Apakuki 3
3
Katiko a Apakuki
1Ko le kole a le polofeta ko Apakuki, leia na fatu ofaipe se lau mate.
2Eteleno, na kau logo ki le nea leia na ke fakasa, ti kua kau apele i le i.
Ei Eteleno, fakasoko lau gaoiaga i lolotoga o fetuu ka soko mai !
Io, fakasa a ia i fetuu ka soko mai ! Kae i lou sausau, manatui ou aloalofa !
3E au le Atua mei Temane,
E au le Sagato mei le mauga o Palani… Manava.
E fakaapele e lona agai le atu lagi,
Ti e fakaapele e lona kololia le kele.
4Se faipe le gigila o le malama ;
E mavae ni kave gigila i lona lima,
I lena e nofo ai lona makeke.
5I ona mua e saele ai le taumasaki,
Ti e muli iate ia le taumasaki.
6E tuu a ia, ti e fuafua e ia le malama nei ki lona mata ;
E tio a ia, ti e fakalulu e ia a atu puleaga.
E mavasivasi a mauga lalasi afea,
E sosolo a mauga liliki afea,
E mavaavaa a ala afea i ona mua.
7E kau tio kua nonofo i le mamae a falela o Etiopia,
Ti kua nonofo i le i a falela o le fenua o Matiane.
8Pe ita le Eteleno ki vaitafe ?
Pe mu lou ita ki vaitafe ?
Pe ko le tai leia e ke liligi ki ai lou sausau
Ke ke eke ai ki au osi,
Ti mo lau saliote o le malo ?
9Kua telefua lau kalolo,
Ko malaia ko gasau o au folafola… - Manava.
E ke fakapaipaisi le kele ke sali a vaitafe.
10E lulu a mauga i lalatou tio kiate koe,
E fakalofia e ua makeke le kele,
E gugulu le moana loloto,
E lagai e ia ona galu o kaku ki le lagi.
11I le malama o au gasau ala e lele,
I mua o le tapa gigila o lau tao,
E tutuu le laa mo le masina i ola nofoaga.
12E ke foli le kele i lou itaita,
E ke takatakafi a atu puleaga i lou sausau.
13E ke ulu o saofaki lou kakai,
O saofaki lou filifiliia.
E ke fatii le taufufu o le fale o le tagata agaveli,
E ke maumaui oki lona fale katoa… - Manava.
14E ke soka ki au gasau le ulu o ana pule,
Ala e feoso mai kiate au ofaipe se afa, ke fakamavetevete au,
O taukalaga fakafiafia
O sakinake kua lotou tafi le tagata fakaaloalofa i lolatou mumuniaga.
15E ke takatakafi le tai ki au osi, mo le pela o atu vai lalasi.
16Na kau logo… Ti na aloalofa oku tootooga.
I le leo lena, e tete oku laugutu,
E okioki oku ivi,
Ti e lulu oku tuli :
E tonu ke kau talitali fakalologo ki le aso o le mamae,
Le aso leia e saele ai loa le tagata fakaveliveli ki le kakai.
17Talie e leaise se loa le fiki,
E leaise tuku loa e le vite se nea,
E puli loa le fua o le oliveto,
E leaise tuku loa e faisaga se nea kai ;
E pupuli loa a ovi i fagaiaga mutie,
Ti e leaise toe maua loa ni pipi i fale manu.
18Kae, e kau loto ke kau fakafiafia i le Eteleno,
E kau loto ke kau fakafiafia i le Atua o loku fakamauli.
19Ko le Eteleno, le Aliki, ko loku makekeaga ;
E fakaliliu e ia oku vae ofaipe la o tia fafine, ti
E fakasaele e ia au i oku potu taualuga.
Ki le pule o kau sua. Ki ni nea faimusika va.
Currently Selected:
Apakuki 3: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
