TOHI GAUE A TE KAU APOSITOLO 7
7
Akonaki a Setefano
1Nee ui age leva e te pule faisakilifisio: Pe e mooni te u mea aeni?
2Nee tali leva e Setefano: Kau tagata, tehina mo tamai, koutou fakalogo mai! Nee ha leva te Atua o te kololia ki tatatou tamai ko Apalahamo, kae kei nofo ia i te fenua o Mesopotamia, i mua o tana nofo i Salani; pea nee ina ui leva kia ia: 3Mavae i tou fenua mo tou famili, pea ke alu ki te fenua e au fakahinohino atu anai kia koe. 4Pea nee mavae leva ia mai te fenua o te kau Kaletea, o nofo i Salani. I te osi o te mate o tana tamai, nee too leva ia e te Atua i ai, o aumai ia ki te fenua aeni e koutou nonofo ai nei. 5Nee mole ina foaki leva kia ia he kele i te fenua aeni, pee ko he kogamea pe ke tuu ai tona vae, kae nee ina fakapapau ke ina foaki te fenua katoa maa ana, pea mo tona hakoga ki amuli, kae nee mole pe hana fanau. 6Kae nee folafola fenei te Atua: E nofo anai tona hakoga i he fenua matapule; e fakapopulai anai ia pea mo gaohi kovii anai ia lolotoga tau e fageau. 7Kae, nee ui leva e te Atua, ko te puleaga ae ka natou popula anai ki ai, ko au ae e au fakamaaui anai ia. I te osi o te mea aia, e natou mavae anai mai ai, pea e natou atolasio anai kia au i te kogamea aeni. 8Pea nee foaki leva e te Atua kia Apalahamo te hai o te silikosisio; pea nee tupu leva Isaake maia Apalahamo, pea nee ina silikosisioi leva ia i tona aho valu; nee tupu leva Sakopo maia Isaake, pea nee ina silikosisioi leva ia; pea nee tupu leva maia Sakopo te kau pateliaka e toko hogofulu ma lua.
9Nee finenonofo leva te kau pateliaka kia Sosefo, pea nee natou fakatau leva ia ke ave ki Esipito. 10Kae nee nofo leva te Atua mo Sosefo, pea nee ina haofaki ia mai ona mamahi fuli; nee ina foaki leva kia Sosefo te poto mo te kalasia ia mua o Falaone, hau o Esipito, ae nee ina fakanofo leva ia ke kovana i Esipito, pea mo tona fale katoa.
11Nee to leva he hoge i te fenua katoa o Esipito pea mo te fenua o Kanaane. Nee lahi aupito te mamahi, pea nee mole kei mau e atatou tamai he meakai. 12Nee logo leva Sakopo nee mau he fulumeto i Esipito, pea nee ina fekau leva ke olo ki ai atatou tamai, i he uluaki faiaga. 13I te tua lua, nee fakaha leva e Sosefo ia ia ki ona tehina, pea nee iloi leva e Falaone te famili nee hau mai ai Sosefo. 14Pea nee fekau leva e Sosefo ke kumi mai tana tamai ko Sakopo, pea mo tona famili katoa, ko te toko fitugofulu ma nima tonatou hahai. 15Nee hifo leva Sakopo ki Esipito, pea nee mate leva ia i ai, o tatau mo atatou tamai. 16Pea nee ave leva natou ki Siseme, o tuku ki te tanuma ae nee totogi paaga e Apalahamo ki te u foha o Amole i Siseme.
17Nee fakaovi mai te temi ae nee tonu ke fakahoko ai te fakapapau nee fai e te Atua kia Apalahamo; pea nee tupu leva o kaugamalie osi te hahai i Esipito, 18o kaku ki te ha leva o he tahi age hau ae nee mole ina iloi Sosefo. 19Ko te hau aia, nee fakakaka leva ki totatou lanu, pea nee ina gaohi kovii leva atatou tamai o kaku ki tana fakamaua natou ke siaki anatou fanau ke aua naa natou mauuli.
