Mateo 7

Aua se fakamaau

1Aua na kotou fakamaui fua, o tupu ke aua na fakamaui koutou. 2Talie e fakamaui loa koutou ki le fakamaau leia na kotou fai, ti e fuafua loa koutou ki le fua leia na kotou fakaaoga. 3Kolea e ke tio ai ki le ga penu leia e piki i le mata o lou taina, kae leaise ke tokagai fua le fa alaga leia e piki i lou mata ? 4Pe feaki le mafai o lau pati ki lou taina : Tuku mua ke kau too le ga penu mei lou fa mata, a koe leia e piki le fa alaga i lou fa mata ? 5Malualoi, too mua le fa alaga mei lou fa mata, ti o ke tio loa pe feaki le too o le ga penu mei le fa mata o lou taina.

6Aua na kotou soli a nea tapu ki kuli, ti aua na kotou laku akoutou fuai kasoa ki mua o puaka, talie ke aua na lotou takatakafi loa latou ki olatou vae, ti ke aua na lotou mafuli mai loa, o sae koutou.

Fakamakeke ki le faikole

7Kotou kole, ti e soli atu loa kia koutou ; kotou afa, ti e kotou maua loa ; kotou fitifiti, ti e fakamavaa atu loa kia koutou. 8Talie ko leia e kole e tali, ko leia e afa e maua, ti e fakamavaa ki leia e fitifiti. 9Ko ai ia koutou e soli ia loa se fa fatu ki lona vosa, mo ka kole ake e ia kiate ia se ga pane ? 10Pe kapau e kole ake e ia se ga ika, pe soli loa e ia kiate ia se gata ? 11Koia kapau ko koutou, ala e agaveveli, e kotou iloa le soli o ni nea malilie ki akoutou fanau, pe leaise toe lasi ake le fia soli loa e lokoutou Tamana i Selo o ni nea malilie kia latou ala e kole ake kiate ia,

Le lao mauiga ; Ala e lua

12Ko nea fuli ala e kotou loto ke fai atu e tagata kia koutou, kotou fai foki a ia kia latou, talie ko lena le lao ti mo le kau polofeta.

13Kotou ulu i le matapa lau ikiiki. Talie e lau lasi le matapa, ti e lau lasi mo le ala leia e ano ki le maumau, ti e toka api latou ala e ulu i ai. 14Kae e lau ikiiki le matapa, ti e lau ikiiki mo le ala leia e ano ki le mauli, ti e toka teiki fua latou ala e maua ia a ia.

Polofeta loi

15Kotou tokaga ki le kau polofeta kaka. E lotou au kia koutou kua kofu ofaipe ni ovi, kae i loto ko ni lupo fekai latou. 16E kotou iloa loa latou i olatou fua. Pe tau ni fuai vite i ni laakau talatala, pe ko ni fiki i ni malualoi ? 17Ko laakau malilie fuli e fua malilie, kae ko le laakau leia e veli e fua veveli. 18E leaise mafai ke tupu i se laakau malie ni fua veveli, pe tupu i se laakau veli ni fua malilie. 19Ko laakau fuli ala e leaise tupu i ai ni fua malilie e tuuti loa, o ti ki le afi. 20Koia e kotou iloa loa latou i olatou fua.

Tausi lotu loi

21Ko latou ala e pati mai kiate au : Aliki, Aliki, e leaise lotou ulu fuli loa ki le Puleaga o Selo, kae e gato fai ki leia e fai ia le finegalo o loku Tamana leia e nofo i le lagi. 22E pati mai loa se toka api kiate au i le aso a ia : Aliki, Aliki, pe na leaise motou kikite i lou suafa ? Pe na leaise motou kapu ni temonio i lou suafa ? Pe na leaise motou fai ni milakulo mauke i lou suafa ? 23Ti e kau pati loa kia latou i le lauatea : Na leaise kau iloa fua koutou, kotou fakamamao atu iate au, koutou ala na fai ia le agaveli.

Fale e lua

24Koia, ko leia e logo ki folafola anei e kau fakasa ti e fai ia latou, e tatau loa a ia mo se tagata poto leia na fakatuu ia lona fale i aluga o le utu. 25Na to le ua, na tafe a liua, na agi a matagi, o patatu ki le fale lena : Na leaise solo fua a ia, talie na fakatafito a ia i le utu. 26Kae ko leia e logo ki folafola anei e kau fakasa, ti e leaise fai ia latou, e tatau loa a ia mo se tagata valea leia na fakatuu ia lona fale i aluga o le one. 27Na to le ua, na tafe a liua, na agi le matagi, o patatu ki le fale lena : Na solo a ia, ti na lasi ai lona maumau.

28I le oki o lana masau, na ofolele ai le kakai i lana akonaki ; 29talie na akonaki a ia ofaipe se tasi leia e nofo mo le pule o le Atua, kae e leaise faipe olatou sekelipa.

Currently Selected:

Mateo 7: FB2000

Highlight

Copy