EVASELIO A SOANE 8

Te fafine nee mautoka e tono

1Nee alu leva ia Sesu ki te mouga o Oliveto. 2Kae, i te uhu ake pe, nee toe alu leva ia ki te fale tapu, pea nee omai leva te hahai katoa kia ia. Pea nee nofo ifo leva ia ki lalo, o akonaki kia natou.

3Pea nee taki age leva e te kau sekelipa mo te kau faliseo he fafine nee mau i tana tono; 4pea nee natou fakatuu leva ia i lotomalie o te hahai, kae natou ui leva kia Sesu: Pule, nee mau te fafine aeni e lolotoga tono. 5I te lao, nee fekau mai e Moisese kia matou, ke taumakai te u fafine fena, kae ko koe, kotea tau ui? 6Nee natou ui te mea aena ke ahiahii ai ia ia, o tupu ke feala hona fakahalai. Kae nee punou ifo leva Sesu, o tohitohi aki tona kaui tuhi i te kele. 7Pea i tanatou hoko atu aipe tona fakafehui, nee tuu ake leva ia ki oluga, o ui age kia natou: Ko ae ia koutou nee heeki agahala, ke ina uluaki li te foi maka ki te fafine. 8Pea nee toe punou ifo ia o tohitohi i te kele. 9I tanatou logo ki te mea aia, nee fakahalai natou e onatou loto, pea nee natou fakaoloolo takitahi o olo, o kamata mai te kau matua ki te kau tupulaga; pea nee nofo leva ia Sesu toko tahi mo te fafine ae nee tuu i lotomalie. 10Pea nee malaga ake leva ia Sesu ki oluga, o sio ki te fafine toko tahi, pea nee ina ui age leva kia ia: Fafine kofea natou nee natou fakahalai koe? Pe e mole he tahi nee ina fakatua koe? 11Nee tali leva te fafine: Kailoa, Aliki. Pea nee ui age leva e Sesu kia ia: E mole au fakatua foki ia koe, alu, pea aua tau toe agahala.

Sesu, te malama o te malamanei

12Nee toe palalau leva ia Sesu kia natou, o ui: Ko au ko te malama o te malamanei; Ko ae e muli mai ia au e mole toe haele anai ia i te fakapouli, kae e ina mau anai te malama o te mauli.

13I ai, nee ui leva e te kau faliseo kia ia: E ke fakamooni kia koe totonu, koia e mole mooni ai tau fakamooni. 14Pea nee tali leva e Sesu kia natou: Kapau e au fakamooni kia au totonu, e mooni taku fakamooni, koteuhi e au iloi te kogamea nee au hau mai ai pea mo te kogamea e au alu ki ai; kae ko koutou, e mole kotou iloi pe e au hau mai fea pea e au alu ki fea. 15E kotou fakamaaui o mulimuli ki te kakano, ko au, e mole au fakamaaui pe he tahi. 16Pea kapau e au fakamaaui, e mooni taku fakamaau, koteuhi e mole au toko tahi; kae ko au mo te Tamai ae nee ina fekaui mai au. 17E tohi i takotou lao e mooni te fakamooni a ni tagata e tokolua; 18e au fakamooni kia au totonu, pea e fakamooni kia au te Tamai ae nee ina fekaui mai au. 19Nee natou ui leva kia ia: Kofea tau Tamai? Nee tali leva e Sesu: E mole pe kotou iloi au, pee ko taku Tamai. Kapau nee kotou iloi au, e kotou iloi foki taku Tamai.

20Nee fakaha leva e Sesu te u folafola aena, i tana akonaki i te fale tapu, i te kogamea ae nee tanaki ai te u koloa, pea nee mole puke leva ia e he tahi, koteuhi nee heeki hoko mai tona hola.

21Nee toe ui foki e Sesu kia natou: E au alu, pea e kotou kumi anai au, pea e kotou mamate i takotou agahala; e mole feala ke kotou omai ki te kogamea e au alu ki ai. 22I te mea aia nee ui leva e te kau Sutea: Pe e fakamate anai ia, koteuhi e ina ui: E mole feala ke kotou omai ki te kogamea e au alu ki ai? 23Pea nee ina ui leva kia natou: E koutou omai mai lalo; Ko au, e au hau mai oluga. E kotou omai mai te malamanei; ko au, e mole au hau mai te malamanei. 24Koia e au ui atu ai kia koutou e koutou mamate anai i akotou agahala; koteuhi kapau e mole kotou tui pe ko ai au, pea e kotou mamate anai i akotou agahala. 25Pea nee natou ui age leva kia Sesu: Ko ai ia koe? Nee tali leva e Sesu kia natou: Ko ia ae nee au fakaha atu kia koutou mai te kamataaga. 26E lahi te u mea e au fia palalau ki ai mo fia fakamaaui ia koutou; kae ko ae nee ina fekaui mai au e mooni, pea ko te mea ae nee au logo maia ia, e au fakaha ia ki te malamanei. 27Nee mole pe natou mahino nee palalau ia ia kia natou o uhiga mo te Tamai. 28Pea nee ui age leva e Sesu kia natou: Ka kotou fakatuu ake anai ki oluga te Foha o te tagata, pea e kotou iloi anai pe ko ai au, pea e mole pe au fai he mea ia au totonu, kae e au palalau o mulimuli ki te mea nee ako mai kia au e te Tamai. 29Ko ae nee ina fekaui mai au e nofo mo au; nee mole ina tuku au ke au toko tahi; koteuhi e au fai tuumau te mea e lelei kia ia.

