EVASELIO A SOANE 7
7
Tuigataa o te u tehina o Sesu
1Hili ia, nee fealuaki Sesu i Kalilea, he nee mole fia nofo ia i Sutea, koteuhi nee kumi ia e te kau Sutea ke tamatei.
2Kae kua fakaovi mai te aho lahi o te kau Sutea, ko te aho o te u Tapenakulo. 3Pea nee ui age leva e ona tehina kia ia: Mavae i heni, o alu ki Sutea, o tupu ke sisio foki au tisipulo ki te u gaue e ke fai. 4E mole gaue fakafufu he tahi, moka e ina kumi ke ha; kapau e ke fai te u mea aia, fakaha ia koe e koe totonu ki te malamanei. 5Koteuhi nee mole tui ona tehina kia ia. 6Nee ui leva e Sesu kia natou: E heeki hoko mai toku temi, kae kia koutou, e to lelei tuumau pe tokotou temi. 7E mole feala ke fehia te malamanei kia koutou; kia au, e fehia ia kia au, koteuhi e au fakamooni kia ia e kovi tana u gaue. 8Kotou hahake, koutou, ki te aho lahi aena; kae ko au, e mole au hake nei ki ai, koteuhi e heeki hoko mai toku temi. 9I te osi o tana fakaha kia natou te mea aia, nee nofo leva ia i Kalilea.
Sesu i te aho o te u Fale pola
10I te kua hahake o ona tehina ki te aho lahi, ko te lakaga aia nee hake ai leva ia ki ai, o mole fakahaha kae fakapulipuli. 11Nee kumi ia e te kau Sutea i te lolotoga o te aho lahi, o ui: E i fea ia? 12Nee lahi te lalau i te hahai o uhiga mo ia. Nee ui e ihi: Ko he tagata lelei ia. Kae nee ui e ihi: Kailoa, e ina kakaai te hahai. 13Kae nee mole he tahi nee palalau fakalauatea o uhiga mo ia, uhi ko te mataku ki te kau Sutea.
14I te kua vaeluamalie ape o te aho lahi aia, nee hake leva ia Sesu ki te fale tapu. Pea nee akonaki ia i ai. 15Nee punamauli te kau Sutea, o ui: Pe e ina iloi feafeai te Tohi tapu, ia ia ae nee mole pe ako? 16Nee tali leva e Sesu kia natou: E mole hau taku akonaki maia te au, kae mai ae nee ina fekaui mai au. 17Kapau e fia fai e he tahi tona finegalo, e ina iloi anai pe e hau taku akonaki mai te Atua, pe e au palalau ia au totonu. 18Ko ae e palalau maia ia pe, e ina kumi tona kololia toko tahi; kae ko ae e ina kumi te kololia o ia nee ina fekaui mai ia e mooni ia, pea e mole pe he mea ia ia e hala. 19Pe nee mole foaki atu e Moisese te lao kia koutou? Pea e mole he tahi o koutou e ina tauhi te lao? Kotea te tupuaga o takotou kumi au ke kotou tamatei? 20Nee tali leva e te hahai: E nofo ia koe he temonio. Ko ai ae e ina kumi ke tamatei koe? 21Nee tali leva e Sesu kia natou: Nee au fai he gaue e tahi, pea nee koutou punamauli fuli i ai. 22Nee foaki atu e Moisese te silikosisio kia koutou, nee mole hau ia maia Moisese, he nee hau ia mai te kau pateliaka, pea e kotou silikosisioi he tagata i te aho o te sapato. 23Kapau e tali e he tagata te silikosisio i te aho o te sapato, pea e mole maumaui i ai te lao a Moisese, kotea e kotou iita ai kia te au, koteuhi nee au fakamauli he tagata katoa i te aho o te sapato? 24Aua naa koutou fakamaaui o mulimuli ki te mea ae e ha i tua, kae koutou fakamaaui o mulimuli ki te faitotonu.
