EVASELIO A SOANE 12
12
Fakamagoni e Malia te u vae o Sesu i Petania
1Ko aho e ono i mua o te Pasikate, nee alu leva ia Sesu ki Petania, ki te kogamea nee nofo ai Lasalo, ae nee ina toe fakatuuake mai te kau mate. 2I ai, nee teuteui leva he kaitahi kia ia; nee selevisi ia Maleta, pea ko Lasalo nee ko he tahi o natou nee nonofo i te laupapa kai mo ia. 3Nee too leva e Malia he kaloni, ko he nale taufua, ko he vaeluai liti, nee totogi mamafa aupito, pea nee ina takai leva te u vae o Sesu, pea nee ina holoholoi leva naua aki tona lauulu; pea nee fonu leva te fale i te magoni o te kaloni. 4Ko he tahi o ana tisipulo, ko Sutasi Isekaliote, ae nee tonu ke ina fakatau ia ia, nee ina ui leva: 5Kotea ae nee mole fakatau ai te kaloni aena ke foi tenalio tolugeau, ke foaki ki te kau masiva? 6Nee palalau ia ki te mea aia, o mole tupu nee mamahi ia ki te kau masiva, kae o tupu ko he tagata kaihaa ia, pea i tana taupau te kesi paaga, nee ina tau too te mea ae nee tuku ki ai. 7Kae nee ui leva e Sesu: Tuku ia ke ina taupau te kaloni aeni ki toku aho tanu. 8E koutou mau tuumau te kau masiva mo koutou, kae e mole kotou mau tuumau au.
9Nee iloi leva e he kaugamalie o te kau Sutea nee nofo Sesu i Petania, pea nee natou omai leva ki ai, o mole tupu pe ko Sesu, kae o tupu ke natou sio kia Lasalo ae nee ina fakatuuake mai te kau mate. 10Nee fono leva te kau pule faisakilifisio ke natou tamatei mo Lasalo, 11uhi ko ia nee mavae he tokalahi o te kau Sutea pea nee natou tui kia Sesu.
Ulu a Sesu ki Selusalemi
12I te aho ake, nee logo leva te tokolahi o te hahai kaugamalie ae nee omai ki te aho lahi nee hake ake ia Sesu ki Selusalemi; 13nee natou too leva ni touluiakau, pea nee natou olo leva o fakafelavei kia ia, mo kalaga: Hosana! E manuia ae e haele mai i te huafa o te Aliki, te hau o Iselaele. 14Nee mau leva e Sesu he uhii asino, pea nee heka leva ia ki ai, o mulimuli ki te mea nee tohi:
15 Aua naa ke mataku, taahine o Sione;
Koeni, e hau tou hau,
E heka ia i te uhii asino.
16Nee mole mahino leva ana tisipulo ki te mea aena i te temi aena; kae i te osi o te fakakololiai o Sesu, nee natou manatui leva nee tohi te u mea aena kia ia, pea nee fakahoko natou kia ia.
17Pea nee fakamooni kia ia natou fuli ae nee nonofo mo Sesu, i tana kalagai ia Lasalo mai te tanuma mo tana fakatuuake ia mai te kau mate; 18pea nee omai leva te hahai ki ona mua, koteuhi nee natou logo ki te milakulo aena nee ina fai. 19Nee ui leva e te kau faliseo: E kotou sio e mole kotou fealagia he mea; koeni, kua mulimuli te hahai katoa ia ia.
Ko ni Keleka nee fia sisio kia Sesu
20Ko ni Keleka, ia natou ae nee hake ki Selusalemi o atolasio i te aho lahi, 21nee olo age leva kia Filipo, mai Petesaita i Kalilea, o kole kia ia: Aliki, e matou fia sio kia Sesu. 22Nee alu leva ia Filipo o fakaha te mea aena kia Atelea, pea nee fakaha leva ia e Atelea mo Filipo kia Sesu.
23Nee tali leva e Sesu kia naua: Kua hoko mai te aho ae e tonu ke fakakololiai ai te Foha o te tagata. 24E mooni, e mooni, e au ui atu kia koutou, kapau e mole mate te fuai fulumeto e to ki te kele, e nofo toko tahi ia; kae kapau e mate ia, e fua ia o lahi. 25Ko ae e ofa ki tona mauli, e ina pulihi anai ia, kae ko ae e fehia ki tona mauli i te malama aeni e ina tauhi anai ia ki te mauli heegata. 26Kapau e tauhi he tahi kia au, ke mulimuli mai ia ia au; pea ko te kogamea e au i ai, pea e i ai anai mo taku faifekau. Kapau e tauhi he tahi kia au, e fakamauhigai anai ia e te Tamai. 27I te lakaga nei e hoha toku laumalie. Pea kotea e au ui anai?… Tamai, fakahao au mai te hola aeni?… Kae e ko te hola aeni nee au hau ki ai! 28Tamai, fakakololia tou huafa! Pea nee hau leva he leo mai te lagi: Kua au fakakololiai ia, pea e au toe fakakololiai anai ia.
