EVASELIO A SOANE 6
6
Liuliuga o te u pane ki te toko nima afe
1Hili ia, nee alu leva ia Sesu ki te tahi fahai o te tai o Kalilea, nee higoa foki ko te tai o Tipeliate. 2Nee mulimuli leva he hahai kaugamalie ia ia, koteuhi nee natou sisio ki te u milakulo nee ina fai ki te hahai mahaki. 3Nee hake leva ia Sesu ki te mouga, pea nee nofo leva ia ki lalo i ai mo ana tisipulo.
4Pea nee kua ovi mai foki te Pasikate, te aho lahi o te kau Sutea.
5I te hiki ake e Sesu ona mata, nee sio leva ia ki he hahai kaugamalie nee omai kia ia, pea nee ina ui leva kia Filipo: E kofea ae e tou totogi anai mai ai ni pane ke fafaga ai te hahai aeni? 6Nee ina ui te mea aia ke ahiahii ai ia Filipo, koteuhi nee ina iloi te mea ka ina fai anai. 7Nee tali leva e Filipo kia ia: Ko te u foi pane e tou mau anai ki ni foi tenalio e luageau, e mole feauga anai ke natou tahi mo ia te moi pane. 8Ko he tahi o ana tisipulo ko Atelea, tehina o Simone Petelo, nee ina ui age leva kia ia: 9E i heni he kii tama ae e ina mau ni foi pane olese* e nima mo ni kii ika e lua; kae kotea te mea aia ki te kaugamalie? 10Nee ui leva e Sesu: Kotou fakanonofo natou ki lalo. Nee lahi te luna i te kogamea aia. Nee natou nonofo leva ki lalo, nee ko te toko nima afe tagata ape tonatou hahai. 11Nee too leva e Sesu te u foi pane, o fakafetai, pea nee ina tufatufa leva natou kia natou nee nonofo i lalo; nee ina toe foaki age fena kia natou ni ika, o fakalogo ki tonatou loto. 12I tanatou makokona, nee ina ui leva ki ana tisipulo: Koutou tanaki te u toega kai ke aua naa maumau he mea. 13Nee natou tanaki leva natou, pea nee natou fakafonu leva ni polapola e hogofulu ma lua aki te u toega o te u foi pane e nima, i te osi o tanatou kai fulifuli.
14I te sisio a te hahai aia ki te milakulo nee fai e Sesu, nee natou ui leva: E ko ia mooni aeni ko te polofeta e tonu ke hau ki te malamanei. 15I te iloi e Sesu, ka natou omai anai o too ia ke fakanofo ke hau, nee toe alu leva ia toko tahi ki te mouga.
Haele a Sesu i te tai
16I te hau o te afiafi, nee hifo leva ana tisipulo ki te matatai. 17Nee natou hopo leva ki he vaka, pea nee natou fagona leva i te tai o taumua ki Kafanaume. Nee kua pouli foki, kae nee heeki kaku ake ia Sesu kia natou. 18Nee agi leva he matagi lahi pea nee hou mo te tai. 19I tanatou tauaalo nee kua natou mamao mai te kele i ni kilometa e tolu pee ono ape, nee natou sisio leva kia Sesu nee haele age ia i te fuga o te tai, o fakaovi age ki te vaka. Pea nee natou matataku leva. 20Kae nee ui age leva e Sesu kia natou: E ko au, aua takotou mataku! 21Nee natou loto leva ke fakaheka ia ki te vaka, pea fokifa pe nee tau leva te vaka ki te kogamea nee natou olo ki ai.
