TOHI GAUE A TE KAU APOSITOLO 8
8
Gaohi kovii o te Ekelesia: Saulo
1Nee fakamooni Saulo ki te fakapo o Setefano. Nee i ai leva, i te aho aia, he fakataga lahi ki te Ekelesia o Selusalemi; pea ko te hahai fuli, gata pe ki te kau apositolo, nee natou mavetevete leva i te fenua o Sutea mo Samalia. 2Nee tanu leva e ni tagata lotu lelei ia Setefano, pea nee natou fetagihi lahi leva ki tona mate. 3Kae kia Saulo, nee ina maumaui te Ekelesia; nee ulu ia ki te u fale fuli, nee ina taaki mai ai te tagata mo te fafine, pea nee ina fekau ke laku natou ki te fale pilisoni.
Fakaha e Filipo te logo lelei i Samalia
4Ko natou ae nee fakamavetevete, nee natou olo i te potu fuape, o fakaha te logo lelei o te folafola. 5Ko Filipo, i tana hifo ki te kolo ko Samalia, nee ina fakaha leva i ai te Kilisito. 6Ko te u hahai kaugamalie nee natou fakalogo mo he loto tokaga ki te u mea nee palalau ki ai Filipo, i tanatou logo mo sisio ki te u milakulo nee ina fai. 7Koteuhi ko ni laumalie uli nee natou mavae mai he hahai tokolahi nee avagaia, o kalaga leo lahi, pea ko he hahai tokolahi nee palalisia mo ketu nee fakamauli. 8Pea nee i ai leva he fiafia lahi i te kolo aia.
9Nee i ai he tagata nee higoa ko Simone, nee gaohimea fakatemonio ia i mua atu i te kolo, o tupu ai te punamauli o te hahai o Samalia, pea mo tanatou tuku ko he tagata mauhiga ia. 10Nee natou fakalogo kia ia, te hahai fuape mo he loto tokaga, maia natou liliki kia natou lalahi, o natou ui: Ko ia aeni ko te mafimafi o te Atua, ae e higoa ko te lahi. 11Nee natou fakalogo mo he loto tokaga kia ia, koteuhi kua fualoa tana fakaofoofo natou aki ana gaue fakatalakitupua. 12Kae, i tanatou tui leva kia Filipo, ae nee ina fakaha kia natou te logo lelei o te puleaga o te Atua pea mo te huafa o Sesu-Kilisito, nee natou papitema leva, tagata mo fafine. 13Nee tui leva mo Simone totonu; pea i te osi o tona papitema, nee mole toe mavae leva ia maia Filipo, pea nee sio fakaofoofo leva ia ki te u milakulo mo te u fakailoga lalahi nee kua hoko.
14Ko te kau apositolo, ae nee nonofo i Selusalemi, i tanatou logo kua tali e Samalia te folafola a te Atua, nee natou fekaui leva ki ai ia Petelo mo Soane. 15Ko naua aena, i tana kaku ki Samalia, nee na faikole leva kia natou, o tupu ke natou tali te Laumalie Maonioni. 16Koteuhi nee heeki hifo ia ki he tahi o natou; nee papitema pe natou i te huafa o te Aliki ko Sesu. 17Koia nee hili leva e Petelo mo Soane ona nima kia natou, pea nee natou tali leva te Laumalie Maonioni.
18Ko Simone, i tana sio kua foaki te Laumalie Maonioni aki te hili o te u nima o te u apositolo, nee ina momoli age leva kia naua he paaga, o ui: 19Kolua foaki mai kia au foki te pule aena, koteuhi ke au hili oku nima ki he tahi pe, pea ke ina tali te Laumalie Maonioni. 20Kae nee ui age leva e Petelo kia ia: Ke puli tau paaga mo koe, koteuhi nee ke tui e totogi paaga te meaofa o te Atua! 21E mole pe hou vaega pee ko hou kaukauga ki te mea aia, koteuhi e mole hako tou loto ia mua o te Atua! 22Koia, fakahemala ki tau agakovi, pea ke faikole ki te Aliki ke ina fakamolemole te manatu o tou loto, mo kapau e feala; 23koteuhi e au sio kia koe e ke fonu i he kovi kona, pea e ke pilisonii e te agahala. 24Nee tali age leva e Simone: Kolua hufaki au e kolua totonu ki te Aliki, ke aua naa hoko mai kia au he mea i te u mea kua kolua palalau ki ai.