20I te temi aia, nee tupu leva Moisese, ae nee matalelei kia mata o te Atua. Nee fafaga leva ia i ni mahina e tolu i te fale o tana tamai; 21pea i tona tuku ke mate, nee too leva ia e te ofafine o Falaone o taupau o hage ko hana tama totonu. 22Nee ako leva Moisese i te poto katoa o te kau Esipito, pea nee malohi ia i ana palalau mo ana gaue.
23I tona tau fagofulu, nee hake leva i tona loto ke ahiahi ia ki ona tehina, te u foha o Iselaele. 24Nee sio leva ia ki he tahi o natou nee gaohi kovii, nee ina haofaki leva ia, nee ina lagavaka leva o uhiga mo ia nee gaohi kovii, pea nee ina tamatei leva te tagata Esipito. 25Nee manatu ia kua mahino anai ona tehina e fakamauli anai natou e te Atua aki tona nima; kae nee mole natou mahino ki ai. 26I te aho ake, nee ha leva ia i lotomalie natou, i te lolotoga o tanatou fuhu, pea nee ina fakatokatoka leva natou ki te tokalelei, o ui: u tagata, ko te u tehina kolua, kotea e kolua fetaaki ai ia koulua? 27Kae ko ae nee ina gaohi kovii tona tehina nee ina tekei ia Moisese mo ui: Ko ai nee ina fakanofo koe ke ke pule mo tui fakamaau kia matou? 28Pe e ke loto ke ke tamatei au o hage ko tau tamatei te tagata Esipito anaafi? 29I te talanoa aia nee hola leva ia Moisese, pea nee alu leva ia o nofo i te fenua o Matiane, ae nee ina mau ai leva ni foha e toko lua.
30I te hili o tau e fagofulu, nee ha leva he aselo kia ia, i te toafa o te mouga o Sinai, i te ulo o he ulu vao ne vela. 31I te sio a Moisese ki te mea aia, nee punamauli leva ia i te ha aia; i tana fakaovi age ke sio lelei ki ai, nee logo mai leva kia ia te leo o te Aliki, o ui: 32Ko te Atua au o au tamai, ko te Atua o Apalahamo, mo Isaake, pea mo Sakopo. Pea nee tete katoa Moisese, pea nee mole feala tana toe sio ki ai. 33Nee ui age leva e te Aliki kia ia: Too ou sulie i ou vae, koteuhi ko te kogamea e ke tuu ai ko he kele maonioni ia. 34Kua au sio ki te mamahi o taku hahai i Esipito, kua au logo ki anatou tagi, pea kua au hifo mai o fakamauli natou. Alu i te lakaga aeni, e au fekaui anai koe ki Esipito.
35Ko te Moisese aeni, ae nee natou fakafisi ki ai, o natou ui: Ko ai nee ina fakanofo koe ko te pule mo te tui fakamaau? Ko ia ae nee fekaui e te Atua ko te pule mo te fakamauli, aki te tokoni a te aselo ae nee ha kia ia i te ulu vao. 36Ko ia ae nee ina fakamavae leva natou mai Esipito, pea nee ina fai ni mea fakaofoofo mo ni milakulo i te fenua o Esipito, mo te fatu o te tai kula, pea mo te toafa, lolotoga tau e fagofulu. 37Ko te Moisese aeni nee palalau leva ki te u foha o Iselaele: E lagai ake anai kia koutou e te Atua i okotou tehina he polofeta o hage ko au. 38Ko ia ae, i te fakatahi i te toafa, nee nofo mo te aselo nee palalau kia ia i te mouga o Sinai pea mo atatou tamai, pea nee ina tali te u folafola mauli ke tuku mai kia koutou. 39Nee mole fia fakalogo atatou tamai kia ia, kae nee natou tekei leva ia, pea nee natou fakamaliu leva onatou loto ki Esipito, 40pea nee natou ui leva kia Alone: Fau kia tatou ni taulaatua ke haele i otatou mua; koteuhi ko te Moisese aeni nee ina fakamavae tatou mai Esipito, e mole tou iloi pe kotea te mea kua hoko kia ia. 41Pea, i te u aho aia, nee natou fau leva he uhii pipi, pea nee natou momoli leva he sakilifisio ki te taulaatua, pea nee natou fakafiafia leva ki te u gaue o onatou nima. 42Koia nee maliu kehe leva te Atua maia natou pea nee ina tuku leva natou ke natou atolasio ki te u fetuu o te lagi, o mulimuli ki te mea e tuu i te tohi a te kau polofeta:
Pe nee kotou momoli mai kia au ni vikitima mo ni sakilifisio
I te lolotoga o tau e fagofulu i te toafa, fale o Iselaele?
