Akeseo 1
1
Fakamakeke o le kakai ke toe laga le fale tapu
1I le lua fetuu o le sau ko Taliusi, i le uluaki aso o le masina ono, na tuku loa le folafola a le Eteleno ki le polofeta ko Akeseo, mo Solopapele, vosa o Saletiele, kovana o Suta, kia Sosue, vosa o Sotesatake, tagata faisakilifisio lasi, i kupu anei : 2E folafola le Eteleno o kau tau : E pati le kakai leinei : E leikiaise soko mai le temi, le temi ke toe laga ai le fale o le Eteleno.
3Koia na tuku ai le folafola a le Eteleno kia latou ia Akeseo, le polofeta, i kupu anei :
4Pe ko le temi leinei ke kotou nonofo ai i okoutou fale aofi papa,
Kae kua maumau le fale leinei ?
5Koia e folafola ai i le aso nei le Eteleno o kau tau, o pati :
Kotou fakakaukau ki okoutou ala !
6Kua lasi lakoutou muluki, kae kotou utu ikiiki,
E kotou kai, kae e leaise kotou makokona,
E kotou inu, kae e leaise kotou mau,
E kotou kofu, kae e leaise kotou mafana,
Ko le totogi o leia e gaoi paaga,
E vilo ki se taga pu.
7Koia e folafola ai le Eteleno o kau tau :
Kotou fakakaukau malie ki okoutou ala !
8Kotou pale ki le mauga, kotou aumai ni laakau,
Ti kotou laga le fale :
E kau maua loa i ai loku fiafia, ti e kau kololia ai loa,
E folafola le Eteleno.
9Na kotou amanaki ki se nea lasi,
Kae ko leinei e kotou maua se ganea ikiiki fua ;
Na kotou fakaulu a ia ki okoutou fale, kae na kau pusii a ia.
Kolea lona tupuaga ? e pati le Eteleno o kau tau.
O tupu ko loku fale, leia kua maumau,
Kae kua kotou feoso le tagata ki lona fale.
10Koia kua fakafiti ai e le lagi lona sasau kia koutou,
Ti kua taofi ai e le kele ona fua.
11Na kau kakau mai le taulaa ki le fenua, mo mauga,
Mo le fulumeto, mo le vino, mo le lolo,
Mo nea fuli ala e feala ke maua mei le kele,
Mo tagata mo manu,
Ti mo gaoiaga fuli o lima.
12Ko Solopapele, vosa o Saletiele, mo Sosue vosa o Sotesatake, le tagata faisakilifisio lasi, ti mo le toega fuli o le kakai, na logo loa ki le leo o le Eteleno, lolatou Atua, ti mo folafola a Akeseo, le polofeta, o mulimuli ki le kauga leia kua tuku kiate ia e le Eteleno, lolatou Atua. Ti na maua loa e le kakai se i ki le Eteleno. 13Na pati loa Akeseo, le tagata fakasausau a le Eteleno, ki le kakai, o mulimuli ki le fakatotonu a le Eteleno : e pati le Eteleno : E kau nofo mo koutou.
14Na fafagu loa e le Eteleno le laumalie o Solopapele, vosa o Saletiele, kovana o Suta, ti mo le laumalie o Sosue, vosa o Sotesatake, le tagata faisakilifisio lasi, ti mo le laumalie o le toega katoa o le kakai. Na lotou au loa, ti na lotou kamata loa le gaoi i le fale o le Eteleno o kau tau, lolatou Atua, 15i le aso kau lua tupu fa o le masina ono, i le lua o fetuu o le sau ko Taliusi
Currently Selected:
Akeseo 1: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