25I te osi o tana fakamooni ki te folafola a te Aliki, pea mo tana fakaha ia, nee toe liliu leva Petelo mo Soane ki Selusalemi, o fakamafola te Evaselio i ni kolo liliki kaugamalie o te kau Samalia.
Filipo mo te minisi Etiopia
26Nee palalau leva he aselo a te Aliki kia Filipo, o ui: Tuu ki oluga, pea ke alu ki te potu saute, ki te ala e hifo mai Selusalemi ki Kasa, ae e toafa. 27Nee tuu ake leva ia ki oluga, o alu. Pea koeni, ko he tagata Etiopia, ko he enuke, minisi a Kanetase, te fafine hau o Etiopia, nee ko ia ae nee ina taupau ona koloa fuli, pea nee hake ia ki Selusalemi o atolasio i te fale tapu, 28pea ko tana toe liliu mai ai, nee heka ia i tana saliote, pea nee ina lau te tohi a te polofeta ko Esaia. 29Nee ui leva e te Laumalie kia Filipo: Alu o fakaovi ki te saliote aena. 30Nee lele leva Filipo, pea nee logo leva ia ki te tagata Etiopia nee ina lau te tohi a te polofeta ko Esaia. Pea nee ui age leva e Filipo kia ia: Pe e ke mahino ki te mea e ke lau? 31Pea nee tali age leva e te enuke: Pe e feafeai leva taku mahino, mo kapau e mole taki au e he tahi? Pea nee ina fakaafe leva ia Filipo ke hopo ake ki oluga o heka mo ia. 32Ko te koga tohi aeni o te Tohi tapu nee ina lolotoga lau:
Nee taki ia o hage ko he ovi fafine ki te fale tamatei manu;
Pea, o hage ko he akeno gutu mate ia mua o ae e ina kosi ia,
Nee mole pe ina avahi tona gutu.
33 Nee fakamalaloi ia, pea nee fakamaaui ia.
Pea ko tona hakoga, ko ai e palalau anai ki ai?
Koteuhi nee motuhi tona mauli i te kele.
34Pea nee ui age leva e te enuke kia Filipo: E au kole atu kia koe, ko ai ae e palalau ki ai te polofeta? Pe kia ia totonu pee ki he tahi age? 35Pea nee ava ai te gutu o Filipo, o ina kamata mai te koga tohi aia, nee ina fakaha leva kia ia te logo lelei o Sesu.
36I te lolotoga o tona fagona, nee na felavei leva mo he vai. Pea nee ui age leva e te enuke: Koeni he vai, kotea e ina taofi ke papitemai au? 37Pea nee ui age leva e Filipo: Kapau e ke tui i tou loto katoa, e feala te mea aia. Nee tali age leva e te enuke: E au tui ko Sesu Kilisito ko te Alo o te Atua. 38Nee ina fakatotonu leva ke fakatuu te saliote; nee na hihifo toko lua leva ki te vai, ia Filipo mo te enuke, pea nee papitemai leva e Filipo te enuke. 39I tana mavae ake leva mai te vai, nee too leva Filipo e te Laumalie o te Aliki, pea nee mole toe sio leva te enuke kia ia: pea nee ina hoko atu leva tona fagona, i te fiafia. 40Nee kaku leva Filipo ki te kolo o Asoti, pea nee ina fakamafola leva te logo lelei o Sesu i te u kolo fuli nee fakalaka ai, o kaku ki tana kaku ki Sesalea.
Currently Selected:
TOHI GAUE A TE KAU APOSITOLO 8: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