25Nee ui e ni ihi o te hahai o Selusalemi: Pe e mole ko ia aeni e natou kumi ke tamatei? 26Pea koeni, e palalau faifaitaliha ia, pea e mole hanatou lea kia ia! Pe e mooni ape kua fakamooni te kau pule ko ia ko Kilisito? 27Kae ko ia aeni, e tou iloi te kogamea e hau ia mai ai; kae ko Kilisito, ka hau anai ia, e mole he tahi e ina iloi te kogamea e hau ia mai ai. 28Pea ko Sesu, i tana akonaki i te fale tapu, nee kalaga leva: E koutou iloi au, pea e koutou iloi pe e au hau mai fea! Nee mole au hau i toku loto: kae ko ae nee ina fekaui mai au e mooni, pea e mole kotou iloi ia. 29Ko au, e au iloi ia; koteuhi e au hau maia ia, pea ko ia ae nee ina fekaui mai au. 30Nee natou kumi ai leva ke natou puke ia ia, kae nee mole leva fafa te nima o he tahi kia ia, koteuhi nee heeki hoko mai tona hola.
31Nee kaugamalie i te hahai nee tui leva kia ia, pea nee natou ui: Ko te Kilisito, ka hau anai ia, pe e ina fai anai ni milakulo o lahi age ia natou e fai e ia aeni? 32Nee logo leva te kau faliseo ki te u lalau a te hahai ki te u mea aena o uhiga mo ia. Pea nee fekau leva e te kau pule faisakilifisio mo te kau faliseo he u ofisa ke natou puke ia.
33Nee ui leva e Sesu: Kei au nofo mo koutou i he kii temi siisii, pea e au alu ki ia ae nee ina fekaui mai au. 34E kotou kumi anai au pea e mole kotou mau anai au, pea e mole feala ke kotou omai ki te kogamea ae e au nofo ai anai. 35Nee ui leva e te kau Sutea: E alu anai ia ki fea, ke aua naa tou mau ia? Pe e alu anai ia kia natou ae e mavetevete i te kau Keleka, pea e akonaki anai ia ki te kau Keleka? 36Kotea te uhiga o te folafola aena nee ina fakaha: E kotou kumi anai au, pea e mole kotou mau anai au, pea e mole feala ke kotou omai ki te kogamea ae e au nofo anai i ai.
Te malohi o te Laumalie Maonioni
37I te aho fakaosi, ko te aho tafito aia o te aho lahi, nee tuu ake leva Sesu, o kalaga: Kapau e fia inu he tahi, ke hau ia kia au, pea ke inu ia. 38Ko ae e tui mai kia au, e tafe anai maia te ia ni vaitafe o te vai mauli, o hage ko tona tala e te Tohi tapu. 39Nee palalau ia o uhiga mo te Laumalie Maonioni e tonu ke tali e natou e tui anai kia ia; koteuhi nee heeki foaki te Laumalie Maonioni, koteuhi nee heeki fakakololiai Sesu.
Manatu kehekehe o uhiga mo Sesu
40I te logo a te hahai kaugamalie ki te folafola aia, nee natou ui leva: Ko ia aeni ko te polofeta mooni ia. 41Nee ui e ni ihi: Ko te Kilisito ia. Pea ko ihi: Pe e feala ke hau te Kilisito mai Kalilea? 42Pe e mole tuu koa i Te tohi e tonu ke hau te Kilisito mai te hakoga o Tavite, pea mo te kolo o Petelehemi, ae nee nofo ai Tavite? 43Nee hoko ai leva hee mavaevae i te hahai, uhi ko ia. 44Nee loto ni ihi o natou ke natou puke ia, kae nee mole kapa he nima o he tahi kia ia.
45Pea nee toe liliu leva te kau ofisa ki te kau pule faisakilifisio mo te kau faliseo. Pea nee natou ui age leva ki te kau ofisa: Kotea nee mole kotou aumai ai ia ia? 46Nee tali leva e te kau ofisa: Nee heeki he tagata kua palalau i he aho o hage ko te tagata aeni. 47Nee toe tali leva e te kau faliseo kia natou: Pe kua toe kakaai foki mo koutou? 48Pe e i ai he tahi o te kau pule pee ko te kau faliseo kua tui ape kia ia? 49Kae ko te hahai aena, e mole natou iloi te lao, ko te kau malaia natou! 50Pea nee ui leva e Nikotemo, ko he tahi o natou, ae nee alu kia Sesu i te pouli: 51Pe e fakatua ki te mate e tatatou lao he tagata kae e heeki logo kia ia pea mo iloi te mea nee ina fai? 52Nee natou tali age leva kia ia: Pe e Kalilea foki mo koe? Kumi, pea e ke sio anai e mole pe he polofeta e hau mai Kalilea.
53Pea nee natou mavetevete ai o tahi alu leva ki tona api.
Currently Selected:
EVASELIO A SOANE 7: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
