Mateo 10

Gaoi a le tino agafulu tupu lua

1Ti na kalagai loa e ia ana tisipulo e tino agafulu tupu lua, ti na tuku loa e ia kia latou le pule ke kapu ia a laumalie veli, ti mo fakamauli ia a masaki mo maimoa fuli.

2Ko nei igoa o le kau apositolo e tino agafulu tupu lua.

Ko le uluaki, ko Simone, na igoa ko Petelo, ti mo Atelea, lona taina ; mo Sakopo, vosa o Sepeteo, ti mo Soane, lona taina ; 3mo Filipo, ti mo Patolomeo ; mo Toma, ti mo Mateo, ko le popelikano ; mo Sakopo, vosa o Alefeo, ti mo Tateo ; 4mo Simone, le Kananito, ti mo Sutasi le Isekaliote, leia na fakatau ia Sesu.

5Ko lena loa le tino agafulu tupu lua leia na kakau e Sesu, i le oki o le tuku kia latou o fakailoilo anei :

Aua na kotou ano ki le kakai pagani, ti aua na kotou ulu ki kolo o le kau Samalitana. 6Kae kotou ano tafito ki ovi pulinoa o le fale o Iselaele. 7Kotou ano, kotou fakasa, o kotou pati : Kua ofi le Puleaga o le atu lagi. 8Kotou fakamauli le kau masaki, kotou fakatuuake le kau mate, kotou fakamea le kau kilia, kotou kapu a temonio. Na kotou tali sala totogi, ti kotou soli sala totogi. 9Aua na kotou too se aulo, pe ko se paaga, pe ko ni piesi i okoutou kilipipi ; 10pe ko se taga ki le folau, pe ko ni kofu e lua, pe ko ni taka, pe ko se tokotoko ; talie e tonu ke maua e le tagata gaoi lana nea kai.

11I kolo lalasi ti mo kolo liliki ala e kotou ulu ki ai, kotou vesili pe i ai se tagata leia e loto malie ke fakatalitali ia koutou, ti kotou nonofo i lona fale o kaku ki lakoutou toe mavae. 12I le ulu ki le loto fale, kotou pati : Ke nofo le tokamalie mo koutou ! 13ti kapau e tali a ia e le loto fale lena, ti ke ifo lokoutou tokamalie ki le loto fale lena ; kae kapau e leaise tali a ia e le loto fale lena, ti ke toe liliu mai lokoutou tokamalie kia koutou. 14Kapau e leaise fakatalitali loa koutou ti e leaise fakalogo loa ki akoutou folafola, kotou mavae i le fale lena pe i le kolo lena, ti kotou tutuui le efu i okoutou vae. 15E kau pati maoki atu kia koutou : I le aso o le fakamaau, e tautea loa le fenua o Sotoma mo Komola o maamaa ake i le kolo lena.

Fakaveliveli ka au

16Ko leinei, e kau kakau koutou ofaipe ni ovi ki loto malie o ni lupo. Kotou poto ofaipe ni gata, ti kotou agamalie ofaipe ni lupe tea. 17Kotou tokaga ki tagata ; talie e lotou ave loa koutou ki telepinale, ti e lotou sasa loa koutou ki ni laakau i olatou sinakoka ; 18e taki loa koutou, o tupu ko au, ki mua o ni kovana, ti mo ni sau, ke kotou liliu ko ni fakamaoki kia latou ti mo le kau pagani. 19Kae ka fakatau loa koutou, aua na kotou tuania ia pe feaki loa lakoutou masau, ti kolea loa lakoutou masau : E tuku atu loa kia koutou le nea leia e tonu ke kotou fakasa i lona ola totonu ; 20talie e leaise ko koutou ala e masau loa, kae ko le Laumalie Maokioki o lokoutou Tamana leia e masau loa ia koutou.

