EVASELIO A SOANE 10

Sesu, te tauhi ovi agalelei

1E mooni, e mooni, e au ui atu kia koutou, ko ae e mole ulu i te matapa ki te lotoa ovi, kae e kake ki ai i he faahi kehe, ko he tagata kaihaa ia mo fakapo. 2Kae ko ae e ulu i te matapa ko te tagata tauhi ovi ia o te faga ovi. 3E avahi kia ia e te tagata leo, pea e logo ki tona leo te faga ovi; e ina paui higoa tana u ovi taki tahi, pea e ina taki natou ki fafo. 4Ka ina fakaulu ana ovi totonu fuli ki fafo, e haele ia i mua o natou; pea e mulimuli te u ovi ia ia, koteuhi e natou iloi tona leo. 5E mole pe natou mulimuli anai i he matapule; kae e natou feholaki anai o mamao maia ia, koteuhi e mole natou iloi te leo o te kau matapule. 6Nee fakaha leva e Sesu te folafola fakatata aena kia natou, kae nee mole natou mahino leva ki te mea nee palalau ia ki ai.

7Nee toe ui leva e Sesu kia natou: E mooni, e mooni, e au ui atu kia koutou, e ko au ko te matapa o te u ovi. 8Ko natou fuli nee muamua mai ia au, e ko ni tagata kaihaa mo fakapo natou; kae nee mole fakalogo te u ovi kia natou. 9E ko au ko te matapa. Kapau e ulu he tahi ia au, e mauli anai ia; e ulu anai ia ki loto pea ulu anai ki fafo, pea e ina mau anai ni gaueaga mouku. 10E hau pe te tagata kaihaa ke ina kaihaa, mo tamatei pea mo maumaui; ko au, nee au hau ke mau e te u ovi te mauli, pea ke natou mau ia o lahi aupito.

11Ko au ko te tauhi ovi agalelei. Ko te tauhi ovi agalelei e ina foaki tona mauli ki ana ovi. 12Kae ko te tagata gaue totogi, e mole ko te tauhi ovi ia, pea e mole a ana te u ovi, e sio ia ki te hau a te lupo, pea e ina liaki te u ovi, kae hola ia; pea ko te lupo e ina ohofi natou pea e ina fakamavetevete natou. 13E hola te tagata gaue totogi, koteuhi ko te tagata gaue totogi ia, pea e mole mamahi ia ki te u ovi. Ko au ko te tagata tauhi ovi agalelei. 14E au iloi aku ovi, pea e natou iloi au, 15o hage ko te Tamai e ina iloi au pea mo au e au iloi te Tamai; pea e au foaki toku mauli ki aku ovi. 16Kei ai foki ni ihi ovi ma aku e heeki kau ki te lotoa ovi aeni, ko natou aia, e tonu ke au aumai natou; e natou logo anai ki toku leo, pea e i ai anai he faga ovi e tahi, mo he tauhi ovi e tahi. 17E ofa te Tamai kia au, koteuhi e au foaki toku mauli, o tupu ke au toe too ia. 18E mole too ia e he tahi ia au, kae e au foaki ia, e au totonu; e au mau te pule ke au foaki toku mauli, pea e au mau te pule ke toe too ia: ko te fekau aia nee au tali mai taku Tamai.

19Nee toe i ai foki, uhi ko te folafola anei, he tahi mavetevete i te kau Sutea. 20Ko te tokolahi o natou nee natou ui: E ina mau he temonio, kua vale ia; kotea e kotou fakalogo ai kia ia? 21Nee ui e ni ihi: E mole ko te u folafola aena a he tagata kua ulu ai he temonio; pe e feala ke fakasio e he temonio te u mata o he kivi?

Aho o te fakamaa o te fale tapu

22Nee fai i Selusalemi te aho fakamanatu o te fakafoou o te fale tapu. Ko te temi momoko aia. 23Pea nee evaeva Sesu i te fale tapu, i lalo o te matapa lahi o Salomone. 24Nee takatakai leva ia e te kau Sutea, o ui kia ia: E kaku ki afea tau fakatatali matou? Kapau ko te Kilisito ia koe, fakaha totonu mai ia kia matou.

25Nee tali age leva e Sesu kia natou: Kua osi i taku fakaha atu kia koutou, kae nee mole kotou tui. Ko te u gaue ae e au fai i te huafa o taku Tamai, e natou fakamooni mai kia au. 26Kae e mole kotou tui mai, koteuhi e mole kotou kau ki aku ovi. 27E fakalogo aku ovi ki toku leo; e au iloi natou, pea e natou mulimuli mai ia au. 28E au foaki kia natou te mauli heegata; pea e mole natou mamate anai i he aho, pea e mole he tahi e ina too anai natou mai toku nima. 29Ko taku Tamai, ae nee ina foaki mai natou kia au, e lahi age ia i te tagata fuli pe; pea e mole he tahi e feala ia ke ina too natou mai te nima o taku Tamai. 30Ko au mo te Tamai e ma tahi.

31Pea nee toe too leva e te kau Sutea ni maka ke natou taumakai ia.

32Nee ui leva e Sesu kia natou: Nee lahi te u gaue lelei nee au fakasio koutou ki ai mai taku Tamai: Ko te gaue fea ae e kotou taumakai ai au? 33Nee tali leva e te kau Sutea kia ia: E mole matou taumakai koe o tupu ko he gaue lelei, kae o tupu ko he fasituu ki te Atua, koteuhi ko koe, ae ko he tagata, e ke fakahoko ia koe ko te Atua. 34Nee tali leva e Sesu kia natou: Pe e mole tuu koa i takotou lao:

Nee au ui: Ko ni atua koutou?

35Kapau nee fakahigoa e te lao ko te u atua natou, natou ae nee fakaha ki ai te folafola a te Atua, pea kapau e mole feala ke puli te folafola, 36ko ia ae kua fakatapui e te Tamai, o fekaui mai ki te malamanei, e kotou ui kia ia: E ke fasituu ki te Atua! Koteuhi nee au ui: Ko te Alo au o te Atua. 37Kapau e mole au fai te u gaue a taku Tamai, pea aua naa kotou tui mai kia au. 38Kae kapau e au fai natou, tatau foki pe e mole kotou tui mai kia au, ke kotou tui pe ki te u gaue aena, o tupu ke kotou iloi pea ke kotou fakamooni e nofo ia au te Tamai, pea mo au e au nofo i te Tamai.

39I te mea aena, nee natou toe kumi leva ke puke ia; kae nee mavae leva ia mai onatou nima.

Mavae a Sesu mai Selusalemi

40Nee toe alu leva ia Sesu ki te kauvai o te Solotane, i te kogamea ae nee uluaki faipapitema ai ia Soane. Pea nee nofo ai leva ia. 41Nee kaugamalie te hahai ae nee omai leva kia ia, pea nee natou ui: nee mole fai e Soane he milakulo pe e tahi; kae e mooni te u mea fuli nee ina fakaha o uhiga mo te tagata aeni. 42Pea nee tui leva te kaugamalie kia ia i te kogamea aia.

Currently Selected:

EVASELIO A SOANE 10: WB2011

Highlight

Copy

Want to have your highlights saved across all your devices? Sign up or sign in

Les droits sont administrés par Midi Bible, une branche de la Société Biblique de Genève
Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland

Learn More About Ko te Tohi Tapu i te fakauvea