Sofoni 1
1
Fakamaau o Suta kua vave ai
1Na fakasa loa le folafola a le Eteleno kia Sofoni, vosa o Kusi, vosa o Ketalia, vosa o Amalia, vosa o Esekiasi, i le temi o Sosiasi, vosa o Amone, sau o Suta.
2E kau maumaui loa a nea fuli i aluga o le malama nei,
E pati le Eteleno.
3E kau maumaui loa tagata mo manu,
A manu lele o le lagi mo ika o le tai,
A nea fakatupu siga mo le kau agaveli mo latou ;
E kau tuuti loa a tagata i aluga o le malama nei,
E pati le Eteleno.
4E kau falo loa loku lima kia Suta,
Ti mo le kakai fuli o Selusalemi ;
E kau tuuti loa i le ganea leinei a toega o Paale,
Mo le igoa o ana minisi ti mo ana pelepitelo mo latou,
5Mo latou ala e punou i aluga o ato o fale i mua o le solia o le lagi,
Mo latou ala e punou o fakapapau i le suafa o le Eteleno,
Ti mo toe fakapapau foki i le igoa o lolatou sau ko Malekame,
6Mo latou ala na maliu kese i le Eteleno,
Ti mo latou ala e leaise afa ia le Eteleno,
Latou ala e leaise afa ia lona finegalo.
Le aso o le Eteleno
7Fakalologo i mua o le Aliki, le Eteleno !
Talie kua ofi le aso o le Eteleno,
Talie kua teuteu e le Eteleno le sakilifisio, ti kua filifili e ia ana kau fakaafe.
8I le aso o le sakilifisio a le Eteleno,
E kau tautea loa a aliki mo vosa o le sau,
Ti mo latou fuli ala e kofu ki ni kofu matapule.
9I le aso lena, e kau tautea loa latou fuli ala e sopo i le mua matapa ofaipe ni pagani,
Latou ala e fakaapele ia le fale o lolatou pule ki le agamakeke mo le kaka.
10I le aso lena, e pati le Eteleno,
E i ai loa ni tagi i le matapa o ika,
Mo ni tagi laulau i le kolo foou,
Ti mo se maumau lasi i mauga liliki.
11Kotou fetagisi, kakai o Maketesi !
Talie kua maumau latou fuli ala e fai koloa,
Ti kua mamate tagata fuli ala na tanaki paaga.
12I le aso lena, e kau ina loa Selusalemi ki ni malama,
Ti e kau tautea loa a tagata ala e malolo fakafimalie ofaipe le takele o le vino i le fa poe,
Ti e pati i olatou loto : E leaise fai e le Eteleno se malie pe ko se veli.
13E kaia loa olatou koloa,
Ti e maumaui loa olatou fale.
E lotou pakia loa i le fakatuu o ni fale kae e leaise lotou nonofo loa i ai.
E lotou pakia loa i le to o ni vite kae e leaise lotou inu loa ki lona vino.
14Kua ofi le aso lasi o le Eteleno,
Kua ofi mai a ia, ti e au fakatavili a ia. E fakasa e le aso o le Eteleno lona leo,
Ti e fai e le tagata toa ni tagi mamae.
15Ko le aso lena ko se aso o le sausau,
Ko se aso o le mamae mo le tuania,
Ko se aso o le maveuveu mo le maumau,
Ko se aso o le fakapouli mo le pouli,
Ko se aso o ao mo kokofu,
16Ko se aso e tagi ai loa le fakatagi pupusi mo ni kalaga tau
Ki kolo tau mo tule taualuga.
17E kau tuku loa a tagata ki le mamae,
Ti e lotou saele loa ofaipe ni kivi,
Talie na lotou agasala ki le Eteleno ;
E kau liligi loa lolatou toto ofaipe le efu,
Ti mo lolatou kanofi ofaipe ni penu.
18E leaise mafai loa ke saofaki latou e lalatou paaga mo lalatou aulo,
I le aso o le sausau o le Eteleno ;
E tutu loa le fenua katoa e le afi o lona finenonofo ;
Talie e maumaui fakapunamauli loa e ia a kakai fuli o le fenua.
Currently Selected:
Sofoni 1: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