Sesu, pane o te mauli
22Ko te hahai ae nee nonofo i te tahi tafaaki o te tai, nee natou fakatokagai leva nee tau i te kogamea aia he vaka pe e tahi, pea nee mole heka ia Sesu i te vaka aia mo ana tisipulo, kae nee natou olo ateaina pe. 23I te pogipogi ake, nee kaku age leva ni ihi vaka mai Tipeliate ki te kogamea ae nee natou kai ai te pane i te osi o te fakafetai a te Aliki, 24pea nee sisio leva ni ihi o te hahai kua puli ia Sesu mo ana tisipulo, nee natou hopo leva ki te u vaka aena o olo ki Kafanaume, o kumi ia Sesu. 25Nee natou mau leva ia i te fahai aia o te tai, pea nee ui age leva kia ia: Pule, nee ke hau anafea ki heni? 26Nee tali leva e Sesu kia natou: E mooni, e mooni, e au ui atu kia koutou, e koutou kumi au, o mole tupu ko takotou sisio ki ni milakulo, kae o tupu ko takotou kai ni pane o makokona. 27Koutou gaue, aua ki te meakai ae e maumau, kae ki te meakai ae e tologa ki te mauli heegata, te meakai ae e foaki atu anai e te Foha o te tagata kia koutou; he ko ia ae nee fakailoga e te Tamai, e te Atua totonu, aki tona fakailoga. 28Nee natou ui leva kia ia: Kotea e tonu ke matou fai, ke fakahoko ai te u gaue a te Atua? 29Nee tali leva e Sesu kia natou: Ko te gaue a te Atua, ke kotou tui kia ia ae nee ina fekaui mai. 30Nee natou ui leva kia ia: Kotea te milakulo e ke fai ke matou sio ki ai, pea ke matou tui kia koe? Kotea e ke fai? 31Nee kai e amatou tamai te mane i te toafa, o mulimuli ki te mea e tuu i te Tohi:
Nee ina foaki kia natou te pane o te lagi ke natou kai.
32Nee ui leva e Sesu kia natou: E mooni, e mooni, e au ui atu kia koutou, nee mole foaki atu e Moisese te pane mai te lagi kia koutou, kae ko taku Tamai ae e ina foaki atu kia koutou te pane mooni mai te lagi; 33koteuhi ko te pane a te Atua e ko ia ae e hifo mai lagi o foaki te mauli ki te malamanei.
34Nee natou ui age leva kia ia: Aliki, foaki tuumau mai kia matou te pane aia.
35Nee ui leva e Sesu kia natou: Ko au ko te pane o te mauli. Ko ae e hau kia au, e mole toe fia kai anai ia, pea ko ae e tui kia au, e mole toe fia inu anai ia. 36Kae nee au ui atu kia koutou, kua koutou sio kia au, kae e mole pe kotou tui. 37Ko natou fuli ae e foaki mai kia au e taku Tamai e natou omai anai kia au, pea e mole au tuku anai ki fafo ia ae e hau kia au. 38Koteuhi nee mole au hifo mai te lagi o fai toku finegalo, kae te finegalo o ae nee ina fekaui mai au. 39Pea ko te finegalo o ae nee ina fekaui mai au, ke aua naa au tuku ke puli he tahi pe o natou fuli ae nee ina foaki mai kia au; kae ke au toe fakatuuake natou i te aho fakamuli. 40Ko te finegalo a taku Tamai, e ko ia ae e sio ki te Alo pea e tui kia ia ke ina mau te mauli heegata, pea ke au toe fakatuuake ia i te aho fakamuli.
41Nee mumuhu leva te kau Sutea kia ia, koteuhi nee ina ui: Ko au ko te pane ae nee hifo mai te lagi. 42Pea nee natou ui: Pe e mole ko Sesu koa aena, te foha o Sosefo, ae e tou iloi tana tamai mo tana fae? Pea kotea e ina ui ai: Nee au hifo mai te lagi?
43Nee tali leva e Sesu kia natou: Aua takotou femumuhuaki ia koutou. 44E mole feala ke hau he tahi kia au, mo kapau e mole taki mai ia kia au e taku Tamai ae nee ina fekaui mai au; pea e au toe fakatuuake anai ia i te aho fakamuli. 45E tuu i te tohi a te kau polofeta:
E ako anai natou fuli e te Atua.
