəra ya tsəu!”

10Yesu tə nar nyi, “Ndə nda wur waɗa, tsəu cho gwa'a nja waɗa nyi səkə wa, kəl nda nja chinda nyi hya cha, ga cha ɗa cham tsəu. Aka ənga, cham hi dəhəu, kəl nda ndə zhang ku pama hi.” 11Aka Yesu wurtə zəndə ndə nda kwa da tləɗa nyi, na cha nga gwa'atə cha na, “A da dəhə hi cham wa.”

12Ahir cha wur na chi hya nda, kəl Yesu tə ɓəla handzi ləkutə nyi nda ga ɓəl tanyi ya tə vir ngya nyi. Ngə cha na, “A ngabiya təhi sənga gwa'atə ya chi hya hi ngə ya?” 13Hyo nga ɗa na maləm, ana Tlakəu, tsa'atsa'a tanyi aka əngə ya. 14Mangə Tlakə ya ana maləm kəhi, ya ngə ya chinda hi hya hi, tsa'atsa'a tanyi tsəu hya mərtə nyi nə kərnəhi wi nga. 15A char hi təya ba'ada, aka ga hya mər wi nda ya mər nə hi. 16Vəlvəl yo nar hi, mava da kwa ndiya tlakə nyi wa, ndə nda nja sə tsəu da kwa ndiya ndə nda tə sə nyi wa. 17Sakan ja, wi nə hya zəndə sə'inga, hyo ɗa nji papa'a ma hya məra.

18“A da yo ɓwanya ka dəhə hi wa; aka kwa zəndə ya chul nji'inda ya ɗəmtsi. Aka ga ɓwanya likatəkatə nyabiyadza, wi nda cha na, ‘Ndə nda tə fəu cha cha ku shala zhang na ya, na cha kwa nda ngya ka ndər dawa ɗa.’ 19Yo nar hi sə nə sakana təvi cha ɗa, aka ma bəji nda cha da ɗati, ga hya nənyi jiri ənda naya ngə Kəristi. 20Jiri yo nar hi, ma ndə nda dləutsə ndə nda ya səa, naya ngə cha dləutsi, madawa tə dləutsə ɗa, tlakə nyi dləutsətə ndə nda tə sə ɗa.”

Yesu tə Tsakətə Ɓwanya təkəra ənda Njo Tləɗanda Nyi

(Mat 26:20-25; Mar 14:17-21; Luk 22:21-23)

21Ahir nda Yesu tə dəkar nda ənga, kəl jigadəma tə wendə nyi 'ual'ual ngə cha nar nda bwabwa'a, “Vəlvəl yo nar hi, zhang ku pama hi kwa da tləɗa ɗa.”

22Kəl dəhə shawa nyi inda tə ghəya nəɗə kərnənda ana məngəl, ndara ka wa ngə chul ngəna ɓwanya. 23Zhang ku huɗa shawa inda, nda Yesu kwa nyida nda, tə ngya ləhə dzər Yesu. 24Ngə Shiman Bitrus tə ɗa kəɗəng na kər nə shawa nda, “Jawar nya cha, ndara təkəra wa ngə cho ɓwanya.”

25Kəl ngə shawa nda tə tsaɗətə dza ya dzər Yesu ga jawar nyi, “Wa ngə nganə ja Tlakəu?”

26Ngə Yesu tə nar nyi, “Ndə nda ya tlətsə gwazhilakəu ga njamtsə səkwar ga nənyi, nacha nga.” Kəl cha pastsə gwazhilakə nda ga nənyi nə Yahuda zər Shiman Iskərayoti. 27Ɗəɗəu tanyi ahir nda Yahuda tə dləutsə gwazhilakə nda kəl Shantan tə gwa ku ɗufwa cha. Ngə Yesu tə nar nyi, “Kusa mər sənda ko məra!” 28Ya mada zhang ku huɗa nda, inda tə mbwar səm sərsum nda da tə ngabiya sənda cha dəkə sə ngə nənyi kar wa. 29Alenya nji tə har ku kəra nda, mangə Yahuda nacha ngə kwa gəzə mbəl kwaba kənda, na cha ngə Yesu tə nar nyi cha ki ɗəlbiya nda sənda nda kwa gwa'a ka ladər nda, ndara tsəu, cha ki ɗa nyi sə nə njir ɗali. 30Ahir nda Yahuda tə dləutsə gwazhilakə ku cha Yesu, kəl cha kusa təra biya, ya vu'i ɗati.

Taɗər Gadlagadla Yesu

31Ahir Yahuda tə biya təra, kəl Yesu tə na, “Sakan ja bəji ɗatə nda njo hətə nyi səli nə Zər Ndəu, ya Hyel kwa uya səli ku cha. 32Mangə Hyel uyatə səli təwa Zər, kacha'anə tsəu Hyel kwa nənyi səli nə Zər.”

33“Nahi nji'inda yo nyida, kushə tanyi məno səkardzə kə'i hi. Hyo nda gwa'a ɗa, aka a nar nyi təya nə njir Yahuda ənda, ‘A ba nda yo ma'i tə, a hyo nau yi nda wa,’ əngə tanyi yo nar hi tsəu.” 34Nəchanə ja, taɗər gadlagadla nə yo nə hi, hya nyida kərnəhi. Wi ngə kərɗa nyida hi, hya nyida kərnəhi tsəu. 35Aka ma hya nyida kərnəhi, madawa kwa zəndə ənda shawa ɗa hi.

Bitrus kwa da Kəpal Zəndə Yesu

(Mat 26:31-35; Mar 14:27-31; Luk 22:31-34)

36Shiman Bitrus tə jawa “A barkə Tlakəu?” Ndə Yesu, “Laku nda yo ma'i tə a da ko nau nəu sakanə wa, kəl nda ma bəji nda da ɗa, ko tsəu da nəuwa.”

37Bitrus tə jawa “Tlakəu, mya gwa'atə a yo nau nəu sakanə wa? A ɓatliya təya ka yo tah, aka ka!”

38Ngə Yesu tə wuma, “Tsa'anyata kwa nau kə sanda pya kə ka ya ja? Ngwa ya dəkar nghə jiri, təvi vəgəm kwa tiwi ənya, ko kəpal zəndə ɗa zhaka makərəu.”

Currently Selected:

Yohana 13: hbbNT

Highlight

Copy