Senesi 50

1Na punou loa Sosefo ki mata o lona tamana o tagi mo sogi kiate ia. 2Ti na fakatotonu loa e ia ki toketa ala na gaoi kiate ia ke lotou fakatologa le tino o lona tamana, ti na fakatologa loa e toketa a Iselaele. 3Na fai loa le fakatologa i aso e kau fa. Ti na tagi loa le kau Esipito kiate ia i aso e kau fitu.

4I le oki o aso o le putu, na masau loa Sosefo ki le kakai o le fale o Falaone, o pati : Ko leinei, kapau kua kau maua se kalasia i okoutou mua, ti e kau kole atu kia koutou, ke kotou fakasa le nea leinei kia Falaone : 5I mua o lona mate, na kole mai kiate au e loku tamana ke kau fakapapau ake kiate ia, o pati : Ko leinei ka kau mate, ke ke tanu loa au i le tanuma leia na kau totogi i le fenua o Kanaane. Koia e kau loto ai ke kau ano ki ai o tanu loku tamana, ti e kau toe liliu mai loa. 6Na tali loa Falaone : Pale o tanu lou tamana, o fakasoko lau fakapapau kiate ia.

7Ti na pale loa Sosefo o tanu lona tamana. Ti na pale loa mo ia a minisi fuli a Falaone, mo tagata mauiga fuli o le fale o Falaone, mo tagata lalasi fuli o Esipito, 8mo le fale katoa o Sosefo, mo ona fetaina, mo le fale katoa o lona tamana. Na gato fai ki toe liliki, mo ovi, ti mo pipi, na tuku loa i le fenua o Koseni. 9Ti na toe ano foki mo ia ni saliote, mo ni tagata ekeosi ; ti na api ai le fanoga. 10I le kaku o le fanoga ki le ganea sasa fulumeto o Atati, leia na tuu i leia atu kauvai o le Solotane, na lotou fai loa i ai ni tagi lasi mo fakamamae ; ti na fai loa e Sosefo se putu ki lona tamana i aso e fitu. 11Ko le kau Kanaane, ala ko le kakai o le fenua, na tio loa ki le putu lena na fai i Atati, ti na lotou pati loa : Ko se putu lasi leinei a le kau Esipito ! Koia na soli ai le igoa ko Apele-Miselaime ki le ganea sasa fulumeto lena, leia na tuu i le leia atu kauvai o le Solotane. 12Na fakasoko loa i ai e vosa o Sakopo le nea leia na fakatotonu ake e lolatou tamana kia latou : 13Na lotou ave loa lolatou tamana ki le fenua o Kanaane, ti na lotou tanu loa a ia i le ana o le faisaga o Makepela, leia na totogi e Apalaamo kia Efelone, ko le tagata Eti, mo ona tanuma fakafamili, ti na ofi ki Mamele.

14I le oki o le tanu o lona tamana, na toe liliu loa Sosefo ki Esipito mo ona fetaina, ti mo latou fuli ala na pale mo ia, o tanu lona tamana.

15I le tio loa o fetaina o Sosefo kua mate lolatou tamana, na lotou pati loa : Kapau e nofo Sosefo mo sona vesia kia tatou, ti e totogi loa e ia kia tatou a veli fuli ala na tou fai kiate ia ! 16Ti na lotou fakakaku loa kia Sosefo le nea leinei : Na tuku loa e lou tamana le fakatotonu leinei i mua o lona mate : 17E kotou masau loa kia Sosefo, o pati : Ei lomatou taina, fakamolemole mai ki le agaveli o ou fetaina, ki le agasala lasi leia na motou fai kiate koe ! Fakamolemole i le aso nei ki le agasala o tagata fakasausau a le Atua o lou tamana ! Na tagi loa Sosefo i lana logo ki masau ana. 18Ti na au loa ona fetaina totonu kiate ia, o punou i ona mua, o pati : Ko au tagata fakasausau matou. 19Ti na pati loa Sosefo kia latou : Aua na kotou tuania. E leaise ko au leia e tonu ke nofo i le tuulaga o le Atua ! 20Na kotou loto ke fai se nea veli kiate au, kae na fulusi a ia e le Atua ko se nea malie, o tupu ke fakasoko le nea leia kua soko i le aso nei, ke saofaki ai le mauli o se kakai toka api. 21Koia ke aua na kotou tuania ia fua se nea ; e kau tausi loa koutou, mo okoutou famili. Ti na fakafimalie loa e ia latou i lana masau ki olatou loto.

Aso fakaoki o Sosefo : lona mate

22Na nofo loa Sosefo i Esipito, a ia mo le famili o lona tamana. Na mauli loa a ia i fetuu e kau lelau kau agafulu. 23Na tio loa Sosefo ki vosa o Efalaimi o kaku ki le tolu tautupu ; ti ko vosa o Makile, vosa o Manase, na eke loa i ona tega. 24Na pati loa Sosefo ki ona fetaina : Kua tatae loku temi mate ; kae e fakatele maoki loa le Atua kia koutou, ti e fakamavae loa e ia koutou i le fenua leinei ki le fenua leia kua fakapapau e ia ke soli kia Apalaamo, mo Isaake, mo Sakopo. 25Ti na pati loa Sosefo ki fanau a Iselaele : Kotou fakapapau mai kiate au, e kotou ave loa oku ivi ke mamao i leinei, i le aso leia e fakatele ai loa le Atua kia koutou. 26Na mate loa Sosefo i lona fetuu kau lelau kau agafulu. Na fakatologa loa lona tino, ti na tuku loa a ia ki se pusa i Esipito.

Currently Selected:

Senesi 50: FB2000

Highlight

Copy