TOHI GAUE A TE KAU APOSITOLO 9
9
Tafoki o Saulo
1Kae ko Saulo nee kei holi aipe ki te fakamatakutaku pea mo te fakapo o te kau tisipulo a te Aliki, nee alu leva ki te fale o te pule faisakilifisio, 2pea nee ina kole leva kia ia ni tohi ki te u sinakoka o Tamaso, koteuhi kapau e ina mau anai ni ihi o te akonaki foou, tagata pee fafine, ke ina seinii natou o aumai ki Selusalemi.
3Nee fagona ia i te ala, pea nee fakaovi ia ki Tamaso, nee fokifa pe kua takatakai ia e he malama gigila nee hau mai te lagi. 4Nee to leva ia ki te kele, pea nee logo leva ia ki he leo nee ui age kia ia: Saulo, Saulo, kotea e ke fakatagai ai au? 5Pea nee ina tali leva: Ko ai ia koe, Aliki? Pea nee ui age leva e te Aliki: Ko au Sesu ae e ke fakatagai. E faigataa anai kia koe tau fakatau ki te u ukamea hukihuki. 6Nee tete katoa leva ia mo fonu i te manavahe, nee ina ui leva: Aliki, kotea e ke loto ke au fai? Pea nee ui age leva e te Aliki kia ia: Tuu ki oluga, ulu ki te kolo, pea e fakaha atu anai kia koe te mea e tonu ke ke fai. 7Ko te u tagata ae nee kaugafagona mo ia nee tutuu leva i tonatou punamauli; nee natou logo ki te leo kae nee mole natou sisio ki he tahi. 8Nee tuu ake leva Saulo mai te kele, pea nee logo ai te ava o ona mata, kae nee mole kei sio ia ki he mea; pea nee natou too leva ia i tona nima, pea nee natou taki leva ia ki Tamaso. 9Nee nofo leva ia i aho e tolu nee mole sio, pea nee mole kai, pea nee mole inu.
10Kae, nee i ai he tisipulo i Tamaso nee higoa ko Ananiasi. Nee ui leva e te Aliki kia ia i he sio: Ananiasi! Nee ina tali age leva: Koeni au, Aliki! 11Pea nee ui age leva e te Aliki kia ia: Tuu ki oluga, pea ke alu i te ala e higoa ko te ala hako, pea ke kumi, i te fale o Suta, he tagata e higoa ko Saulo mai Talese. 12Koteuhi e lolotoga faikole na ia, pea nee sio ia i he sio ki he tagata e higoa ko Ananiasi nee ulu ake kia ia, pea nee ina hili ona nima kia ia, uhi ke toe sio ona mata. Pea nee tali age leva e Ananiasi: 13Aliki, nee au logo mai he tokolahi ki te u mea kovi fuli nee fai e te tagata aia ki tau kau sagato i Selusalemi; 14pea kua ina mau ni fakagafua mai te kau pule faisakilifisio, ke ina seinii i heni ia natou fuli e faikole i tou huafa. 15Kae nee ui age leva e te Aliki kia ia: Alu, koteuhi ko te tagata aia ko he mea gaue nee au filifili, ke ina ave toku huafa kia mua o te u puleaga, mo mua o te u hau, pea mo mua o te u foha o Iselaele; 16pea e au fakaha anai kia ia te u mea fuli e tonu ke mamahi ai o uhiga mo toku huafa.
Fonu o Saulo i te Laumalie Maonioni
17Nee mavae leva Ananiasi o alu; pea i tana kaku leva ki te fale, nee ina hili leva ona nima kia Saulo, o ui: Saulo, toku tehina, ko te Aliki Sesu, ae nee ha kia koe i te ala nee ke fagona ai, nee ina fekaui mai au koteuhi ke ke toe sio pea mo ke fonu i te Laumalie Maonioni.
Papitema o Saulo
18I te lakaga pe aia, nee maluku ifo leva mai ona mata ni mea o hage ni uno, pea nee toe sio leva ia. Nee tuu leva ia ki oluga, pea nee papitemai leva ia.
Kamata akonaki a Saulo i Tamaso
19Pea, i te osi o tana kai, nee ina toe mau leva tona malohi. Nee nofo leva Saulo mo te kau tisipulo i Tamaso i ni ihi aho. 20Pea nee ina kamata aipe te fakaha i te u sinakoka ko Sesu ko te Alo o te Atua. 21Ko natou fuli nee logo kia ia nee natou punamauli osi, pea nee natou ui: Pe e mole ko ia ae nee ina fakatagai i Selusalemi ia natou nee faikole i te higoa aia, pe nee mole hau ia ki heni ke ina seinii natou mo ave natou kia mua o te kau pule faisakilifisio? 22Kae nee asili tuputupua te malohi o Saulo, pea nee ina mapunui te u gutu o te kau Sutea nee nonofo i Tamaso, i tana fakamooni i te tohi tapu ko Sesu ko te Kilisito.
