Sofoni 2
2
Kalaga ki le fakasemala
1Kotou ulu kia koutou totonu, kotou fakakaukau mua,
Puleaga sala luma,
2I mua o le fakasoko o le fakatotonu,
Ti mo le fakalaka o le aso aia ofaipe le penui fulumeto,
I mua o le vilo o le sausau kaka o le Eteleno kia koutou,
I mua o le vilo o le aso o le sausau o le Eteleno kia koutou !
3Kotou afa le Eteleno, koutou fuli, kau agamalu o le fenua,
Ala e fai ia ana fakatotonu !
Kotou afa le faitotonu, kotou afa le fakataulalo !
Lagi e fakamauli loa koutou i le aso o le sausau o le Eteleno.
Fakamaau o atu puleaga
4Talie e tiaki loa a Kasa,
E liliu loa Asekaloni o toafa,
E kapu loa Asetoti i le lalatea,
E taaki loa Ekeloni.
5Malaia ki kakai o mata tai, ki le puleaga o le kau Keleti !
Na masau le Eteleno kiate koe, Kanaane, fenua o le kau Filisitini !
E kau maumaui loa a koe, e leaise ke toe maua ia loa sou kakai.
6E liliu loa a mata tai ko ni fagaiaga manu, ko ni nofoaga ki le kau tausi manu,
Ti ko ni lotoa ki kau manu.
7Talie e tuku loa a mata tai ana ki toetoega o le fale o Suta ;
Ko le ganea lena e lotou fagai ai loa alatou kau manu ;
E lotou malolo loa i le afiafi i fale o Asekaloni ;
Talie e leaise galoi loa latou e le Eteleno, lolatou Atua,
Ti e toe aumai loa e ia lolatou kau popula.
8Na kau logo ki lauveli a Moape
Ti mo nukinuki a fanau a Amone,
Ala na lauveli ki loku kakai,
Ti na fai ia ni fakatutuu fia nealasi ki ona koiga.
9Koia e pati ai le Eteleno o kau tau, le Atua o Iselaele : E kau mauli !
E fai loa Moape pe Sotoma, ti mo fanau a Amone pe Komola,
Ko se ganea apele i vao talatala, ko se lameni patai, ko se toafa ki lee gato ;
E maumaui loa a ia e le toega o loku kakai,
E maua loa latou e le toega o loku puleaga.
10E soko loa le nea lena kia latou o tupu ko lolatou fia nealasi,
Talie na lotou pativeli mo nukinuki i le matasoka
Ki le kakai o le Eteleno o kau tau.
11E mamafa loa le Eteleno kia latou,
Talie e tuuti loa e ia a atua fuli o le malama nei ;
Ti e atolasio loa kiate ia le tagata taki toka tasi i lona fenua,
I motu fuli o atu puleaga.
12Ko koutou foki, kau Etiopia,
E taai loa koutou e laku seleta.
13E falo loa e ia lona lima ki le potu noleto,
E maumaui loa e ia Asilia,
Ti e fakaliliu loa e ia Ninive ko se kele lavaki,
Ko se kele malo ofaipe le toafa.
14E momoe loa ni kau manu i loto malie o Ninive,
Mo ni manu i faasiga kesekese ;
Ko le palikano mo le eliso
E nonofo fakatasi loa i puloga o ona pou ;
E tagi loa a manu lele i katupa o ona fale ;
E kamata loa le maumau i le mua matapa,
Talie e tata loa a papa sete o aofi.
15Ko lena le ikuaga o le kolo fiafia lena,
Leia na tonatona fakafulufulumalie,
Ti na pati i lona loto :
Ko au, ti ko au fai !
Kolea kua soko, kua maumau a ia,
Kua liliu a ia ko se nofoaga o manu !
Ko latou fuli ala e fakalaka loa i ona tafa
E mapu loa mo pasipasi loa olatou lima.
Currently Selected:
Sofoni 2: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
