Mateo 9

Fakamauli o se tagata palalisia

1Na sopo loa Sesu ki se vaka, ti na fakalaka loa a ia i le tai, o ano ki lona kolo. 2Ti ko leinei, na aumai loa kiate ia se tagata palalisia leia na moe i se palepale. I lana tio ki lalatou tui, na pati loa Sesu ki le tagata palalisia : Ke ke loto makeke, ei laku fanau, kua fakamolemole au agasala. 3Ti na pati loa ni iki sekelipa i olatou loto : E masau fia atua le tagata leinei. 4Ti na pati loa Sesu, i lana iloa alatou manatu loto : Kolea e kotou maua ai ni manatu veveli i okoutou loto ? 5Talie kolea e faigaofie ake, i le pati : Kua fakamolemole au agasala, mo le pati : Tuu ki aluga, o saele ? 6Kae o tupu ke kotou iloa e nofo le Vosa o le tagata i le malama nei mo le pule ki le fakamolemole o agasala, na pati loa a ia ki le tagata palalisia : Tuu ki aluga, o too lou palepale, ti ke ano ki lou kaiga. 7Ti na tuu ake loa a ia ki aluga, o ano ki lona kaiga. 8I le tio a le kakai ki le nea lena, na lotou ofolele ai, ti na lotou fakakololia loa ki le Atua, leia kua soli ia ki tagata se pule fenaaki.

Kalagai o Mateo

9I lana ano ki se tasi ake ganea, na tio loa Sesu ki se tagata leia na ekeeke i le pilo o tukusau, ti na igoa a ia ko Mateo. Na pati loa Sesu kiate ia : Muli mai iate au ! Na tuu ake loa le tagata lena ki aluga, ti na muli loa a ia iate ia.

10Na eke loa Sesu i le laupapa kai i le loto fale, ti ko leinei, na au loa se kau popelikano toka api ti mo ni kakai mauli veli, o kai fakatasi mo ia ti mo ana tisipulo i le laupapa kai. 11Na tio loa le kau faliseo ki le nea lena, ti na lotou pati loa ki ana tisipulo : Kolea e kai ai lokoutou pule mo le kau popelikano ti mo le kau agasala ? 12I le logo a Sesu kia latou, na pati loa a ia kia latou : E leaise ko latou ala e saosaoa e aoga ki ai le toketa, kae ko le kau masaki. 13Kotou ano, ti kotou ako le uiga o le nea leinei : E maua loku fiafia i le manavaalofa, kae leai i ni sakilifisio. Talie na leaise kau au o kalagai ni tagata agatonu, kae ni tagata agasala.

Sesunio ; le kie foou mo utele foou

14Na au loa tisipulo a Soane kia Sesu, o pati : Kolea e motou sesunio ai, matou ti mo le kau faliseo, kae e leaise sesunio au tisipulo ? 15Na tali loa Sesu kia latou : Pe feala ke mamae a kaukau nea o le tagata avaga, kae koi nofo le tagata avaga mo latou ? E soko mai loa a aso ala e too ai loa le tagata avaga meia latou, ti e lotou sesunio loa. 16E leaise tui e se tasi se kie foou ki se kofu afea ; talie e saei loa e ia le kofu afea, ti e veli ake loa le masae. 17E leaise tuku foki se vino foou ki ni utele afea, talie e masaesae loa a utele afea, ti e sali loa ki tafa le vino ti e maumau loa mo utele ; kae e tuku le vino foou ki ni utele foou, ti e tologa loa le vino mo utele.

Milakulo e lua : le fafine mo le taine o Sailusi

18Na lolotoga fakasa e ia kia latou a folafola ana, ko leinei, na kaku mai loa se pule, o tulolo i ona mua, o pati : Nao mate nei fua loku taine ; kae au a koe o teki kiate ia ou lima, ti e mauli loa a ia. 19Na tuu ake loa Sesu ki aluga, ti na muli loa a ia iate ia mo ana tisipulo.

20Ti ko leinei, na fakafeofi ake loa kiate ia i muli se fafine leia na pupuke talu mei fetuu e kau agafulu tupu lua, o fafa ki le tapatapa o lona kofu. 21Talie na pati a ia i lona loto : Kapau e mafai fua ke kau fafa ki lona kofu, ti e kau mauli loa. 22Na mafuli loa Sesu, o pati, i lana tio kiate ia : Ke ke loto makeke, ei loku taine, kua fakamauli a koe e lau tui. Ti na mauli loa le fafine lena i le ola fai lena.

23I le kaku o Sesu ki le fale o le pule, o tio ki le kau pupusi fakatagi mo le kakai leia kua tagi laulau, 24na pati loa a ia kia latou : Kotou fakamamao kese atu ; talie e leaise mate le taine, kae e moe a ia. Ti na lotou gologolo loa kiate ia. 25I le oki o le kakau o le kakai, na ulu loa a ia ki loto, ti na too loa e ia le lima o le taine, ti na tuu ake loa le taine ki aluga. 26Na mafola loa lona logologona i le fenua katoa.

Fakamauli o kivi e toka lua mo se tagata avagaia

27I lana mavae mei ai, na muli loa ia Sesu ni tagata kivi e toka lua, ala na kalaga : Vosa o Tavite, alofa mai kia maua ! 28I lana kaku ki fale, na fakafeofi mai le sa tagata kivi kiate ia, ti na pati loa Sesu kia laua : Pe kolua tui e kau mafai ia le nea lena ? Ti na la tali loa kiate ia : Io, Aliki. 29Ti na fafa loa Sesu ki ola mata, o pati : Ke fai kia koulua o mulimuli ki lakoulua tui. 30Ti na mavaa loa ola mata. Na fai loa e Sesu kia laua le fakatotonu fakamakeke leinei : Kolua tokaga ke aua na iloa fua e se tasi le nea leinei.

31Kae i lola mavae, na la fakamafola loa lona logologona i le fenua katoa.

32Na lotou ano loa, ti ko leinei, na aumai loa kia Sesu se tagata avagaia leia na gutu mate. 33I le oki o le kapu o le temonio, na masau loa le gutu mate. Ti na ofolele loa le kakai, o pati : E leikiaise sa se nea feneeki i Iselaele i se aso. 34Kae na pati loa le kau faliseo : E kapu e ia le kau temonio i le makeke o le pule o le kau temonio.

Alofa o Sesu ki le kakai

35Na feanoaki Sesu i kolo lalasi fuli mo kolo liliki, o akonaki i sinakoka, mo fakasa le logo malie o le puleaga, ti mo fakamauli a masaki fuli ti mo maimoa fuli.

36I lana tio ki le kakai, na aloalofa loa a ia kia latou, talie ko se kakai fakatotoso mo gaegae ofaipe ni ovi ala e sala tagata tausi ovi. 37Na pati loa Sesu ki ana tisipulo : E lasi ai le fuata kae toka teiki fua le kau gaoi. 38Kotou kole ki le pule o le fuata ke kakau ni tagata gaoi ki lana fuata.

Currently Selected:

Mateo 9: FB2000

Highlight

Copy