EVASELIO A SOANE 11
11
Fakamauli o Lasalo
1Nee i ai he tagata mahaki, ko Lasalo, mai Petania, kolo o Malia mo Maleta, tona tehina. 2Ko te Malia aena nee ina takai kaloni te Aliki pea mo holoholo ia aki tona lauulu, pea ko tona tuagaane ia Lasalo ae nee mahaki. 3Nee ave leva e te tautehina he poapoaki kia Sesu o tala age kia ia: Aliki, koeni, ko ia ae e ke ofa ai e mahaki. 4I tana logo ki te mea aia, nee ui leva e Sesu: E mole iku te mahaki aeni ki te mate, kae ki te kololia o te Atua, o tupu ke fakakololiai ai te Alo o te Atua.
5Kae nee ofa ia Sesu kia Maleta, mo tona tehina, pea mo Lasalo. 6I tana logo ki te mahaki o Lasalo, nee toe nofo leva ia o aho lua i te kogamea nee nofo ai. 7Hili ia, pea nee ina ui leva ki te kau tisipulo: Tou toe liliu ki Sutea! 8Nee ui leva e te kau tisipulo kia ia: Pule, nee heeki fualoa te kumi e te kau Sutea ke taumakai ia koe pea e ke toe liliu ki Sutea! 9Nee tali leva e Sesu: Pe e mole ko ni hola e hogofulu ma lua i te aho? Kapau e haele he tahi i te aho, e mole tukia ia koteuhi e sio ia ki te malama o te malamanei; 10kae kapau e haele he tahi i te pouli, e tukia ia koteuhi e mole he malama ia ia. 11I te osi o te u folafola aia, nee ina ui leva kia natou: Ko totatou kaumea ko Lasalo e moe, kae e au alu nei o fafagu ia. 12Nee ui leva e te kau tisipulo kia ia: Aliki, kapau e moe ia, e lelei anai ia. 13Nee palalau ia Sesu ki tona mate, kae nee natou manatu e palalau ia ki te malolo o te moe. 14Pea nee ui fakahagatonu leva e Sesu kia natou: Kua mate ia Lasalo. 15Pea e au fiafia nee mole au nofo i ai, o tupu ko koutou, koteuhi ke kotou tui. Kae tou olo kia ia. 16I te mea aena, ko Tomasi, ae nee higoa ko Titimo, nee ina ui age leva ki ona tehina tisipulo: Tou olo mo tatou, pea tou mamate fakatahi mo ia.
17I tana kaku age ki ai, nee mau leva e Sesu ia Lasalo kua aho fa tona tuku i te tanuma. 18Kae nee mamao ia Petania mai Selusalemi i ni kilometa e tolu ape, 19pea ko te tokolahi o te kau Sutea nee omai kia Maleta mo Malia, o fakapelepelei naua i te mate o tona tuagaane.
20I te logo a Maleta kua kaku age ia Sesu, nee alu leva ia ki ona mua, kae nee nofo pe Malia i te fale. 21Nee ui age leva e Maleta kia Sesu: Aliki kana nee ke i heni, nee mole mate anai toku tuagaane. 22Kae, i te temi nei pe, e au iloi ko te u mea fuli e ke kole ki te Atua, e ina foaki fuli atu anai natou kia koe. 23Nee ui age leva e Sesu kia ia: E toe tuuake anai tou tuagaane. 24Nee tali age leva e Maleta kia ia: E au iloi e toe tuuake anai ia i te toe tuuake, i te aho fakamuli. 25Nee ui age leva e Sesu kia ia: Ko au ko te toe tuuake mo te mauli, ko ae e tui mai kia au e mauli anai ia, tatau pe e mate ia; 26pea ko ae e mauli mo tui mai kia au e mole toe mate anai ia. Pe e ke tui ki ai? 27Nee ina ui age leva kia ia: Io, Aliki, e au tui ko koe ia Kilisito, te Alo o te Atua, ae nee tonu ke hau ki te malamanei.
28I te osi o tana palalau aia, nee alu leva ia Maleta. Pea nee ina paui fakafufu leva ia Malia, tona kii tehina, o fanafana age kia ia: Kua nofo te pule i heni, pea e ina fakaala mai ia koe. 29I te logo a Malia ki te mea aia, nee tuu fakavilivili leva ia ki oluga, o alu kia ia. 30Koteuhi nee heeki ulu ia Sesu ki te kolo, kae kei nofo ia i te kogamea ae nee felavei ai ia mo Maleta. 31I te sio a te kau Sutea ae nee nonofo mo Malia i te fale o fakapelepelei ia ia, ki te tuu fakavilivili a Malia o ulu ki fafo, nee natou mulimuli leva ia ia, o ui: E alu ia ki te tanuma o tagi i ai.