30I te palalau a Sesu o uhiga mo te u mea aia, nee tui leva he kaugamalie kia ia. 31Pea nee ina ui leva ki te kau Sutea nee tui kia ia: Kapau e kotou nonofo mau i taku folafola, pea ko aku tisipulo mooni koutou; 32pea e kotou iloi anai te mooni, pea e fakaateainai anai koutou e te mooni. 33Nee natou tali leva kia ia: Ko te hakoga matou o Apalahamo, pea nee mole matou popula ki he tahi i he aho; e feafeai tau ui: E kotou liliu anai o ateaina? 34Nee tali leva e Sesu kia natou: E mooni, e mooni, e au ui atu kia koutou, ko ae e ina fai te agahala e popula ia ki te agahala. 35Pea e mole nofo tuumau te tagata popula i te api; kae e nofo tuumau te Foha i ai. 36Koia kapau e fakaatea koutou e te Foha, e kotou ateaina mooni anai. 37E au iloi ko te hakoga koutou o Apalahamo; kae e kotou kumi ke kotou tamatei au, koteuhi e mole ulu taku folafola ia koutou. 38E au palalau ki te mea nee au sio ki ai i taku Tamai; pea ko koutou, e kotou fai te mea nee kotou logo ki ai mai takotou tamai. 39Nee natou tali leva kia ia: Ko tamatou tamai ko Apalahamo. Nee ui leva e Sesu kia natou: Kapau ko te u fanau koutou a Apalahamo, e kotou fai anai te u gaue a Apalahamo. 40Kae koeni e kotou kumi ke kotou tamatei au, ia au ae nee au fakaha atu kia koutou te mooni nee au logo ki ai mai te Atua. Nee mole pe fai te mea aia e Apalahamo. 41Kae ko koutou, e kotou fai te u gaue a takotou tamai. Nee natou ui leva kia ia: E mole ko ni toe taka matou; e matou mau he tamai e tahi, ko te Atua. 42Nee ui age leva e Sesu kia natou: Kapau nee kotou tamai ki te Atua, e kotou ofa anai kia au, koteuhi nee au hau mai te Atua, pea ko ia ae nee ina fekaui mai au ki heni; nee mole au hau i toku loto faitaliha, kae ko ia ae nee ina fekaui mai au. 43Kotea e mole kotou mahino ai ki taku palalau? Koteuhi e mole feala ke kotou fakalogo ki taku folafola. 44E kotou tamai kia Satana, pea e kotou fia fakahoko te u holi o takotou tamai. Nee fakapo ia talu mai te kamataaga, pea e mole nofo ia ia i te mooni, koteuhi e mole mooni ia. Ka ina puaki te loi, e palalau ia mai tona takele totonu; koteuhi e loi ia pea ko te tamai ia o te loi. 45Pea ko au, koteuhi e au fakaha te mooni, e mole kotou tui mai kia au. 46Ko ai ia koutou e ina mau anai he agahala ia au? Kapau e au fakaha te mooni, kotea e mole kotou tui mai ai kia au? 47Ko ae mai te Atua e fakalogo ia ki te u folafola a te Atua; e mole kotou fakalogo koteuhi e mole ko kotou ia mai te Atua.

Sesu mo Apalahamo

48Nee tali leva e te kau Sutea kia ia: Pe nee mole matou mooni koa i tamatou ui ko he Samalia ia koe, pea e nofo he temonio ia koe? 49Nee toe tali leva e Sesu: E mole nofo he temonio ia au; kae e au fakaapaapa ki taku Tamai, pea e kotou laukovi mai kia au. 50E mole au kumi pe toku kololia, e i ai he tahi e ina kumi ia pea e ina fakamaaui. 51E mooni, e mooni, e au ui atu kia koutou, kapau e i ai he tahi e ina taupau taku folafola, e mole sio anai ia ki te mate o heegata. 52Nee ui leva e te kau Sutea kia ia: I te lakaga nei, e matou iloi e nofo ia koe he temonio. Kua mate ia Apalahamo, tatau mo te kau polofeta, pea e ke ui: Kapau e ia he tahi e ina taupau taku folafola e mole mate anai ia o heegata. 53Pe e ke lahi age i tamatou tamai ko Apalahamo ae kua mate? Kua mamate foki mo te kau polofeta. E ke ui ko ai ia koe? 54Nee tali leva e Sesu: Kapau e au fakakololia kia au totonu, pea e noa toku kololia. Ko taku Tamai ae e fakakololia kia au, ia ia ae e kotou ui ko tokotou Atua, 55kae e mole pe kotou iloi ia; ko au, e au iloi ia; pea kapau e au ui e mole au iloi ia, e au tatau anai mo koutou, ko he tagata gutu loi. Kae e au iloi ia, pea e au taupau tana folafola. 56Ko Apalahamo, takotou tamai, ne hopohopo i te fiafia i tana fia sio ki toku aho: pea nee sio ia ki ai, pea nee fakafiafia ia. 57Nee ui age leva e te kau Sutea kia ia: E heeki ke tau nimagofulu, pea nee ke sio kia Apalahamo! 58Nee ui age leva e Sesu kia natou: E mooni, e mooni, e au ui atu kia koutou, i mua o te tupu mai o Apalahamo, e au afio.

59I te mea aena, nee natou too leva ni maka ke natou taumakai ia; kae nee nono leva Sesu, pea nee mavae leva ia mai te fale tapu.

Currently Selected:

EVASELIO A SOANE 8: WB2011

Highlight

Copy

Want to have your highlights saved across all your devices? Sign up or sign in

Les droits sont administrés par Midi Bible, une branche de la Société Biblique de Genève
Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland

Learn More About Ko te Tohi Tapu i te fakauvea