Koia ko ae e logo ki te Tamai, pea e ina tali tana akonaki, e hau ia kia au. 46Pea e heeki he tahi kua sio ki te Tamai, gata pe kia ia ae nee hau mai te Atua; ko ia aena nee sio ki te Tamai. 47E mooni, e mooni, e au ui atu kia koutou, ko ae e tui kia au e ina mau te mauli heegata. 48Ko au ko te pane o te mauli. 49Nee kai e akotou tamai te mane i te toafa, pea nee natou mamate. 50Koeni te pane ae e hifo mai te lagi, o tupu ko ae e ina kai ia ke aua naa mate ia ia. 51Ko au ko te pane mauli ae nee hifo mai te lagi. Kapau e kai he tahi ki te pane aeni, e mauli anai ia o heegata; pea ko te pane ae e au foaki anai, ko toku kakano, ae e au foaki anai ki te mauli o te malamanei.
52I te mea aena, nee fepalalauaki leva te kau Sutea, o ui: Pe e feala feafeai tana foaki mai tona kakano ke tou kai?
53Nee ui leva e Sesu kia natou: E mooni, e mooni, e au ui atu kia koutou, kapau e mole kotou kai te kakano o te Foha o te tagata, pea kapau e mole kotou inu tona toto, e mole kotou mau te mauli ia koutou totonu. 54Ko ae e ina kai toku kakano pea e ina inu toku toto e ina mau te mauli heegata; pea e au toe fakatuuake anai ia i te aho fakamuli. 55Koteuhi ko toku kakano ko he meakai mooni ia, pea ko toku toto ko he meainu mooni ia. 56Ko ae e ina kai toku kakano pea e inu toku toto, e nofo ia ia te au, pea mo au ia te ia. 57O hage ko te Tamai ae e mauli nee ina fekaui mai au, pea e au mauli i te Tamai, ko ae e kai kia au e mauli anai ia te au. 58Koeni te pane ae nee hifo mai te lagi. E mole tatau ia mo te mane ae nee kai e akotou tamai pea nee natou mamate: Ko ae e ina kai te pane aeni e mauli anai ia o heegata.
59Nee fakaha e Sesu te u mea aeni i te sinakoka, i tana akonaki i Kafanaume.
Folafola o te mauli heegata
60I te logo ki ai a te kaugamalie o tana kau tisipulo, nee natou ui leva: E mamafa te folafola aeni: Ko ai ae kei fia fakalogo ki ai? 61I te iloi e Sesu i tona loto nee mumuhu ana tisipulo o tupu ko te mea aia, nee ina ui leva kia natou: Pe e fakatupu higa te mea aeni kia koutou? 62Pea e feafeai age anai moka koutou sisio ki te Foha o te tagata e hake ake ki te kogamea nee nofo ai i mua? 63Ko te Laumalie ae e ina fakamauli. Ko te kakano e mole aoga ki he mea. Ko te u folafola nee au fakaha atu kia koutou e natou Laumalie pea e natou mauli. 64Kae e i ai ni ihi ia koutou e mole pe natou tui. Koteuhi nee iloi e Sesu mai te kamataaga natou ae e mole natou tui, pea mo ia ae ka ina fakatau anai ia. 65Pea nee ina toe ui leva: Ko te tupuaga aia o taku ui atu kia koutou e mole feala ke hau he tahi kia au mo kapau e mole foaki te mea aia kia ia e te Tamai.
Fakaha e Petelo ko Sesu ko Kilisito
66Talu mai te lakaga aia, nee mavae leva he kaugamalie o tana kau tisipulo, pea nee mole natou toe olo leva mo ia.
67Nee ui leva e Sesu ki te toko hogofulu ma lua: Pea ko koutou, pe e mole fia olo foki mo kotou? 68Nee tali leva e Simone Petelo kia ia: Aliki, ke motou olo anai kia ai? E ke mau te u folafola o te mauli heegata. 69Pea nee matou tui, pea nee matou iloi ko te Kilisito ia koe, ko te Maonioni a te Atua. 70Nee tali leva e Sesu kia natou: Pe e mole ko au ae nee au filifili koutou, ia koutou ko te toko hogofulu ma lua? Pea ko he tahi ia koutou ko he temonio ia! 71Nee palalau ia o uhiga mo Sutasi Isekaliote, te foha o Simone; koteuhi ko ia nee tonu ke ina fakatau ia Sesu, pea ko he tahi ia o te toko hogofulu ma lua.
Currently Selected:
EVASELIO A SOANE 6: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
