Mateo 8

Fakamauli o se tagata kilia

1I le ifo a Sesu mei le mauga, na muli loa iate ia se kakai toka api. 2Ti ko leinei, na fakafeofi ake loa se tagata kilia o tulolo i ona mua, o pati : Aliki, kapau e ke loto ki ai, e mafai ke ke fakamea au. 3Na falo loa e Sesu lona lima, o fafa kiate ia, o pati : E kau loto ki ai, ke ke mea. I le lakaga fai lena na mea loa a ia i lona kilia. 4Na pati loa Sesu kiate ia : Tokaga ke aua na ke fakasa a ia ki se tasi ; kae ke ano, o fakasa a koe ki le tagata faisakilifisio, ti mo ke ave le moliga leia na tosi e Moisese, ke fakamaoki ai kia latou.

Fakamauli o le tagata fakasausau a le setulio

5I le ulu a Sesu ki le kolo ko Kafanaume, na fakatuu loa a ia e se setulio, 6o kolekole kiate ia, o pati : Aliki, ko laku tagata fakasausau e moe i fale, e palalisia ti e mamae lasi ai. 7Na pati loa Sesu kiate ia : E kau ano loa, ti e kau fakamauli loa a ia. 8Na tali loa le setulio : Aliki, e leaise aoga ke ke ulu mai ki loku loto fale, kae ke pati mai fua se folafola, ti e mauli loa laku tagata fakasausau. 9Talie, ko au leinei e maua ke fakalogo ki oku pule, e kau pule ki ni tagata solia ; ti e kau pati ki se tasi : Ano !, ti e ano a ia ; ki leia ake : Au !, ti e au a ia ; ti ki laku tagata fakasausau : Fai le nea lena !, ti e fai e ia a ia. 10I lana logo ki lana masau, na ofolele Sesu, ti na pati loa a ia kia latou ala na muli iate ia : E kau pati maoki atu kia koutou, i Iselaele foki, e leikiaise kau maua se tui makeke feneeki. 11Ti e kau fakasa atu kia koutou, e au loa se toka api mei le sopoaga o le laa mo le viloaga o le laa, ti e lotou eke loa i le laupapa mo Apalaamo, mo Isaake, ti mo Sakopo i le Puleaga o Selo. 12Kae e ti loa a vosa o le Puleaga ki le fakapouli o fafo, ki le ganea leia e logo ai loa ni tagi mo ni fetati o nifo. 13Ti na pati loa Sesu ki le setulio : Ano, ti ke fai kiate koe, ofaipe lau tui. Ti na mauli loa le tagata fakasausau i le ola totonu lena.

Fakamauli o le tinana o le avaga a Petelo

14Na ano loa Sesu ki le fale o Petelo, ti na tio loa a ia ki le tinana o lona avaga e moemoe, kua maua a ia e le fiva. 15Na fafa loa Sesu ki lona lima, ti na mavae loa le fiva iate ia ; ti na tuu ake loa a ia ki aluga, o fakasausau kia Sesu.

16I le afiafi, na aumai loa kia Sesu ni tagata avagaia e toka api ai. Na kapu loa e ia a laumalie veli ki lana folafola, ti na fakamauli loa e ia le kau masaki fuli, 17o tupu ke fakasoko le nea leia na fakasa fakatomua e le polofeta ko Isaia : Na too e ia otou maimoa, ti na amo e ia otou masaki.

Asiasii o le kau tisipulo

18Ko Sesu, i lana tio ki se kakai toka api leia na takatakai ia a ia, na fakatotonu loa ke fakalaka ki leia ake kauvai. 19Na fakafeofi ake loa se sekelipa kiate ia, o pati : Pule, e kau muli atu loa iate koe i ganea fuli ala ka ke ano ai loa. 20Na tali loa Sesu kiate ia : E maua e lenato ni olatou nofoaga, ti e maua e manu lele o le lagi ni olatou ofaga ; kae e leaise maua e le Vosa o le tagata se ganea leia ke fakamalolo ai lona ulu. 21Na pati loa se tasi i le kau tisipulo kiate ia : Aliki, fakataga mai mua ke kau ano o tanu loku tamana. 22Kae na tali loa Sesu kiate ia : Muli mai iate au, ti tuku le kau mate ke tanu ia olatou mate.

Taofi e Sesu o le afaa

23Na sopo loa a ia ki le vaka, ti na muli loa ana tisipulo iate ia. 24Ti ko leinei, na to loa se afaa lasi i le tai, ti kua ta fakaveliveli loa le vaka e galu. Kae ko ia, na moe mate a ia. 25Na fakafeofi ake loa le kau tisipulo, o fafagu a ia, o pati : Aliki, saofaki tatou na tou mamate ! 26Na pati loa a ia kia latou : Kolea e kotou i ai, kakai tui gaegae ? Na tuu loa a ia ki aluga, o feau le matagi mo le tai, ti na tokamalie lasi loa. 27Na ofolele loa a tagata ana, o lotou pati : Ko ai le tagata leinei, ke fakalogo foki ki ai le matagi mo le tai ?

Kapu e Sesu o temonio i Katala

28I le kaku a Sesu ki leia ake fetuu tai, ki le fenua o le kau Katala, na ulu mai loa ni tagata e toka lua mei ni tanuma, o au ki ona mua. Na fakamamae a tagata ana e se kau temonio. Na la itaita veli ai, o leaise feala ke fakalaka se tasi i le ala lena. 29Ti ko leinei, na la kalaga loa kiate ia : Kolea le nea leia e ke loto kia matou, Sesu, Alo o le Atua ? Pe na ke au ki leinei o fakamamae matou i mua o le temi ? 30Na i ai se kau puaka lasi leia na kai o mamao meia laua. 31Na kole loa e le kau temonio kia Sesu, o pati : Kapau e ke kapu matou, kakau matou ki le kau puaka leinei. 32Na pati loa a ia kia latou : Kotou ano ! Na lotou mavae loa, ti na lotou ulu loa ki le kau puaka. Ti ko leinei, na maluluku loa le kau puaka katoa mei le fakamakilakila ki le tai, ti na lotou mamate loa i ai. 33Ko latou ala na fagai ia le kau puaka na sosola loa, ti na lotou ano loa ki le kolo o fakamatala i ai a nea fuli ala na soko ki le kau puaka, ti mo le nea leia na soko ki le sa tagata avagaia. 34Na au loa le kolo katoa o fakafelavei kia Sesu ; i lalatou tio kiate ia, na lotou kolekole loa kiate ia ke mavae a ia i lolatou fenua.

Currently Selected:

Mateo 8: FB2000

Highlight

Copy