Akeseo 2
2
Le kololia o le fale tapu i le temi ka au
1I le aso kau lua tupu tasi o le masina fitu, na fakasa loa le folafola a le Eteleno ia Akeseo, le polofeta, o pati :
2Masau kia Solopapele, vosa o Saletiele, ko le kovana o Suta, mo Sosue, vosa o Sotesatake, le tagata faisakilifisio lasi, ti mo le toega o le kakai, o pati kia latou :
3Pe i ai se tasi ia koutou ala koi mauli
Na tio ki le fale leinei i lona kololia uluaki ?
Ti kolea le nea kua kotou tio ki ai i le aso nei ?
I lana tuu leinei, pe leaise fai a ia kia koutou pe se nea noa ?
4I temi nei ke ke lotomakeke, Solopapele ! e folafola le Eteleno.
Ke ke lotomakeke, Sosue, vosa o Sotesatake, pule faisakilifisio !
Ke ke lotomakeke, kakai katoa o le fenua ! e pati le Eteleno.
Ti ke kotou gaoi !
Talie e kau nofo mo koutou.
5E kau agatonu ki le sai leia na kau fai mo koutou
I le aso leia na kotou mavae ai i Esipito,
Ti e nofo loku Laumalie i loto malie o koutou ;
Aua na kotou i !
6Talie e folafola le Eteleno o kau tau : Koi toe fua se ga temi ikiiki,
Ti e kau luui loa le atu lagi mo le malama nei,
Le tai mo le kele malo.
7E kau luui loa a atu puleaga fuli ;
E aumai loa a koloa o atu puleaga fuli, ti e kau fakaapele loa ki le kololia le fale leinei,
E pati le Eteleno.
8A aku le paaga, ti a aku le aulo,
E pati le Eteleno o kau tau.
9E lasi ake loa le kololia o le fale fakamuli leinei
I le kololia o le uluaki fale,
E pati le Eteleno o kau tau ;
Ti ko le ganea leinei e kau tuku ai loa le tokamalie,
E pati le Eteleno o kau tau.
E tonu ke fakamea le kakai
10I le aso kau lua tupu fa o le masina iva, i le lua o fetuu o Taliusi, na fakasa loa le folafola a le Eteleno ia Akeseo, le polofeta, o pati : 11E folafola le Eteleno o kau tau : Fai ki le kau faisakilifisio le vesili leinei o uiga mo le lao : 12Kapau e ave loa e se tasi i le tapatapa o lona kofu se ga inati kua fakatapui, ti e lave loa lona kofu ki se pane, mo ni nea kai, mo se vino, mo se lolo, pe ko se tasi ake nea kai, pe liliu loa a nea ana o maokioki ? Ti na tali loa le kau faisakilifisio : Leai ! 13Ti na pati loa Akeseo : Kapau kua kelekele loa se tagata o tupu ko se mate, ti e fafa loa a ia ki nea fuli ana, pe kelekele loa a nea kai ana ? Ti na tali loa le kau faisakilifisio : E io, e lotou kelekele loa.
14Ti na toe masau loa Akeseo, o pati :
Ko le anoaga a ia o le kakai leinei, ko le anoaga a ia o le puleaga leinei i oku mua, e pati le Eteleno,
Ko le anoaga a ia o gaoi fuli o olatou lima ;
Ko le nea leia e lotou momoli mai kiate au e kelekele.
15Koia ke kotou fakakaukau malie
Ki le nea leia kua soko o kaku mai ki le aso nei,
I mua o le teki o fatu o le fale o le Eteleno !
16I le temi a ia, ka ano se tasi ki se tuuga fulumeto ke asu mai ni fua e kau lua,
Na maua fai e ia ni fua e kau agafulu ;
Ka ano se tasi ki le poe vino ke asu mai ni fua vino e kau lima,
Na maua fai e ia ni fua e kau lua.
17Na kau tautea koutou ki le kelemea,
Mo le manua, ti mo le ua fatu aisi ;
Na kau maumaui a gaoiaga fuli o okoutou lima.
Kae logo ai a nea ana, na leaise kotou toe liliu mai kiate au, e pati le Eteleno.
18Kotou fakakaukau malie
Ki le nea leia kua soko o kaku mai ki le aso nei,
O kaku mai ki le aso kau lua tupu fa o le masina iva,
Talu mei le aso leia na fakavae ai le fale o le Eteleno,
Kotou fakakaukau malie ki ai !
19Pe na koi i ai se pulapula i okoutou fata ?
Tatau foki mo le vite, mo le fiki, mo le kelenati, ti mo le oliveto,
Na leaise tuku ia se nea fua e tasi.
Kae i le aso nei e kau liligi loa laku tapuakina.
Filifili o Solopapele
20Na fakasa loa le folafola a le Eteleno ia Akeseo, ko lona tua lua a ia, i le aso kau lua tupu fa o le masina, i kupu anei :
21Masau kia Solopapele, kovana o Suta, o pati :
E kau luui loa le atu lagi mo le kele ;
22E kau maumaui loa le ekeekeaga fakasau o atu puleaga,
E kau maumaui loa le makeke o atu puleaga,
E kau maumaui loa a saliote tau mo latou ala e eke ai ;
E tamate loa a osi mo tagata eke osi,
Leia e le seleta a le leia ake.
23I le aso lena, e pati le Eteleno o kau tau,
E kau too loa a koe, Solopapele, vosa o Saletiele,
Laku tagata fakasausau, e pati le Eteleno,
Ti e kau taupau loa a koe ofaipe se fakamailoga ;
Talie na kau filifili a koe, e pati le Eteleno o kau tau.
Currently Selected:
Akeseo 2: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