Hola o Paulo i Tamaso
23Nee hili ki ai he temi fualoa, nee fono leva te kau Sutea ke natou tamatei ia, 24pea nee iloi leva e Saulo tanatou fakatuutuu kovi. Nee leo te u matapa o te kolo i te aho mo te pouli, ke natou tamatei ia. 25Kae, i he pouli, nee too leva ia e te kau tisipulo, pea nee natou fakahifo leva ia i he kato i te kaupa o te kolo.
Alu a Saulo ki Selusalemi
26I tana kaku leva ki Selusalemi, nee faiga leva ia Saulo ke fakatahi mo te kau tisipulo; kae nee natou mataku fuli kia ia, koteuhi nee mole natou tui kua liliu ia ko he tisipulo. 27Kae nee too leva ia e Palenapa o taki ki te kau apositolo, pea nee ina fakamatala leva kia natou te sio a Saulo i te ala ki te Aliki, ae nee palalau kia ia, pea mo tana fakaha mooni te higoa o Sesu i Tamaso. 28Nee fealuaki ia mo natou i Selusalemi, pea nee palalau ia i te malohi katoa i te huafa o te Aliki. 29Nee palalau foki ia ki te kau Helenise o fihi mo natou; kae ko natou aeni nee natou kumi ke natou tamatei ia.
Toe liliu a Paulo ki Talese
30I te iloi leva e te u tehina te mea aia, nee natou ave leva ia ki Sesalea, pea nee natou fekau ia ke alu ki Talese. 31Nee mauli te Ekelesia i te tokalelei i Sutea katoa, mo Kalilea, mo Samalia, nee faufau ia mo haele i te mataku ki te Aliki, pea nee tuputupua ia i te gaue a te Laumalie Maonioni.
Milakulo a Petelo: Fakamauli o Eneo
32Pea koeni, i te ahiahi a Petelo ki te kau sagato fuli, nee hifo leva ia kia natou nee nonofo i Lita. 33Nee ina mau leva i ai he tagata nee higoa ko Eneo, kua tau valu tana moemoe i he palepale, koteuhi nee palalisia ia. 34Nee ui age leva e Petelo kia ia: Eneo, e fakamauli koe e Sesu-Kilisito; tuu ki oluga, o fakatoka tou palepale. Pea nee tuu aipe ia ia ki oluga. 35Nee sisio leva kia ia te hahai fuli o Lita mo Salona, pea nee natou tafoki leva ki te Aliki.
Fakamauli o Tolokasi i te mate
36Nee nofo i Sope, i te kau tisipulo, he fafine nee higoa ko Tapita, ko tona uhiga i te fakakeleka ko Tolokasi: nee lahi te u gaue lelei mo te u meaofa nee fai e te fafine aia. 37Pea nee mahaki leva ia i te u aho aena, pea nee mate ai. I te osi o tona fakamaa, nee tuku leva ia ki he kogafale i te laufata. 38Kae nee ovi Lita ki Sope, pea i te iloi leva e te kau tisipulo kua nofo Petelo i ai, nee natou fekaui leva ni tagata e toko lua kia ia, o na kole kia ia ke hau vave mua ia kia natou. 39Pea nee tuu ake leva Petelo o alu mo naua. I tana kaku atu ki ai, nee taki leva ia ki te kogafale o te laufata. Nee takatakai leva ia e te u finetaka fuli, o fai fetagihi mo fakaha age kia Petelo te u kofu mo te u pulupulu nee fai e Tolokasi i tana kei nofo mo natou. 40Pea nee fakamavae leva e Petelo te hahai katoa ki fafo, pea nee tuutuli leva ia o faikole; nee maliu leva ia ki te mate, pea nee ina ui age: Tapita, tuu ki oluga! Nee ina avahi leva ona mata, pea i tana sio kia Petelo, nee mafuta ake leva ia o lala. 41Pea nee kapa age leva e Petelo tona nima kia ia, o fakatuu ake ia ki oluga. Nee ina paui age leva te kau sagato mo te kau finetaka, pea nee ina fakaha age kia natou ia Tapita kua mauli. 42Nee iloi leva te mea aena i Sope katoa, pea nee tokolahi natou nee tui leva ki te Aliki. 43Nee nofo leva Petelo i he kii temi i Sope, i te fale o he tagata faikiliimanu nee higoa ko Simone.
Currently Selected:
TOHI GAUE A TE KAU APOSITOLO 9: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
