EVASELIO A SOANE 13
13
Fakaha o te ofa lahi o te Alo
1I mua o te Pasikate, i te iloi e Sesu kua hoko mai tona hola ke alu ai mai te malamanei ki te Tamai, pea i tona ofa ia natou ae a ana nee i te malamanei, nee ina fakakatoa leva ki tona gataaga tona ofa kia natou.
Fufulu e Sesu o te u vae o ana tisipulo
2I te lolotoga o te kai afiafi, kae kua tuku e te tiapolo ki te loto o Sutasi Isekaliote, foha o Simone, te manatu ke fakatau ia ia, 3pea nee iloi e Sesu nee tuku e te Tamai te u mea fuli ki ona nima, pea nee hau ia mai te Atua, pea nee alu ia ki te Atua, 4nee tuu ake leva ia mai te laupapa, pea nee ina hui ona kofu, pea nee ina too he kie holoholo o hulu aki ia. 5Pea nee ina liligi leva he vai ki he pesini, pea nee ina kamata leva te fufulu o te u vae o te kau tisipulo, pea mo holoholoi aki te kie holoholo ae nee ina hulu. 6Nee hau leva ia kia Simone Petelo, pea nee ui age leva e Simone Petelo kia ia: Ko koe, Aliki, e ke fufulu oku vae! 7Nee tali leva e Sesu kia ia: Ko te mea ae e au fai, e mole ke mahino ki ai i te temi nei, kae e ke mahino anai ki ai ki amuli. 8Nee ui leva e Petelo kia ia: Kailoa, e mole ke fufulu anai oku vae i he aho. Nee tali leva e Sesu kia ia: Kapau e mole au fufulu ia koe, pea e mole ke mau anai hou tofiga mo au. 9Nee ui age leva e Simone Petelo kia ia: Aliki, e mole gata pe i te u vae, kae mo te u nima foki pea mo te ulu. 10Nee ui age leva e Sesu kia ia: Ko ae kua maanu, e aoga pe kia ia ke fufulu ona vae ke maa katoa ia; pea e kotou maa, kae e mole ko koutou fuli. 11Koteuhi nee ina iloi ia ia ae ka ina fakatau ia; koia e ina ui ai: E mole ko koutou fuli.
12I te osi o tana fufulu onatou vae, nee ina toe tui leva ona kofu, pea nee toe heka ifo leva ia ki te laupapa, o ui kia natou: Pe e kotou mahino ki te mea nee au fai kia koutou? 13E kotou fakahigoa au ko te Pule mo te Aliki, pea e mooni takotou ui, koteuhi ko au aia. 14Kapau leva nee au fufulu okotou vae, e au ko te Aliki mo te Pule, pea e tonu foki ke kotou fefufuluaki okotou vae; 15koteuhi kua au tuku atu kia koutou he faifaitakiaga, o tupu ke kotou fai o hage ko taku fai kia koutou. 16E mooni, e mooni, e au ui atu, e mole lahi age te kaugana i tona aliki, pea e mole lahi age te faifekau i ae nee ina fekaui ia ia. 17Kapau e kotou iloi te u mea aena, e kotou manuia, kehe pe ke kotou fai natou.
Fakaha e Sesu ia ia ka ina fakatagai ia
18E mole au palalau atu o uhiga mo koutou fuli; e au iloi natou ae nee au filifili. Kae e tonu ke fakahoko te Tohi tapu:
Ko ae e ina kai mo au te pane
Kua hiki tona muli vae kia au. 19Koeni e au fakaha te mea aena kia koutou kae e heeki hoko mai ia, o tupu ka hoko mai anai ia, ke kotou tui ko au ia.
20E mooni, e mooni, e au ui atu kia koutou, ko ae e ina talitali he tahi e au fekaui anai, e ina tali au; pea ko ae e ina tali au, e ina tali ae nee ina fekaui mai au.
21I te osi o tana palalau aia, nee hoha leva ia Sesu i tona laumalie, pea nee ina ui leva: E mooni, e mooni, e au ui atu kia koutou, e fakatau anai au e he tahi o koutou. 22Nee fesioaki te kau tisipulo ia natou, o mole natou iloi pe nee palalau ia ki ai. 23Ko he tahi o ana tisipulo, ae nee ofa ai Sesu, nee falafalanaki ki te fatafata o Sesu. 24Nee kamo age leva ia Simone Petelo kia ia ke ina fehui pe ko ai ae nee palalau ia ki ai. 25Pea nee punopunou leva te tisipulo aena ki te fatafata o Sesu, o ui age kia ia: Aliki, ko ai? 26Nee tali leva e Sesu: Ko ia ae e au foaki anai ki ai te potu pane pekei. Pea nee ina pekei leva te potu pane, o foaki age kia Sutasi, foha o Simone, te Isekaliote. 27I te temi pe nee ina foaki age ai te potu pane, nee ulu leva ia Satana kia Sutasi. Pea nee ui leva e Sesu kia ia: Ko te mea e ke fai, fai ia ke vave. 28Kae nee mole mahino leva he tahi o natou ae nee nonofo i te laupapa pe kotea te mea nee ina ui age kia ia. 29Kae ko ni ihi o natou nee manatu, o tupu nee nofo ia Sutasi mo te kesi paaga, nee fia ui e Sesu kia ia: Totogi te mea ae e aoga mai kia tatou o uhiga mo te aho lahi, pe nee ina fekau age kia ia ke ina foaki he mea ki te kau masiva. 30I tana too te potu pane, nee fai mo ulu ia Sutasi ki fafo. Kua pouli.
31I te kua ulu a Sutasi ki fafo, nee ui leva e Sesu: I te lakaga nei, kua fakakololiai te Foha o te tagata, pea kua fakakololiai te Atua ia ia. 32Kapau kua fakakololiai te Atua ia ia, e toe fakakololiai anai ia e te Atua ia ia totonu, pea e ina fakakololiai anai ia ia.
33Nai aku fanau liliki, ko he temi sii pe kei au nofo ai mo koutou. E kotou kumi anai au; pea o hage ko taku ui age ki te kau Sutea: E mole feala ke kotou omai ki te kogamea ae e au alu ki ai, e au toe fakaha atu foki te mea aia kia koutou i te lakaga nei. 34E au foaki atu kia koutou he fekau foou: Kotou feofaaki ia koutou; o hage ko au, nee au ofa ia koutou, ko koutou anai, koutou feofaaki ia koutou. 35I te mea aia e iloi anai e te tagata fuli, ko koutou ko aku tisipulo, mo kapau e koutou mau te feofaaki ia koutou.
Fakaha e Sesu te fakafisi a Petelo
36Nee ui age leva e Simone Petelo kia ia: Aliki, pe e ke alu ki fea? Nee tali leva e Sesu: E mole feala i te lakaga nei ke ke mulimuli mai ia au i te kogamea e au alu ki ai, kae e ke mulimuli mai anai ia au i he lakaga ki amuli. 37Nee ui age leva e Petelo kia ia: Aliki, kotea e mole feala ai ke au mulimuli atu ia koe i te lakaga aeni? E au foaki anai toku mauli o uhi ko koe. 38Nee tali age leva e Sesu: E ke foaki anai tou mauli o uhi ko au! E mooni, e mooni, e au ui atu kia koe, e heeki uua anai te moa tagata kae kua ke fakafisi tua tolu kia au.
Currently Selected:
EVASELIO A SOANE 13: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
