Sakalia 1

Kalaga ki le fakasemala

1I le masina valu o le fetuu lua o Taliusi, na tuku loa le folafola a le Eteleno ki le polofeta ko Sakalia, vosa o Pelekia, vosa o Ito, o pati :

2Na sausaua le Eteleno ki okoutou tamana. 3Koia fakasa ai kia latou : E folafola le Eteleno o kau tau, o pati : Kotou toe liliu mai kiate au ; ti e kau toe liliu mai loa kia koutou, e folafola le Eteleno o kau tau. 4Aua na kotou faipe okoutou tamana, ala na masau ki ai le kau polofeta i mua, o pati : E folafola le Eteleno o kau tau : Kotou maliu mei okoutou ala veveli, ti mo akoutou gaoi veveli ! Kae na leaise lotou fakalogo, ti na leaise lotou tokaga fua kiate au, e folafola le Eteleno. 5Ko okoutou tamana, kofea latou ? Ti ko le kau polofeta, pe mafai ke lotou mauli o lee gato ? 6Pe na leaise lave ki okoutou tamana aku folafola mo aku fakatotonu ala na kau tuku ki aku tagata fakasausau ko le kau polofeta ? Na lotou maliu mai, ti na lotou pati : Kua fai e le Eteleno o kau tau kia tatou o mulimuli ki le nea leia na fakapapau e ia ke fai kia tatou o mulimuli ki otou ala mo atatou gaoi.

Tio o osi

7I le aso kau lua tupu fa o le masina kau agafulu tupu tasi, le masina o Sepate, i le fetuu lua o Taliusi, na tuku loa le folafola a le Eteleno kia Sakalia, vosa o Pelekia, vosa o Ito, le polofeta, o pati : 8Na kau tio i le pouli, ti ko leinei, na eke se tagata i se osi kula, ti na tuu a ia i loto malie o ni mila i se ganea malumalu ; na tutuu i ona muli ni osi kula, mo ni osi uli, ti mo ni osi tea. 9Na kau pati : Ko ai ma a osi anei, ei loku aliki ? Ti na pati loa le aselo leia na masau mai kiate au : E kau fakatio loa a koe ki le mauiga o osi anei. 10Ko le tagata leia na tuu i loto malie o mila na masau loa, o pati : Ko latou ala na kakau mai e le Eteleno ke foli i le malama nei. 11Ti na lotou masau loa ki le aselo o le Eteleno, leia na tuu i loto malie o mila, ti na lotou pati loa : Kua motou foli i le malama nei katoa, ti ko leinei, e malolo mo tokamalie le malama nei katoa.

Fakapapau ki Selusalemi

12Ti na folafola loa le aselo o le Eteleno, o pati : Eteleno o kau tau, e kaku loa kiafea lau nofo e leaise ke alofa ki Selusalemi mo kolo o Suta, ala na ke sausaua ki ai talu mei fetuu e kau fitu ? 13Na tali loa le Eteleno ki le aselo leia na masau mai kiate au ki ni kupu malilie ti mo ni kupu fakafimalie. 14Ti na pati mai loa kiate au le aselo leia na masau mai kiate au : Kalaga, o pati : E folafola le Eteleno o kau tau, o pati : Kua kau finenonofo lasi o tupu ko Selusalemi mo Sione, 15Ti kua kau mamae lasi ki puleaga fia nealasi ; talie na ikiiki fai loku mamae i mua, kae kua lotou fakalasi a ia. 16Koia kua folafola ai le Eteleno, o pati : Kua kau toe liliu mai i loku alofa ki Selusalemi ; e toe fakatuu loa loku fale i ai, ti e toe toso loa le fua i Selusalemi. 17Ke ke toe kalaga, o pati : Ko leinei le folafola a le Eteleno o kau tau : E toe maua loa e oku kolo olatou koloa o lasi ai ; e toe fakafimalie loa e le Eteleno a Sione, ti e toe filifili loa e ia Selusalemi.

Tio o tala e fa mo tagata fai ukamea e toka fa

18Na tagaki loa oku mata, ti na kau tio, ti ko leinei, na i ai ni tala e fa. 19Na kau pati loa ki le aselo leia na masau mai kiate au : Kolea le uiga o tala anei ? Ti na pati mai loa a ia kiate au : Ko tala ana ala na fakamavete ia a Suta, mo Iselaele, ti mo Selusalemi.

20Na toe fakatio loa au e le Eteleno ki ni tagata fai ukamea e toka fa. 21Na kau pati loa : Kolea le nea leia e lotou au o fai ? Ti na pati loa a ia : Ko tala ana ala na fakamavete ia a Suta, ti ko tagata fai ukamea ana ala na au o fakaii kia latou, ti mo maumaui a tala o atu puleaga, ala na laga ia olatou tala ki le fenua o Suta, ke veteki ai lona kakai.

Currently Selected:

Sakalia 1: FB2000

Highlight

Copy