21E fakatau loa e le taina lona taina ki le mate, ti ko le tamana lana fanau ; e malaga loa a fanau ki olatou matua, o tamate latou. 22E vesiainai loa koutou e le kakai fuli, o tupu ko loku suafa ; kae ko leia e kataki fualoa loa o kaku ki le fakaoki e saofaki loa. 23Ka fakavelivelii loa koutou i se kolo, kotou sosola ki se tasi ake a kolo. E kau pati maoki atu kia koutou, e leikiaise oki lakotou folii a kolo o Iselaele, kae kua au le Vosa o le tagata.

24E leaise lasi ake le tisipulo i le pule, pe ko le tagata fakasausau i lona aliki. 25E feauga fai ki le tisipulo ke tatau mo lona pule, ti mo le tagata fakasausau ke tatau mo lona aliki. Kapau na lotou pati ki le pule o le fale ko Pelesepu a ia, ti e lotou toe pati fenaaki loa ki kakai o lona fale ! 26Aua na kotou i kia latou, talie e leaise nea fua leia e munia e leaise tonu ke sa, ti e leaise nea fua leia e lilo e leaise tonu ke iloa. 27Ko le nea leia e kau fakasa atu kia koutou i le fakapouli, kotou fakasa a ia i le lauatea ; ti ko le nea leia e fakamusumusui atu ki okoutou taliga, kotou fakasa a ia i le taufufu. 28Aua na kotou i kia latou ala e tamate ia le tino kae e leaise mafai ke lotou tamate ia le laumalie ; kotou i tafito ki leia e tamate ia le laumalie ti mo le tino i Ifeli. 29Pe leaise fakatau koia ni ga miti e lua ki se fa piesi e tasi ? Kae e leaise vilo fua se ga miti e tasi ki le kele, sala mo le finegalo o lokoutou Tamana. 30Ti kua lau fuli okoutou fului ulu. 31Aua na kotou i fua : E mauiga lasi ake koutou i ni miti mauke ai.

32Koia, ko leia e fakasa ia au i mua o le kaugamalie, e kau fakasa loa a ia i mua o loku Tamana leia e nofo i le lagi. 33Kae ko leia e fakafiti loa kiate au i mua o tagata, e kau toe fakafiti loa kiate ia i mua o loku Tamana leia e nofo i le lagi.

34Aua na kotou pati na kau au o aumai le tokamalie ki le malama nei ; na leaise kau au o aumai le tokamalie, kae na kau au o aumai le seleta. 35Talie na kau au o fakamavetevete le tagata mo lona tamana, le taine mo lona tinana, le fugao fafine mo lona tinana ; 36ti e maua loa e le tagata ona fili i le kakai o lona fale. 37Ko leia e alofa ki lona tamana pe ki lona tinana o lasi ake iate au, e leaise gali a ia mo au, ti ko leia e alofa ki lona vosa pe ki lona taine o lasi ake iate au, e leaise gali a ia mo au ; 38ko leia e leaise too ia lona koluse, ti e leaise muli mai iate au, e leaise gali a ia mo au.

39Ko leia e taupau ia loa lona mauli e fakapuli noa ia loa a ia, ti ko leia e fakapuli noa ia loa lona mauli o tupu ko au e toe maua ia loa a ia.

40Ko leia e tali ia koutou e tali ia au, ti ko leia e tali ia au, e tali ia loa leia na kakau ia mai au. 41Ko leia e tali ia se polofeta i lona uiga polofeta e tali ia loa se fakapale o le polofeta, ti ko leia e tali ia se tagata faitotonu i lona uiga faitotonu e tali ia loa se fakapale o le tagata faitotonu. 42Ti ko leia e soli ia loa se ipu vai momoko e tasi ki se tasi i toe liliki anei talie ko laku tisipulo a ia, e kau pati maoki atu kia koutou, e leaise puli loa lona fakapale.

Currently Selected:

Mateo 10: FB2000

Highlight

Copy