32I te kaku age a Malia ki te kogamea ae nee nofo ai Sesu o sio kia ia, nee fakamapee leva ia ki ona vae, o ui age kia ia: Aliki, kana nee ke nofo i heni, nee mole mate leva toku tuagaane. 33I te sio a Sesu ki te tagi a Malia mo te kau Sutea nee omai mo ia, nee mamahi lahi ia i tona laumalie, pea nee fonu ia i te ofa. 34Pea nee ina ui leva: Nee kotou tuku ia ki fea? Pea nee natou tali age leva kia ia: Aliki, hau o sio.
35Nee tagi leva Sesu.
36I te mea aia, nee ui leva e te kau Sutea: Koutou sio ki te lahi o tona ofa kia ia! 37Pea nee ui leva e ihi o natou: Ko ia ae nee ina fakaava te u mata o te kivi, pe nee mole feala pe kia ia hana faigai ke aua naa mate te tagata aeni?
38Nee toe tukumanava leva Sesu i tona loto, pea nee alu leva ia ki te tanuma. Ko he ana ia pea nee tapunui ia aki he maka. 39Nee ui leva e Sesu: Koutou too kehe te maka. Nee ui age leva e Maleta, te tuagaane o te mate, kia ia: Aliki, kua mamanu foki ia, he kua aho fa tona tuku i ai. 40Nee ui age leva e Sesu kia ia: Pe nee mole au ui atu kia koe, kapau e ke tui, pea e ke sio anai ki te kololia o te Atua? 41Nee natou too leva te maka. Pea nee hiki leva e Sesu ona mata ki oluga, o ui: Tamai, e au fakafetai kia koe koteuhi nee ke tali taku kole. 42Kia au, e au iloi e ke tali tuumau au; kae e au palalau o tupu ko te hahai aeni e natou takatakai au, koteuhi ke natou tui ko koe ae nee ina fekaui mai au. 43I te osi o tana palalau aena, nee kalaga leva ia o leo lahi: Lasalo, hau ki fafo! 44Pea nee hau leva te mate ki fafo, kei haihai ona vae mo ona nima aki ni kiehai, pea kei takatakai ona mata aki he kie tupenu. Nee ui age leva e Sesu kia natou: Koutou vetevete ia, pea koutou tuku age ia ke alu.
45Nee tokalahi o te hahai Sutea nee olo age kia Malia, pea nee natou mamata ki te mea nee fai e Sesu, nee natou tui leva kia ia.
Fono ke tamatei ia Sesu
46Kae nee olo leva ni ihi o natou o kumi te kau faliseo, pea nee natou fakaha leva kia natou te mea nee fai e Sesu. 47Nee tanaki leva e te kau pule faisakilifisio mo te kau faliseo te fono lahi, o ui: Kotea ka tou fai anai? Koteuhi e lahi te u milakulo e fai e te tagata aeni. 48Kapau e tou tuku ia ke fai, e tui anai te tagata fuli pe kia ia pea e omai anai te kau Loma o maumaui totatou kolo mo totatou puleaga. 49Ko he tahi o natou, ko Kaifa, nee pule faisakilifisio ia i te tau aena, nee ina ui age leva kia natou: E mole kotou mahino pe ki he mea. 50Kotou fakakaukau: E lelei age kia koutou ke mate he tagata e tahi ki te hahai, kae ke aua naa maumaui te puleaga katoa. 51Nee mole palalau ia ki te mea aeni ia ia totonu; kae i tona uhiga ko te pule faisakilifisio ia i te tau aena, nee ina kikite leva e tonu ke mate Sesu ki te puleaga. 52Pea e mole gata pe ki te puleaga; kae ke ina fakatahii ai te u fanau a te Atua nee mavetevete.
53Talu mai te aho aena, nee natou tonu tahi leva ke natou tamatei ia ia. 54Koia nee mole toe fealuaki fakahaha leva Sesu i te kau Sutea; kae nee alu leva ia ki te fenua i tafa o te toafa, ki he kolo nee higoa ko Efalaimi; pea nee nofo ia i ai mo ana tisipulo.
55I te fakaovi ki te Pasikate o te kau Sutea. Pea nee hake leva ki Selusalemi te hahai kaugamalie o te fenua ke natou fai tonatou u fakamaa i mua o te Pasikate. 56Nee natou kumi ia Sesu, pea nee natou feuiaki i te fale tapu: Kotea takotou manatu? Pe e mole hau anai ia ki te aho lahi? 57Koteuhi nee tuku age e te kau pule faisakilifisio mo te kau faliseo he fakatotonu, kapau e iloi e he tahi te kogamea e nofo ai ia, pea ke ina fakaha ia, koteuhi ke natou puke ia ia.
Currently Selected:
EVASELIO A SOANE 11: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