43 Nee koutou amo te falela o Moloke
Pea mo te faahi o te taulaatua ko Lemifani,
Ko te u fakatata aena nee kotou fau ke koutou atolasio ki ai!
Koia e au ave anai koutou ke mamao atu i Papilone.
44Nee nonofo atatou tamai i te toafa mo te falela o te fakamooni, o mulimuli ki te fakatotonu a ia ae nee palalau kia Moisese ke fau ia o mulimuli ki te paaki nee sio ia ki ai. 45Pea ko atatou tamai, i tanatou tali te falela, nee natou fakaulu leva ia, i te taki a Sosue, ki te fenua nee natou mau mai te u puleaga ae nee kapu e te Atua i onatou mua, pea nee nofo ai leva ia o kaku mai ki te u aho o Tavite. 46Nee mau leva e Tavite he kalasia ia mua o te Atua, pea nee ina kole leva ke lagai he nofoaga ki te Atua o Sakopo; 47pea ko Salomone ae nee ina fakatuu leva kia ia he fale. 48Kae e mole nofo te Maoluga i he mea nee fai e te nima o te tagata, o hage ko tona fakaha e te polofeta:
49 Ko te lagi ko toku hekaaga fakahau,
Pea ko te kele ko toku hiliaga vae.
Ko te fale fea ae e koutou fau mai anai kia au, e ui e te Aliki,
Pee kofea anai toku maloloaga?
50 Pe e mole ko toku nima ae nee ina fau te u mea fuli aena?…
51Tagata kia fefeka, mo hee silikosisioi i te loto mo te taliga! E koutou fakafehagai tuumau ki te Laumalie Maonioni, ia koutou o hage ko akotou tamai. 52Ko ai i te kau polofeta nee mole gaohi kovii e akotou tamai? Nee natou tamatei natou ae nee natou fakaha fakatomua te haele mai a te tagata agatonu e tahi, ae nee koutou fakatau ia aho nei, pea nee koutou tamatei, 53e koutou ae nee kotou tali te lao mai te kau aselo, kae nee mole koutou fai ia!…
Mate o Setefano
54I tanatou logo ki te u palalau aia, nee natou itaita leva i onatou loto, pea nee natou gugu leva onatou nifo kia ia. 55Kae nee fonu leva Setefano i te Laumalie Maonioni, nee tagaki ake tona fofoga ki te lagi, pea nee sio leva ia ki te kololia o te Atua, pea mo Sesu nee tuu i te faahi matau o te Atua. 56Pea nee ina ui leva: Koeni, e au sio ki te lagi kua ava pea mo te foha o te tagata e tuu i te faahi matau o te Atua. 57Pea nee natou kalaga leva o leo lahi, mo pupunu onatou taliga, o feohofi fakatahi fuli kia ia, 58pea nee natou toho leva ia ki te tua kolo, pea nee natou taumakai leva ia. Nee tuku leva e te kau tagata fakamooni onatou kofu kia vae o he tupulaga nee higoa ko Saulo. 59Pea nee natou taumakai leva Setefano, ae nee faikole, o ui: Aliki Sesu, tali toku laumalie! 60Pea nee tuutuli leva ia, o kalaga leo lahi: Aliki, aua naa ke taofi kia natou te agahala aeni! Pea i te osi o tana u kupu aia, nee moe leva ia.
Currently Selected:
TOHI GAUE A TE KAU APOSITOLO 7: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