29Ko te hahai ae nee nonofo i ai pea nee natou logo ki te leo, nee natou ui ko he mana nee uulu. Nee ui e ihi ko he aselo nee palalau kia ia.
30Nee ui leva e Sesu: E mole ha mai te leo aeni o uhi ko au; kae o uhi ko koutou. 31Koeni te hola e fakamaaui ai te malama aeni; i te lakaga nei e li anai te pule o te malama aeni ki fafo. 32Pea ko au, ka hiki ake anai au ki oluga mai te kele, e au toho mai anai kia au te tagata fuli pe. 33I tana tala feia, nee ina fakaha te fahiga mate nee tonu ke mate ai. 34Nee tali leva e te hahai kia ia: Nee matou ako i te lao e nofo te Kilisito o heegata; pea e feafeai leva tau ui: E tonu ke hiki ake ki oluga te Foha o te tagata mai te kele? Ko ai te Foha o te tagata aia? 35Nee ui leva e Sesu kia natou: Kei nofo te malama i he kii temi siisii i lotomalie o koutou. Kotou haele kei kotou mau te malama, koteuhi naa popo koutou e te fakapouli: Ko ae e haele i te fakapouli e mole ina iloi pe alu ia ki fea. 36Kei kotou mau te malama, kotou tui ki te malama, ke kotou liliu ko ni fanau o te malama. I te osi o te fakaha e Sesu te u mea aena, nee alu leva ia, pea nee nono mamao leva ia maia natou.
Loto fefeka o te hahai
37Logo te lahi o te u milakulo nee fai e Sesu i onatou mua, nee mole natou tui aipe kia ia; 38o tupu ke fakahoko te folafola nee fakaha e te polofeta ko Esaia: Aliki,
Ko ai nee tui ki tamatou akonaki?
Pea ko ai nee fakaha ki ai te nima o te Aliki?
39Pea nee mole feala ke natou tui, koteuhi nee toe ui e Esaia:
40 Kua ina fakakivi onatou mata;
Pea kua ina fakafefeka onatou loto,
Ke aua naa natou sio aki onatou mata,
Ke aua naa natou mahino i onatou loto,
Pea ke aua naa natou tafoki, pea ke aua naa au fakamauli natou.
41Nee palalau Esaia ki te u mea aia, i tana sio ki tona kololia, pea mo tana palalau o uhiga mo ia.
42Kae logo te mea aia, nee tokalahi i te kau pule nee tui leva kia ia; kae nee mole natou fakaha ia koteuhi ko te kau faliseo, naa kapu natou mai te sinakoka. 43Koteuhi nee lahi age tanatou ofa ki te kololia o te tagata i te kololia o te Atua.
44Pea nee kalaga Sesu o ui: Ko ia ae e tui kia au, e mole tui ia kia au, kae e tui ia ki ae nee ina fekaui mai au; 45pea ko ae e sio kia au, e sio ia ki ae nee ina fekaui mai au. 46Nee au hau o hage ko he malama ki te malamanei, ke aua naa nofo i te fakapouli ia ia e tui mai kia au. 47Kapau e logo he tahi ki aku folafola, kae e mole ina taupau natou, e mole ko au ae e au fakamaaui ia ia; koteuhi nee mole au hau o fakamaaui te malamanei, kae o fakamauli te malamanei. 48Ko ae e ina siaki au pea e mole ina tali aku folafola e ina mau tona tui fakamaau; ko te folafola ae nee au fakaha, ko ia ae e ina fakamaaui anai ia i te aho fakamuli. 49Koteuhi nee mole au palalau ia au totonu; kae ko te Tamai, ae nee ina fekaui mai au, nee ina fakatotonu mai kia au te mea ae e tonu ke au fakaha pea mo akonaki ki ai. 50Pea e au iloi ko tana fekau ko te mauli heegata. Koia, ko te u mea e au fakaha, e au fakaha atu natou o hage ko tona fakaha mai natou kia au e te Tamai.
Currently Selected:
EVASELIO A SOANE 12: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
